ວັນທີ 23 ຕຸລາ 2024 ນີ້ ທີ່ໂຮງແຮມ ດອນຈັນ ພາເລດ, ກົມທໍລະນີສາດ ແລະ ແຮ່ທາດ ກະຊວງພະລັງງານ ແລະ ບໍ່ແຮ່ ແລະ ສະມາຄົມອຸດສາຫະກຳເກືອອະນົງຄະທາດ ສປ ຈີນ ແລະ ກົມທໍລະນີສາດອຸດສາຫະກໍານິວເຄຼຍ ແຂວງ ຊິງໄຫ ສປ ຈີນ ໄດ້ຮ່ວມກັນຈັດກອງປະຊຸມສຳມະນາ ສາກົນ ກ່ຽວກັບການພັດທະນາຊັບພະຍາກອນແຮ່ເກືອໂປຕາສ ຢູ່ ສປປ ລາວ ໂດຍໃຫ້ກຽດເປັນປະທານຮ່ວມລະຫວ່າງ ທ່ານ ສຸຂັນສັກ ສີສຸກ ຫົວໜ້າກົມທໍລະນີສາດ ແລະ ແຮ່ທາດ ແລະ Mr. Wang Xiaofeng ປະທານສະມາຄົມອຸດສາຫະກໍາເກືອອະນົງຄະທາດ ສປ ຈີນ. ມີຜູ້ຕາງໜ້າຈາກ ຫ້ອງການ,ກົມ, ສະຖາບັນ ແລະ ລັດວິສາຫະກິດ ອ້ອມຂ້າງ ກະຊວງພະລັງານ ແລະ ບໍ່ແຮ່ ແລະ ທຸກພາກສ່ວນທີ່ກ່ຽວຂ້ອງ ແລະ ບັນດາບໍລິສັດທີ່ລົງທຶນພັດທະນາແຮ່ເກືອໂປຕາສ ຈາກ ສປ ຈີນ ເຂົ້າຮ່ວມ.
ກອງປະຊຸມສຳມະນາໃນຄັ້ງນີ້ ເປັນການຜັນຂະຫຍາຍເນື້ອໃນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືສ້າງຄວາມເຂັ້ມແຂງ ກ່ຽວກັບ ວຽກງານ ພັດທະນາແຮ່ເກືອໂປຕາສ ແລະ ແຮ່ຕິດພັນ ຢູ່ໃນ 11 ແຂວງຂອງ ສປປ ລາວ (ເຂດນະຄອນຫຼວງວຽງຈັນ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈໍາປາສັກ, ອັດຕະປື, ຜົ້ງສາລີ, ອຸດົມໄຊ, ຫຼວງນໍ້າທາ ແລະ ແຂວງໄຊຍະບູລີ) ລະຫວ່າງ ກົມທໍລະນີສາດ ແລະ ແຮ່ທາດ ກະຊວງພະລັງງານ ແລະ ບໍ່ແຮ່ ສປ ລາວ ແລະ ກົມທໍລະນີສາດອຸດສາຫະກຳນິວເຄຼຍ, ພະແນກຊັບພະຍາກອນທໍາມະຊາດ ແຂວງຊິງໄຫ ສປ ຈີນ ສະບັບລົງວັນທີ 26 ກຸມພາ 2024 ໃຫ້ໄດ້ຮັບການຈັດຕັ້ງປະຕິບັດ ແລະ ເພື່ອຈະເປັນການຊຸກຍູ້ ໃຫ້ການພັດທະນາແຮ່ເກືອໂປຕັສ ຂອງ ສອງຊາດ ລາວ-ຈີນ ໃຫ້ໄດ້ຮັບການພັດທະນາແບບປະສົມປະສານ, ມີການປະສານສົມທົບ, ແລກປ່ຽນບົດຮຽນ ແລະ ຖ່າຍທອດເຕັກນິກ-ເທັກໂນໂລຊີ ໃຫ້ ກັນ ແລະ ກັນ. ພ້ອມນີ້ກໍເພື່ອເປັນການຊຸກຍູ້ ການຄຸ້ມຄອງ-ການພັດທະນາແຮ່ເກືອໂປຕາສ ຢູ່ ສປປ ລາວ ເປັນອຸດສາຫະກຳຕ່ອງໂສ້ ແລະ ຕໍ່ເນື່ອງ ໃຫ້ມີຄວາມຍືນຍົງ, ສີຂຽວ ແລະ ນຳໃຊ້ຊັບພະຍາກອນແຮ່ທາດ ໃຫ້ມີໄດ້ຮັບຜົນປະໂຫຍດສູງສູດ ຕາມ ວິໄສທັດ ຮອດປີ 2040 ແລະ ຍຸດທະສາດການພັດທະນາແຮ່ທາດ ຮອດປີ 2030.
