ລັດ​ວິ​ສາ​ຫະ​ກິດ​ຖື​ຮຸ້ນ​ລາວ (ລ​ຮ​ລ) ປະ​ຕິ​ບັດພັນທະອາກອນ ເຂົ້າ​ງົບ​ປະ​ມານ​ໃຫ້ ລັດ ຈຳ​ນວນ 38 ຕືກວ່າ​ກີບ

ໃນຕອນເຊົ້າຂອງວັນທີ 23 ທັນວາ 2021 ຢູ່ທີ່ກົມສ່ວຍສາອາກອນ ກະຊວງການເງິນ ໄດ້ມີພິທີມອບ-ຮັບອາກອນລາຍໄດ້ຈາກຜົນປະກອບການດໍາເນີນທຸລະກິດ ຂອງ ລັດວິສາຫະກິດຖືຮຸ້ນລາວ (ລຮລ) ປະຈໍາປີ 2021 ຈໍານວນ 38.545.456.609 ກີບ. ຕາງ​ໜ້າ ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ກ່າວມອບໂດຍ ທ່ານ ມານະສິນ ວົງໄຊ ຜູ້ອໍານວຍການ ລັດວິສາຫະກິດຖືຮຸ້ນລາວ ແລະ ໃຫ້​ກຽດ​ເຂົ້າ​ຮັບ​ຂອງ ທ່ານ ໄພທູນ ທ່ຽງລະໄມ ຮອງຫົວໜ້າກົມສ່ວຍສາອາກອນ ໂດຍ​ຊ່ອງ​ໜ້າ​ການ​ເຂົ້າ​ຮ່ວມ​ເປັນ​ສັກ​ຂີ່​ພິ​ຍານ​ຂອງ ທ່ານ ສົມພິດ ແກ້ວວິຈິດ ຫົວໜ້າກົມທຸລະກິດພະລັງງານ, ກະຊວງພະລັງງານ ແລະ ບໍ່ແຮ່, ຮອງປະທານສະພາບໍລິຫານລັດ​ວິ​ສາ​ຫະ​ກິດ​ຖື​ຮຸ້ນ​ລາວ ແລະ ທ່ານ ທໍາມະລົດ ຣາຊະພົນ ຮັກສາການຫົວໜ້າກົມ ສວຍ​ສາ​ອາ​ກອນ, ກະ​ຊວງ ການ​ເງິນ. ນອກ​ຈາກນີ້​, ຍັງ​ມີ​ບັນ​ດາ ທ່ານ ຮອງ​ຜູ້​ອຳ​ນວຍ​ການ ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ພ້ອມດ້ວຍພະ​ນັກ​ງານ​ຂອງ​ທັງ​ສອງ​ຝ່າຍເຂົ້າ​ຮ່ວມ.

ທ່ານ ມານະສິນ ວົງໄຊ ຜູ້ອໍານວຍການ ລັດ​ວິ​ສາ​ຫະ​ກິດ​ຖື​ຮຸ້ນລາວ​ ກ່າວ​ວ່າ: ການມອບອາກອນລາຍໄດ້ລ່ວງໜ້າ ໃນໄລຍະ 6 ເດືອນຕົ້ນປີ 2021 ຈໍານວນ 1 ຕື້ກີບ ແລະ 6 ເດືອນທ້າຍປິ ຈໍານວນ 37,54 ຕື້ກ່ວາກີບ, ສະແດງໃຫ້ເຫັນເຖິງຄວາມເອົາໃຈໃສ່ຢ່າງເຂັ້ມງວດ ຂອງຄະນະຜູ້ບໍລິຫານຂອງ ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ໃນການປະຕິບັດພັນທະມອບອາກອນເຂົ້າງົບປະມານລັດ ໂດຍສອດຄ່ອງຕາມກົດໝາຍ ແລະ ລະ​ບຽບ​ການ​ທີ່​ກ່ຽວ​ຂ້ອງ. ທ່ານ ລາຍ​ງານໃຫ້ຮູ້ຕື່ມວ່າ ໃນປີ 2021 ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ສາມາດປະຕິບັດພັນທະຕາມສັນຍາຈ່າຍຊໍາລະຕົ້ນທຶນເງິນກູ້ຢືມ ແລະ ດອກເບັ້ຍ ໃຫ້ກະຊວງການເງິນ ໄດ້ທັງໝົດ 42,41 ລ້ານ ໂດລາສະຫະລັດ. ສໍາລັບປີ 2022 ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ຈະມີລາຍຮັບຈາກການດໍາເນີນທຸລະກິດເພີ້ມຂຶ້ນຫຼາຍກ່ວາເກົ່າ ແລະ ຈະສາມາດມອບພັນທະອາກອນເຂົ້າງົບປະມານລັດໄດ້ຫຼາຍຂຶ້ນ.

ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ໄດ້ຮັບການສ້າງຕັ້ງຂຶ້ນໃນວັນທີ 23 ກຸມພາ 2005, ຊຶ່ງເປັນຫົວໜ່ວຍທຸລະກິດໜຶ່ງຂອງລັດທີ່ຂຶ້ນກັບກະຊວງພະລັງງານ ແລະ ບໍ່ແຮ່ ໂດຍມີກະຊວງການເງິນເປັນເຈົ້າຂອງທຶນ 100%. ປະຈຸບັນ  ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ໄດ້ຮັບມອບໝາຍຈາກລັດຖະບານໃຫ້ເຂົ້າຮ່ວມຖືຮຸ້ນໃນ 4 ໂຄງການ, ຄື: ໂຄງການໄຟຟ້ານໍ້າເທີນ 2 (ຖືຮຸ້ນ 25%), ໂຄງການໄຟຟ້າຄວາມຮ້ອນຫົງສາ (ຖືຮຸ້ນ ພາກໂຮງໄຟຟ້າ 20% ແລະ ພາກບໍ່ແຮ່ 25%), ໂຄງການໄຟຟ້າເຊປຽນ-ເຊນໍ້ານ້ອຍ (ຖືຮຸ້ນ 24%) ແລະ ໂຄງການໄຟຟ້ານໍ້າງຽບ 1 (ຖືຮຸ້ນ 25%). ນອກຈາກນັ້ນ ລັດ​ວິ​ສາ​ຫະ​ກິດ​ຖື​ຮຸ້ນ​ລາວ ຍັງໄດ້ຮັບມອບໝາຍໃຫ້ດໍາເນີນທຸລະກິດຈໍາໜ່າຍຂີ້ເທົ່າລອຍ ແລະ ຢິບຊໍາ ໃນໂຄງການໄຟຟ້າຄວາມຮ້ອນຫົງສາ ຕື່ມອີກ.

 

ແຫຼ່ງ​ຂໍ້​ມູນ: ລັດ​ວິ​ສາ​ຫະ​ກິດ​ຖື​ຮຸນ​ລາວ

ຮຽບ​ຮຽງ​ຂ່າວ: ຄຳ​ແສງ ແກ້ວ​ປະ​ເສີດ