ສາຍເຫດຕົ້ນຕໍ່ ທີ່ພາໃຫ້ເກີດໄຟຕົກ, ໄຟມອດ, ໄຟບໍ່ພໍ, ໄຟໄໝ້ສາຍໄຟ ແລະ ໝໍ້ແປງ

ຕໍ່ຄວາມສົນໃຈຂອງສັງຄົມທີ່ວ່າ: ເປັນຫຍັງເວລາເກີດມີໄຟຕົກ-ໄຟມອດ ການແກ້ໄຂບັນຫາຈື່ງໃຊ້ເວລາດົນ. ທ່ານ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ໄດ້ອະທິບາຍຊີ້ແຈງວ່າ: ດັ່ງທີ່ບັນດາທ່ານ ໄດ້ຮັບຊາບນຳກັນແລ້ວວ່າ ເຫດການໄຟຕົກ-ໄຟມອດ ແມ່ນມີຫຼາຍສາເຫດ ທັງໃນໂຕ ແລະ ນອກໂຕ ແຕ່ສາຍເຫດຕົ້ນຕໍ່ທີ່ພາໃຫ້ການແກ້ໄຂບັນຫາຈື່ງໃຊ້ເວລາດົນ ແມ່ນຍ້ອນເກີດຈາກປັດໃຈພາຍນອກກະທົບໃສ່ລະບົບຂອງໄຟຟ້າລາວ ໂດຍສະເພາະ ເຫດການໄພພິບັດທາງທຳມະຊາດ ເຊັ່ນ: ລົມແຮງ, ຝົນຕົກ, ຟ້າຜ່າ, ຕົ້ນໄມ້ຫັກລົ້ມທັບສາຍໄຟ, ສາຍໄຟຂາດຫຼາຍຈຸດ, ເສົາຫັກ-ເສົາລົ້ມ, ອຸປະກອນເປ່ເພ ເສຍຫາຍຈຳນວນຫຼາຍ ຕໍ່ກັບເຫດການດັ່ງກ່າວ ອາດໃຊ້ເວລາດົນພໍສົມຄວນໃນການສ້ອມແປງແກ້ໄຂ ເກັບກູ້ລະບົບໃຫ້ສາມາດກັບມາສະ ໜອງໄຟເປັນປົກກະຕິ.
ທ່ານ ຜູ້ອຳນວຍການໃຫຍ່ ໄດ້ກ່າວຕື່ມວ່າ: ເພື່ອແກ້ໄຂບັນຫາດັ່ງກ່າວ ໃນຕໍ່ໜ້າ ລັດວິສາຫະກິດໄຟຟ້າລາວ ຈະສຸມໃສ່ບາງຈຸດດັ່ງນີ້:
1) ສຸມໃສ່ວຽກງານການປັບປຸງລະບົບຈໍາໜ່າຍໃນຂອບເຂດທົ່ວປະເທດ ໂດຍສະເພາະ ນະຄອນຫຼວງວຽງຈັນ ໃຫ້ມີຄວາມຮັບປະກັນສູງຂຶ້ນ ເພື່ອຫຼຸດຜ່ອນບັນຫາແຮງດັນຕົກ (ໄຟບໍ່ພໍ) ໂດຍແນໃສ່ການປັບປຸງປ່ຽນສາຍຈາກສາຍຂະໜາດນ້ອຍ ເປັນ ສາຍຂະໜາດໃຫຍ່, ເສີມໝໍ້ແປງໄຟຟ້າ ເພື່ອໃຫ້ແທດເໝາະກັບສະພາບຂອງການຊົມໃຊ້ໄຟຟ້າຕົວຈິງ ໃນແຕ່ລະເຂດ ເຊິ່ງໃນປີ 2023 ຜ່ານມາໄດ້ສໍາເລັດການເສີມໝໍ້ແປງໄຟຟ້າ ລວມຈໍານວນທັງໝົດ 993 ໜ່ວຍ, ລວມກໍາລັງຕິດຕັ້ງໝໍ້ແປງໄຟຟ້າ ເພີ່ມຂຶ້ນທັງໝົດ 43.359 kVA ເພີ່ມຂຶ້ນຫຼາຍກວ່າ 50% ເມື່ອທຽບໃສ່ການຈັດຕັ້ງປະຕິບັດ ໃນປີ 2022;
2) ສຳເລັດການຄົ້ນຄວ້າຮ່ວມກັບ ພາກສ່ວນກ່ຽວຂ້ອງຂອງລັດ ແລະ ບັນດາບໍລິສັດໂທລະຄົມຕ່າງໆ ໃນການອອກລະບຽບການເກາະຫ້ອຍສາຍໂທລະຄົມ ແລະ ອຸປະກອນສື່ສານ ໃສ່ລະບົບຕາຂ່າຍໄຟຟ້າ ໃຫ້ເປັນໄປຕາມມາດຕະຖານ ເພື່ອຮັບປະກັນຄວາມປອດໄພ ແລະ ຫຼີກລ່ຽງບັນຫາການເກີດອັກຄີໄພຄືໃນໄລຍະຜ່ານມາ.
3) ເລັ່ງຄົ້ນຄວ້າອອກລະບຽບການ ໃນການກໍານົດມາດຕະຖານການຕິດຕັ້ງສະຖານີສາກລົດໄຟຟ້າ (EV) ສໍາລັບທີ່ຢູ່ອາໄສ, ອາຄານທີ່ພັກ ແລະ ສໍານັກງານອົງການຕ່າງໆ ເພື່ອກໍານົດເປັນຫຼັກການໃນການຈັດຕັ້ງປະຕິບັດໃຫ້ມີຄວາມສະດວກໃນການໃຊ້ງານ ເປັນໄປຕາມມາດຕະຖານສາກົນ;
4) ປັບປຸງລະບົບຈຳໜ່າຍໄຟຟ້າ ໃນຂອບເຂດທົ່ວປະເທດ ໂດຍສະເພາະ ນະຄອນຫຼວງວຽງຈັນ ໃຫ້ມີຄວາມຮັບປະກັນ ຫຼຸດຜ່ອນບັນຫາໄຟຕົກ-ໄຟມອດ ໃຫ້ຫຼຸດໜ້ອຍຖອຍລົງ.