ເພື່ອເປັນການສຶບຕໍ່ຈັດຕັ້ງປະຕິບັດແຜນກິດຈະກຳປີ 2024, ໂຄງການຊ່ວຍເຫຼືອດ້ານວິຊາການ ແລະ ລະບຽບຫຼັກການກ່ຽວກັບຄວາມປອດໄພຂອງເຂື່ອນ, ເຊີ່ງເປັນໂຄງການຮ່ວມມື ລະຫວ່າງ ກົມຄຸ້ມຄອງຄວາມປອດໄພອຸດສາຫະກຳພະລັງງານ, ກະຊວງພະລັງງານ ແລະ ບໍ່ແຮ່ ແລະ ອົງການເຮວວີຕັດ ປະຈຳ ສປປ ລາວ, ໂດຍໄດ້ຮັບທຶນສະໜັບສະໜູນ ຈາກອົງການພັດທະນາ ແລະ ຮ່ວມມືຂອງປະເທດສະວິດເຊີແລນ (Swiss Agency for Development and Cooperation (SDC)),
ໄດ້ຈັດຝຶກອົບຮົມໃນຫົວຂໍ້ “ ການຕິດຕາມກວດການ້ຳຮົ່ວຊື່ມຂອງເຂື່ອນດີນ ແລະ ການກວດກາຄຸນນະພາບວັດສະດຸກໍ່ສ້າງ ສຳລັບເຂື່ອນຄອນກຼິດ”, ແຕ່ວັນທີ 22 ເຖີງ 23 ເມສາ 2024, ທີ່ ເມືອງວັງວຽງ, ແຂວງວຽງຈັນ. ການຝຶກອົບຮົມຄັ້ງນີ້ ນໍາພາ ແລະ ກ່າວເປິດ ໂດຍ ທ່ານ ພູທະນູທອງ ໄຊສົມບັດ, ຮອງຫົວໜ້າກົມຄຸ້ມຄອງຄວາມປອດໄພອຸດສາຫະກຳພະລັງງານ, ໂດຍມີຜູ້ເຂົ້າຮ່ວມຈາກ ກົມຄຸ້ມຄອງຄວາມປອດໄພອຸດສາຫະກຳພະລັງງານ, ພະແນກພະລັງງານ ແລະ ບໍ່ແຮ່ ແຂວງວຽງຈັນ ແລະ ອົງການເຮວວີຕັດ ປະຈຳ ສປປ ລາວ ລວມທັງໝົດ 31 ທ່ານ, ຍິງ 4 ທ່ານ.
ພາຍຫຼັງທີ່ເກີດເຫດການບໍ່ເພີງປາດຖະໜາ ກ່ຽວກັບການຄຸ້ມຄອງຄວາມປອດໄພຂອງເຂື່ອນ ເປັນຕົ້ນແມ່ນໃນປີ 2017 ແລະ 2018, ກະຊວງພະລັງງານ ແລະ ບໍ່ແຮ່ ໄດ້ເພີ່ມທະວີເອົາໃຈໃສ່ ວຽກງານຕິດຕາມກວດກາ ຄວາມປອດໄພ, ການຄຸ້ມຄອງ ແລະ ການບໍລິຫານຈັດການອ່າງນ້ຳຂອງເຂື່ອນ ເພື່ອຄວາມປອດໄພເຂື່ອນ ຂອງບັນດາເຂື່ອນຜະລິດໄຟຟ້າ ທັງໝົດ ໃນຂອບເຂດທົ່ວປະເທດ;
ໂດຍໄດ້ແຕ່ງຕັ້ງ ຄະນະວິຊາການກວດກາດ້ານເຕັກນິກ ແລະ ກວດກາດ້ານນິຕິກຳ, ເຊີ່ງປະກອບມີຄະນະຊ່ຽວຊານຂອງທະນາຄານໂລກ ແລະ ຄະນະຊ່ຽວຊານ ຂອງປະເທດນິວຊີແລນ ເຮັດໜ້າທີ່ ກວດກາດ້ານເຕັກນິກຂອງເຂື່ອນ ປະເມີນຄວາມປອດໄພ ຂອບບັນດາເຂື່ອນດັ່ງກ່າວ, ໃນນັ້ນ ມີເຂື່ອນໃຫຍ່ຈຳນວນ 54 ເຂື່ອນ ແລະ ເຂື່ອນນ້ອຍ 42 ເຂື່ອນ ໄດ້ສໍາເລັດຢ່າງຈົບງານ, ສະຫລຸບວ່າ ບັນດາໂຄງການເຂື່ອນ ແມ່ນມີຄວາມປອດໄພ; ແຕ່ບາງເຂື່ອນຈະຕ້ອງໄດ້ເອົາໃຈໃສ່ ປັບປຸງຕາມການແນະນຳຂອງຊ່ຽວຊານ ຕື່ມອີກ.
ຈຸດປະສົງ ຂອງການຝຶກອົບຮົມໃນຄັ້ງນີ້ ເພື່ອຖ່າຍທອດຄວາມຮູ້ການຄິດໄລ່ຄຳນວນປະລິມານນຳ້ຮົ່ວຊືມ ແລະ ປະສົບການດ້ານການຕິດຕາມກວດກາ ນ້ຳຮົ່ວຊືມຂອງເຂື່ອນດີນ ພ້ອມທັງ ຄວາມຮູ້ກ່ຽວກັບການກວດສອບຄູນນະພາບວັດສະດຸສຳລັບເຂື່ອນຄອນກຼິດ ໃຫ້ນັກສຳມະນາກອນ ທີ່ມາຈາກຂັ້ນສູນກາງ ແລະ ທ້ອງຖິ່ນ ເພື່ອເສີມສ້າງຄວາມຮູ້ ດ້ານເຕັກນິກ, ລະບຽບການ ແລະ ພັດທະນາຄວາມສາມາດ, ບົດຮຽນ ແລະ ປະສົບການ ໃນການກວດກາຄວາມປອດໄພຂອງເຂື່ອນໃຫ້ສູງຂື້ນ.
