ໃນໂອກາດພົບປະ ແລະ ເຂົ້າຢ້ຽມຂ່ຳນັບ ທ່ານ ປອ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະ ບໍ່ແຮ່ ເມື່ອວັນທີ 28 ທັນວາ 2021 ທີ່ຜ່ານມານີ້, ທ່ານ ເຄວິນ ຫູ ປະທານບໍລິສັດ ຫົວເຫວີຍ ເຕັກໂນໂລຊີ (ລາວ) ຈຳກັດ ກ່າວວ່າ: ບໍລິສັດ ຫົວເຫວີຍ ເປັນບໍລິສັດໜຶ່ງທີ່ມີທ່າແຮງນຳໜ້າທາງດ້ານເຕັກໂນໂລຊີ ເພື່ອໃຫ້ການບໍລິການທາງດ້ານໂທລະຄົມມະນາຄົມໃນພາກພື້ນ ແລະ ໃນໂລກ. ສະເພາະຢູ່ ສປປລາວ ຜ່ານມາບໍລິສັດ ກໍ່ໄດ້ສະໜອງອຸປະກອນດ້ານໂທລະຄົມມະນາຄົມ ແລະ ບໍລິການແກ່ຜູ້ໃຫ້ບໍລິການໂທລະຄົມມະນາຄົມຂອງລາວມາຕັ້ງແຕ່ ປີ 1998 ແລະ ປັດຈຸບັນເປັນຜູ້ຈັດຫາອຸປະກອນໂທລະຄົມມະນາຄົມຊັ້ນນຳໃນລາວ. ພ້ອມກັນນີ້, ຍັງເປັນຜູ້ສະໜັບສະໜູນການປ່ຽນແປງທາງດ້ານດິຈີຕ໋ອນຂອງລັດຖະບານລາວ ແລະ ອົງກອນຕ່າງໆ ເພື່ອປັບປຸງປະສິດທິພາບ ແລະ ຂັບເຄື່ອນການພັດທະນາໄລຍະຍາວຕື່ມອີກ.
ຜະລິດຕະພັນໂທລະສັບ ຂອງ ຫົວເຫວີຍ ຊ່ວຍໃຫ້ຄົນລາວ ໃຊ້ອິນເຕີເນັດ ແລະ ເສີມສ້າງການສື່ສານໃນຊີວິດປະຈຳວັນໄດ້ດີຂື້ນ. ບໍລິສັດ ຫົວເຫວີຍ ໄດ້ສ້າງຕັ້ງ ບໍລິສັດ ຫົວເຫວີຍ ເທັກໂນໂລຢີລາວ ທີ່ຖືຫຸ້ນທັງໝົດໃນລາວ ໂດຍມີພະນັກງານຫຼາຍກວ່າ 150 ຄົນ ໃນນີ້ພະນັກງານກວມ 70% ແມ່ນເປັນຄົນໃນພື້ນທີ່ ໂດຍໄດ້ຮັບການຝຶກອົບຮົມດ້ານ ICT ໃຫ້ກັບຄົນລາວຫຼາຍກວ່າ 3.000 ຄົນ. ໃນປີ 2020-2021 ໃນຊ່ວງໄລຍະການແຜ່ລະບາດຂອງພະຍາດປອດອັກເສບສາຍພັນໃໝ່ ຫົວເຫວີຍ ໄດ້ມີສ່ວນຮ່ວມໃນການບໍລິຈາກລະບົບວິດີໂອການປະຊຸມທາງໄກ ໃຫ້ຫຼາຍພາກສ່ວນຂອງລັດຖະບານ ສປປລາວ ເປັນຕົ້ນ: ກະຊວງສາທາສະນະສຸກ, ກະຊວງ ເຕັກໂນໂລຊີ ແລະ ການສື່ສານ, ກະຊວງການຕ່າງປະເທດ, ຫ້ອງວ່າການນະຄອນຫຼວງວຽງຈັນ, ກະຊວງ ຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ. ພິເສດໃນງານພິທີເປີດການນຳໃຊ້ເທາງລົດໄຟລາວ-ຈີນ ບໍລິສັດ ຫົວເຫວີຍ ກໍໄດ້ສະໜອງອຸປະກອນລະບົບວິດີໂອການປະຊຸມທາງໄກ ເພື່ອຮັບໃຊ້ການພົບປະ ລະຫວ່າງ ຜູ້ນຳລາວ-ຈີນ. ນອກຈາກນັ້ນ, ໃນການຫັນສູ່ດິຈິຕ໋ອນໃນຫຼາຍຂະແໜງການ, ຫົວເຫວີຍກໍ່ເປັນຜູ້ສະໜອງປຸປະກອນໃນດ້ານພະລັງງານດິຈິນຕ໋ອນ, ບໍ່ວ່າຈະເປັນ ປໍ້າສາກລົດໄຟຟ້າ, ລະບົບຄວບຄຸມພະລັງງານໄຟຟ້າແສງອາທິດ ແລະ ອື່່ນ ທີ່ຈະມາຊ່ວຍ ສປປ ລາວ ຫັນເຂົ້າສູ່ເສດຖະກິດດິຈິຕ໋ອນຢ່າງເຕັມໂຕ.
ທ່ານ ລັດຖະມົນຕີ ສະແດງຄວາມຂອບໃຈຕໍ່ ທ່ານ ປະທານບໍລິສັດ ຫົວເຫວີຍ ທີ່ໄດ້ສະໜັບສະໜູນ ແລະ ຊຸກຍູ້ການຫັນເປັນເສດຖະກິດດີຈີຕ໋ອນ ແລະ ລັດຖະບານເອເລັກໂຕຣນິກຂອງ ລັດຖະບານລາວ ໂດຍສະເພາະການນຳໃຊ້ລະບົບດີຈີຕ໋ອນເຂົ້າໃນການຄວບຄຸມ, ບໍລິຫານຈັດການພະລັງງານ ຖືວ່າເປັນກົນໄກທີ່ມີປະສິດທິພາບ, ມີປະສິດທິຜົນສູງ ທັງຮັບປະກັນຄວາມປອດໄພຕື່ມອີກ. ພ້ອມກັນນີ້, ທ່ານ ລັດຖະມົນຕີ ຍັງສະແດງຄວາມຍິນດີ, ຕ້ອນຮັບ ແລະ ສະໜັບສະໜູນ ຕໍ່ແຜນການຂະຫຍາຍທຸລະກິດຂອງບໍລິສັດ ຫົວເຫວີຍ ໃນການສະໜອງອຸປະກອນ ຫຼື ລະບົບຄວບຄຸມພະລັງງານໄຟຟ້າ ຢູ່ ສປປລາວ.
ໂດຍ: ຄຳແສງ ແກ້ວປະເສີດ
