“ໄຟຟ້າ ຫົງສາ” ຮ່ວມມືກັບ “ສະຫະກົນ” ສ້າງລະບົບສາຍພານລໍາລຽງດິນ ດ້ວຍເຕັກໂນໂລຊີລໍ້າສຸດໃນອາຊຽນ ຮອງຮັບພື້ນທີ່ສ່ວນຕໍ່ຂະຫຍາຍກວ່າ 40 ຕາລາງກິໂລແມັດ ເນັ້ນຍໍ້າກົນລະຍຸດດ້ານ ESG ຂອງບໍລິສັດ

“ໄຟຟ້າ ຫົງສາ” ຮ່ວມມືກັບ “ສະຫະກົນ” ສ້າງລະບົບສາຍພານລໍາລຽງດິນ ດ້ວຍເຕັກໂນໂລຊີລໍ້າສຸດໃນອາຊຽນ ຮອງຮັບພື້ນທີ່ສ່ວນຕໍ່ຂະຫຍາຍກວ່າ 40 ຕາລາງກິໂລແມັດ ເນັ້ນຍໍ້າກົນລະຍຸດດ້ານ ESG ຂອງບໍລິສັດ

ວັນທີ 3 ພຶດສະພາ 2024 ທີ່ ເມືອງຫົງສາ ແຂວງໄຊຍະບູລີ ສປປ ລາວ ບໍລິສັດ ໄຟຟ້າ ຫົງສາ ຈໍາກັດ ຈັດພິທີເປີດການນໍາໃຊ້ພື້ນທີ່ສໍາປະທານສ່ວນຕໍ່ຂະຫຍາຍ ແລະ ລະບົບສາຍພານລໍາລຽງດິນ ເສັ້ນທີ່ 2 ຂອງ ບໍລິສັດ ໄຟຟ້າ ຫົງສາ ຈໍາກັດ ແລະ ພິທີ ມອບ-ຮັບ ສາຍພານລໍາລຽງດິນ ເສັ້ນທີ່ 2 ສ່ວນຕໍ່ຂະຫຍາຍ ລະຫວ່າງ ບໍລິສັດ ໄຟຟ້າ ຫົງສາ ຈໍາກັດ ແລະ ບໍລິສັດ ສະຫະກົນອິຄຣິບເມັ້ນ ຈໍາກັດ (ມະຫາຊົນ) ໂດຍໄດ້ຮັບກຽດຈາກ ທ່ານ ພົງສະຫວັນ ສິດທະວົງ ເຈົ້າແຂວງ ແຂວງໄຊຍະບູລີ ເປັນປະທານໃນພິທີ ພ້ອມດ້ວຍ ທ່ານ ຈັນທະບູນ ສຸກອາລຸນ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ພອນສະຫວັນ ໄຊສົມພັນ ເຈົ້າເມືອງ ເມືອງຫົງສາ, ທ່ານ ທະວີສັກ ໄຊຍະວົງ ເຈົ້າເມືອງ ເມືອງເງິນ, ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ແລະ ທ່ານ ນົບພັນ ເມືອງໂຄດ ປະທານກໍາມະການບໍລິຫານ ບໍລິສັດ ສະຫະກົນອິຄຣິບເມັ້ນ ຈໍາກັດ (ມະຫາຊົນ) ທ່າມກາງແຂກຜູ້ມີກຽດຮ່ວມເປັນສັກຂີພິຍານ

