ພິທີມອບ-ຮັບອຸປະກອນດັ່ງກ່າວ ໄດ້ຈັດຂຶ້ນໃນວັນທີ 23 ພຶດສະພາ 2024 ຜ່ານມານີ້, ຢູ່ກະຊວງພະລັງງານ ແລະ ບໍ່ແຮ່ ຕາງໜ້າກະຊວງພະລັງງານ ແລະ ບໍ່ແຮ່ ກ່າວຮັບໂດຍ ທ່ານ ນາງ ສັນຕິສຸກ ພິມພະຈັນ ຮັກສາການແທນຫົວໜ້າກົມນະໂຍບາຍ ແລະ ແຜນພະລັງງານ ແລະ ທ່ານ ນາງ ວົງດາລອນ ວົງສີແກ້ວ ຜູ້ຮັບຜິດຊອບຂະແຫນງພະລັງງານ ຂອງ ອົງການພັດທະນາສາກົນຂອງສະຫະລັດອາເມລິກາ ປະຈໍາ ສ ປປ ລາວ ເປັນຜູ້ກ່າວມອບ ໂດຍຊ່ອງໜ້າການເຂົ້າຮ່ວມເປັນສັກຂີພິຍານຂອງ ພະນັກງານທັງສອງຝ່າຍ.
ອຸປະກອນທີ່ນຳມາມອບຄັ້ງນີ້ປະກອບມີ: ໃບອະນຸຍາດນຳໃຊ້ຊອບແວ, ການວາງແຜນລະບົບໄຟຟ້າ ຫຼື Plexos software license ແລະ ອຸປະກອນໄອທີອື່ນໆ ໃຫ້ກົມນະໂຍບາຍ ແລະ ແຜນພະລັງງານ ແລະ ລັດວິສາຫະກິດໄຟຟ້າລາວ ໄດ້ນຳໃຊ້ເຂົ້າໃນການວາງແຜນການພັດທະນາພະລັງງານໄຟຟ້າຂອງ ສປປລາວ ລວມມູນຄ່າທັງໝົດ 900,000 ກວ່າໂດລາສະຫະລັດ ພາຍໃຕ້ຂອບການຮ່ວມມືດ້ານພະລັງງານ ລະຫວ່າງ ຍີ່ປຸ່ນ – ສ. ອາເມລິກາ-ປະເທດແມ່ນໍ້າຂອງ (Japan-U.S-Mekong Power Partnership – JUMPP). Plexos ແມ່ນ ເຄື່ອງມືວິເຄາະ ແລະ ຈຳລອງ ທີ່ນໍາໜ້າ ສຳລັບ ການວາງແຜນລະບົບພະລັງງານ ແລະ ໄດ້ຖືກນຳໃຊ້ ໃນປະເທດເພື່ອນບ້ານ ເຊັ່ນ: ສສ ຫວຽດນາມ ແລະ ປະເທດໄທ. ເຄື່ອງມືດັ່ງກ່າວ ສາມາດວິເຄາະ ການເຊື່ອມຕໍ່ກັບແຫຼ່ງ ພະລັງງານທົດແທນ ເປັນຕົ້ນ ພະລັງງານລົມ ແລະ ແສງຕາເວັນ, ການເຊື່ອມຕໍ່ກັບສະຖານີສາກລົດໄຟຟ້າ.
ບໍ່ພຽງ ແຕ່ເພີ່ມຄວາມຫນ້າເຊື່ອຖື ຂອງລະບົບໄຟຟ້າເທົ່ານັ້ນ ແຕ່ຍັງສາມາດເພີ່ມ ປະສິດທິພາບ ໃນການການຜະລິດໄຟຟ້າ ເພື່ອໃຫ້ຕອບສະໜອງກັບຄວາມຕ້ອງການຕົວຈິງໄດ້. ນອກຈາກນັ້ນ, Plexos ຍັງສາມາດນຳໃຊ້ ເຂົ້າໃນການໃນການ ວິເຄາະຕະຫຼາດພະລັງງານ ເພື່ອຊ່ວຍໃຫ້ ສປປ ລາວ ສາມາດນຳໃຊ້ ຂໍ້ມູນການວິເຄາະ ເຂົ້າໃນການເຈລະຈາ ສັນຍາການຊື້ຂາຍພະລັງງານ, ອຳນວຍຄວາມສະດວກ ໃນການສົ່ງອອກພະລັງງານສະອາດ ແລະ ດຶງດູດການລົງທຶນໃໝ່.
ນອກຈາກນັ້ນ ອົງການ USAID ໄດ້ສະໜັບສະໜູນ ພະນັກງານວິຊາການຈາກ ກະຊວງພະລັງງານ ແລະ ບໍ່ແຮ່ ແລະ ລັດວິສາຫະກິດໄຟຟ້າລາວ ເຂົ້າຮ່ວມການສຳມະນາ Xcelerate 2024 ທີ່ເມືອງເມລເບີນ ປະເທດອົດສະຕາລີ ເພື່ອຝຶກອົບຮົມການນຳໃຊ້ເຄື່ອງມື ແລະ ແລກປ່ຽນບົດຮຽນກັບຜູ້ນຳໃຊ້ຈາກຫຼາຍປະເທດ. ໃນຕໍ່ໜ້າ ອົງການ USAID ມີແຜນ ສືບຕໍ່ ສ້າງຄວາມອາດສາມາດໃຫ້ແກ່ ພະນັກງານວິຊາການ ໃນການນຳໃຊ້ເຄື່ອງມືດັ່ງກ່າວ ເຂົ້າໃນການປັບຄວາມສົມດູນ ການຜະລິດພະລັງງານໄຟຟ້ານໍ້າຕົກ ແລະ ໂຄງລ່າງພື້ນຖານລະບົບພະລັງງານທີ່ທັນສະໄໝ ເພື່ອຕອບສະຫນອງຄວາມຕ້ອງການ ການນຳໃຊ້ໄຟຟ້າ ພາຍໃນ ແລະ ຕ່າງປະເທດ.
ພາບ ແລະ ແຫຼ່ງຂ່າວ: ກົມນະໂຍບາຍ ແລະ ແຜນພະລັງງານ
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
