ໃນວັນທີ 14 ພຶດສະພາ 2024 ທີ ໂຮງແຮມ ຄຣາວພາຊາ ນະຄອນຫຼວງວຽງຈັນ ຜ່ານມາໄດ້ມີ ກອງປະຊຸມ ການປະກວດລາງວັນອາຊຽນ ກ່ຽວກັບການປະຢັດພະລັງງານໃນໂຮງງານ ແລະ ອາຄານ ໂດຍການເປັນປະທານ ທ່ານ ຄຳໝັ້ນ ສໍປະເສີດ ຮອງຫົວໜ້າກົມສົ່ງເສີມ ແລະ ປະຢັດພະລັງງານ, ກະຊວງ ພະລັງງານ ແລະ ບໍ່ແຮ່.
ຈຸດປະສົງຂອງກອງປະຊຸມ ເພື່ອສະຫຼຸບຜົນຄະແນນ ແລະ ຢັ້ງຢືນການໃຫ້ຄະແນນ ຂອງຄະນະກໍາມະການຈາກບັນດາປະເທດອາຊຽນ ທັງໝົດ 10 ປະເທດ ຕໍ່ກັບໂຄງການທີ່ສົ່ງເຂົ້າຊິງລາງວັນການປະຢັດ ແລະ ອະນຸລັກພະລັງງານ ໃນພາກໂຮງງານ ແລະ ອາຄານ ແຕ່ລະປະເພດ ປະຈໍາປີ 2024.
ກອງປະຊຸມດັ່ງກ່າວ ໄດ້ຜ່ານຜົນການໃຫ້ຄະແນນບັນດາໂຄງການປະຢັດ ແລະ ອະນຸລັກພະລັງງານ ສໍາລັບໂຮງງານ ແລະ ອາຄານ. ໃນພາກອາຄານປະກອບມີ 3 ປະເພດຄື: ອາຄານປະຢັດພະລັງງານ, ອາຄານສີຂຽວ, ການບໍລິຫານພະລັງງານໃນອາຄານ. ສໍາລັບ ພາກໂຮງງານມີ 2 ປະເພດ ອິງຕາມຂະໜາດເນື້ອທີ່ ແລະ ການຊົມໃຊ້ພະລັງງານ ປະຈໍາປີ. ໃນປີນີ້ ມີໂຄງການທີ່ສົ່ງເຂົ້າຊິງລາງວັນທັງໝົດ 66 ໂຄງການ.
ນອກຈາກນັ້ນ, ກອງປະຊຸມດັ່ງກ່າວ ກໍໄດ້ສະເໜີ ແລະ ແລກປ່ຽນຄໍາເຫັນຈາກບັນດາປະເທດອາຊຽນ ຕໍ່ກັບ ແຜນຈັດຕັ້ງປະຕິບັດການປະກວດລາງວັນ ການປະຢັດ ແລະ ອະນຸລັກພະລັງງານ ໃນອາຄານ ແລະ ໂຮງງານ ປີ 2025 ທີ່ຈະຈັດຂຶ້ນໃນປະເທດ ມາເລເຊຍ.
ຈາກນັ້ນ, ກອງປະຊຸມ ໄດ້ຮັບຟັງຄໍາຄິດຄໍາເຫັນຕໍ່ບົດໂຄງການຂອງແຕ່ລະປະເທດ ຈາກຄະນະກໍາມະການ ບັນດາປະເທດອາຊຽນ ພ້ອມທັງຢັ້ງຢືນການໃຫ້ຄະແນນແຕ່ລະໂຄງການກອງປະຊຸມໄດ້ດຳເນີນໄປ ຕາມຈຸດປະສົງ ທີ່ໄດ້ກໍານົດໄວ້ ໃນການແລກປ່ຽນ ຄວາມຄິດ-ຄວາມເຫັນ ກ່ຽວກັບ ການປະຢັດ ແລະ ອະນຸລັກພະລັງງານໃນອາຄານ ແລະ ໂຮງງານ. ໃນນັ້ນ, ກອງປະຊຸມດັ່ງກ່າວ ໄດ້ກະກຽມກໍານົດແຜນຈັດຕັ້ງປະຕິບັດການປະກວດລາງວັນ ການປະຢັດ ແລະ ອະນຸລັກພະລັງງານ ໃນອາຄານ ແລະ ໂຮງງານ ປີ 2025 ທີ່ຈະຈັດຂຶ້ນໃນປະເທດ ມາເລເຊຍ.