ໂຄງການໂຮງໄຟຟ້າພະລັງງານຄວາມຮ້ອນຫົງສາ ເປັນໂຮງໄຟຟ້າຂະໜາດໃຫຍ່ ທີ່ໄດ້ຮັບການຮັບຮອງມາດຕະຖານໃນລະດັບສາກົນ ແລະ ດໍາເນີນງານດ້ວຍຄວາມໃສ່ໃຈສິ່ງແວດລ້ອມຈົນເປັນທີ່ຮູ້ຈັກໃນຊຸມຊົນ ແລະ ສັງຄົມ ແລະ ທັງສາມາດສ້າງສະຖຽນລະພາບດ້ານພະລັງງານໃຫ້ແກ່ ສປປ ລາວ ແລະ ຣາດຊະອານາຈັກໄທ ມາໂດຍຕະຫຼອດ ແລະ ເພື່ອໃຫ້ການປະຕິບັດວຽກງານບໍ່ແຮ່ເປັນໄປຕາມນະໂຍບາຍດ້ານຄວາມປອດໄພໃນລະດັບສາກົນ ບໍລິສັດຈຶ່ງໄດ້ພິຈາລະນາ ຂໍຂະຫຍາຍພື້ນທີ່ສໍາປະທານ ແລະ ໄດ້ຮັບຄວາມໄວ້ວາງໃຈຈາກ ສະພາປະຊາຊົນ ແຫ່ງ ສປປ ລາວ ແລະ ໄດ້ຮັບອະນຸມັດໃຫ້ຂະຫຍາຍພື້ນທີ່ສໍາປະທານສ່ວນຕໍ່ຂະຫຍາຍໃນເຂດ ເມືອງເງິນ ແລະ ເມືອງຫົງສາ ເປັນຈໍານວນ 41.45 ຕາລາງກິໂລແມັດ ເມື່ອນັບລວມກັບພື້ນທີ່ສໍາປະທານເດີມຈຶ່ງມີພື້ນທີ່ດໍາເນີນງານທັງໝົດ 117.86 ຕາລາງກິໂລແມັດ
ສໍາລັບພື້ນທີ່ສ່ວນຕໍ່ຂະຫາຍທີ່ໄດ້ຮັບພິຈາບະນາອະນຸມັດມານັ້ນ ຈະເປັນພື້ນທີ່ສໍາລັບການຕິດຕັ້ງລະບົບສາຍພານລໍາລຽງດິນ ເສັ້ນທີ່ 2 ຂອງ ບໍລິສັດ ໄຟຟ້າ ຫົງສາ ຈໍາກັດ ໂດຍມີ ບໍລິສັດ ສະຫະກົນອິຄຣິບເມັ້ນ ຈໍາກັດ (ມະຫາຊົນ) ເຊິ່ງເປັນໜຶ່ງໃນຜູ້ຮັບເໝົາຫຼັກຂອງໂຄງການ ທີ່ມີຄວາມຊ່ຽວຊານໃນການດໍາເນີນງານດັ່ງກ່າວ ຈຶ່ງນໍາມາສູ່ແນວຄິດການພັດທະນາລະບົບສາຍພານລໍາລຽງດິນເສັ້ນໃໝ່ ເຊິ່ງເປັນສ່ວນຕໍ່ຂະຫຍາຍ ເຂົ້າມາເສີມປະສິດທິພາບໃນການປະຕິບັດງານບໍ່ແຮ່ ໃຫ້ມີປະສິດທິພາບ, ເກີດຄວາມປອດໄພ ແລະ ເປັນມິດກັບສິ່ງແວດລ້ອມ ລວມຄວາມຍາວຕະຫຼອດເສັ້ນສາຍພານ ທັງໝົດ 17 ກິໂລແມັດ ຄື ສາຍພານເສັ້ນນີ້ມີລັກສະນະຕາມຄວາມລາດຊັນຂອງພູມິປະເທດ ຈຶ່ງໄດ້ຮັບການອອກແບບໃຫ້ຂັບເຄື່ອນໂດຍໃຊ້ເຕັກໂນໂລຊີຂັ້ນສູງ ເພື່ອປະສິດທິພາບສູງສຸດ ແລະ ເປັນການເນັ້ນຍໍ້າ ການດໍາເນີນທຸລະກິດພາຍໃຕ້ກົນລະຍຸດດ້ານສິ່ງແວດລ້ອມ, ສັງຄົມ ແລະ ກໍາມາພິບານ ຫຼື ESG ຂອງ ບໍລິສັດ ໄຟຟ້າ ຫົງສາ ຈໍາກັດ ໄດ້ຢ່າງສໍາຄັນ
ໂຄງການໂຮງໄຟຟ້າພະລັງງານຄວາມຮ້ອນຫົງສາ ເປັນໂຮງໄຟຟ້າຖ່ານຫີນລິກໄນ ແຫ່ງທໍາອິດທີ່ໃຫຍ່ທີ່ສຸດໃນ ສປປ ລາວ ມີກໍາລັງການຜະລິດໄຟຟ້າ 1,878 ເມກາວັດ ຕັ້ງຢູ່ ເມືອງຫົງສາ ແຂວງໄຊຍະບູລີ ສປປ ລາວ ດໍາເນີນການພາຍໃຕ້ການບໍລິຫານງານຂອງ ບໍລິສັດ ໄຟຟ້າ ຫົງສາ ຈໍາກັດ ເລີ່ມເດີນເຄື່ອງມາຕັ້ງແຕ່ປີ 2016 ເພື່ອຜະລິດໄຟຟ້າໃຫ້ກັບ ການໄຟຟ້າຝ່າຍຜະລິດແຫ່ງປະເທດໄທ (ກຟຜ) ແລະ ການໄຟຟ້າລາວ (EDL : Electricité du Laos) ໂດຍໄດ້ຮັບການຮັບຮອງມາດຕະຖານດ້ານສິ່ງແວດລ້ອມສາກົນ ຫຼື ISO 14001 ເວີຊັ່ນ 2015 ແລະ ມາດຕະຖານການຈັດການຄວາມປອດໄພ, ອາຊີວະອະນາໄມ ແລະ ສະພາບແວດລ້ອມໃນການເຮັດວຽກ ຫຼື ISO 45001 ເວີຊັ່ນ 2018 ແລະ ຍັງໄດ້ຮັບການຮັບຮອງຈາກ ກົມອຸດສາຫະກໍາ ແລະ ຫັດຖະກໍາ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໃຫ້ເປັນ Green Factory ແຫ່ງທໍາອິດໃນ ສປປ ລາວ ພ້ອມກັນນັ້ນຍັງໄດ້ດໍາເນີນງານພາຍໃຕ້ນະໂຍບາຍດ້ານສິ່ງແວດລ້ອມ, ສັງຄົມ ແລະ ກໍາມາພິບານ ຫຼື ESG ອີກດ້ວຍ ເພື່ອທີ່ຈະເປັນ “ຜູ້ຜະລິດພະລັງງານໄຟຟ້າທີ່ດີທີ່ສຸດໃນ ສປປ ລາວ ດ້ວຍການດໍາເນີນງານທີ່ເປັນເລີດ ນໍາຄວາມສຸກມາສູ່ທຸກຄົນ”
ໂດຍ: ໄຟຟ້າ ຫົງສາ
ສາຍດ່ວນ: 1506