ໃນວັນທີ 28 ຕຸລາ 2022 ທີ່ຜ່ານມາ, ກະຊວງພະລັງງານ ແລະ ບໍ່ແຮ່ ແລະ ບໍລິສັດ ວິສະວະກຳພະລັງງານໄຟຟ້າຄຸນຫມິງ ຂອງ ສປ ຈີນ (Power China Kunming Engineering Corporation Limited ຫຼື KHIDI) ໄດ້ຮ່ວມກັນລົງນາມເຊັນບົດບັນທຶກຄວາມເຂົ້າໃຈ (MOU) ວ່າດ້ວຍໂຄງການຮ່ວມມືດ້ານສູນການສຶກພະລັງງານສີຂຽວ (Green Energy Research Center in Laos). ບົດບັນທຶກຄວາມເຂົ້າໃຈສະບັບນີ້ ສ້າງຂຶ້ນໂດຍມີຈຸດປະສົງ ເພື່ອສະເໜີຂໍງົບປະມານນໍາລັດຖະບານ ສປ ຈີນ ເພື່ອມາສ້າງຕັ້ງສູນຄົ້ນຄ້ວາ ແລະ ພັດທະນາພະລັງງານສີຂຽວຂອງ ສປປ ລາວ (The National Green Energy Research and Development Center of Laos). ສູນການສຶກສາດັ່ງກ່າວ ຈະຊ່ວຍໃຫ້ຂະແໜງການສາມາດວາງແຜນ ແລະ ຈັດສັນພະລັງງານໄຟຟ້າ ເຊື່ອມຕໍ່ເຂົ້າລະບົບ ເພື່ອຮັບໃຊ້ພາຍໃນປະເທດ ຕາມການຂະຫຍາຍຕົວຂອງອຸດສາຫະກຳ ແລະ ຄວາມຕ້ອງການຊົມໃຊ້ພະລັງງານໄຟຟ້າໃນແຕ່ລະໄລຍະໃຫ້ມີປະສິດທິພາບ ແລະ ປະສິດທິຜົນສູງ. ຕາງໜ້າໃຫ້ກະຊວງພະລັງງານ ແລະ ບໍ່ແຮ່ ລົງນາມໂດຍ ທ່ານ ປອ ຈັນສະແຫວງ ບຸນຍົງ ຫົວໜ້າກົມນະໂຍບາຍ ແລະ ແຜນພະລັງງານ ແລະ ທ່ານ Xu Anquan ຫົວໜ້າຜຸ້ຕາງໜ້າຫ້ອງການ KHIDI ປະຈໍາ ສປປ ລາວ ຕາງໜ້າບໍລິສັດ ວິສະວະກຳພະລັງງານໄຟຟ້າຄຸນຫມິງ ຂອງ ສປ ຈີນ ໂດຍຊ່ອງໜ້າການເຂົ້າຮ່ວມເປັນສັກຂີພິຍານຂອງ ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງ ພ້ອມດ້ວຍຜູ້ຕາງໜ້າຈາກບັນດາກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງ.