ຊຸດຝຶກອົບຮົມໃນຄັ້ງນີ້ ໄດ້ເຊີນຊ່ຽວຊານທີ່ມີປະສົບການດ້ານຄວາມປອດໄພຂອງເຂື່ອນລະດັບສາກົນຈາກ ປະເທດ ສະວິດເຊີແລນ ໂດຍທ່ານ Dr. Patrice Droz ຊ່ຽວຊານທາງດ້ານຄວາມປອດໄພຂອງເຂື່ອນ, ມາຖ່າຍທອດບົດຮຽນໃຫ້ແກ່ນັກສຳມະນາກອນ, ເພື່ອໃຫ້ໂຄງການອຸດສາຫະກຳພະລັງງານ ຕ່າງໆມີຄວາມໝັ້ນຄົງ, ຍືນຍົງ ແລະ ມີຄວາມປອດໄພ.
ຜ່ານການຝຶກອົບຮົມຄັ້ງນີ້ ນັກສຳມະນາກອນ ໄດ້ຍົກລະດັບຄວາມເຂົ້າໃຈ ຕໍ່ກັບບົດບາດການເກັບກຳຂໍ້ມູນກ່ຽວກັບ ເຂື່ອນຖົມ-ເຂື່ອນເບຕົງ ແລະ ສາມາດແລກປ່ຽນບົດຮຽນ ໃນການຄິດໄລ່ຄ່າຕ່າງໆ ເຊັ່ນ:
ມື້ທີ 1: ໄດ້ຮຽນຮູ້ກ່ຽວກັບ ການຄິດໄລ່ຄ່າການຊືມຂອງນ້ຳ ທັງແນວຕັ້ງ ແລະ ແນວນອນ, ຄ່າຄວາມໝັ້ນຄົງຂອງເຂື່ອນ; ພ້ອມທັງນໍາພານັກສຳມະນາເຮັດແບບຝຶກຫັດ ໃນການຄິດໄລ່ ແລະ ອອກແບບໂຕເຂື່ອນ ສຳລັບເຂື່ອນດິນຖົມ.
ມື້ທີ 2: ໄດ້ຮຽນຮູ້ກ່ຽວກັບການວິເຄາະ, ວິໄຈ ຄຸນສົມບັດຕ່າງໆ ຂອງວັດສະດຸ (ນ້ຳ, ຫີນ, ຊາຍ, ຊີມັງ, ເຫຼັກ ແລະ ອື່ນໆ), ກວດສອບອັດຕາສ່ວນປະສົມຄອນກຼີດ (ເຂື່ອນ RCC) ແລະ ເຕັກນິກໃນການກໍ່ສ້າງເຂື່ອນ RCC ໃຫ້ມີຄວາມໝັ້ນຄົງ, ປອດໄພ ແລະ ນຳໃຊ້ໄດ້ຍາວນານ, ໂດຍອີງຕາມການຢັ້ງຢືນຈາກມາດຕະຖານສາກົນ. ຜ່ານການຝຶກອົບຮົມທັງສອງມື້ ທາງຊ່ຽວຊານ ກໍ່ໄດ້ນຳສະເໜີບບາງບົດຮຽນ ແລະ ການກໍ່ສ້າງບາງໂຄງການ ຂອງປະເທດສະວິດເຊີແລນມາແລກປ່ຽນບົດຮຽນ, ພ້ອມທັງນໍາພານັກສຳມະນາເຮັດແບບຝຶກຫັດໃນຫຼາຍໆແບບ ເພື່ອເປັນພື້ນຖານໃນການຈັດຕັ້ງປະຕິບັດ ໃນບັນດາໂຄງການ ໃນ ສປປ ລາວ, ພ້ອມທັງໃຫ້ຄຳແນະນຳ-ແນວທາງ, ການແລກປ່ຽນບົດຮຽນ ແລະ ວິທີການແກ້ໄຂ ໃນອານາຄົດ.
ເພື່ອນຳຂໍ້ມູນໄປວິເຄາະ ແລະ ອອກແບບໂຕເຂື່ອນໃຫ້ເໝາະສົມກັບຂໍ້ມູນການວິເຄາະທາງດ້ານທໍລະນີ ໃນຈຸດທີ່ຕັ້ງດັ່ງກ່າວ, ພ້ອມທັງຝຶກປະຕິບັດຕົວຈິງໃຫ້ພະນັກງານ ກປພ ໄດ້ລົງຢ້ຽມຢາມ ແລະ ແລກປ່ຽນບົດຮຽນຢູ່ໂຄງການເຂື່ອນໄຟຟ້າ ນ້ຳລີກ 1/2, ເພື່ອແລກປຽນບົດຮຽນ-ປະສົບການ ຄວາມປອດໄພຂອງເຂື່ອນ ກັບພະນັກງານປະຈໍາໂຄງການ; ຮັບປະກັນໃນການຈັດຕັ້ງປະຕິບັດໂຄງການ ໃຫ້ໄດ້ຮັບໝາກຜົນ ແລະ ບັນລຸຕາມແຜນການທີ່ໄດ້ວາງໄວ້, ຊຸດຝຶກອົບຮົມແມ່ນໄດ້ປິດລົງດ້ວຍຜົນສຳເລັດຢ່າງຈົບງາມ.
ຂ່າວ: ກົມຄຸ້ມຄອງຄວາມປອດໄພອຸສາຫະກໍາພະລັງງານ
ພາບ: ສົມສະນຸກ
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
