ສະຫາຍ ນາງ ຄອນສະຫວັນ ສະກຸນຄູ ໄດ້ຮັບການເລືອກຕັ້ງເປັນປະທານ ໜ່ວຍກຳມະບານຮາກຖານ ກົມຄຸ້ມຄອງພະລັງງານ ຜູ່ໃໝ່

ກອງປະຊຸມໃຫຍ່ຄັ້ງນີ້, ໄດ້ຕົກລົງເຫັນດີ ແລະ ຮັບຮອງເອົາຫຼາຍບັນຫາທີ່ສຳຄັນ ເຊິ່ງເປັນພື້ນຖານໃຫ້ແກ່ການຊີ້ນຳ-ນຳພາວຽກງານໜ່ວຍກຳມະບານຮາກຖານ ກົມຄຸ້ມຄອງພະລັງງານ ເປັນຕົ້ນແມ່ນ:
1. ກອງປະຊຸມໄດ້ຮັບຟັງການລາຍງານບົດລາຍງານການເມືອງ ທັງສອງພາກ ທີ່ສະເໜີໂດຍ ສະຫາຍ ທຳມະນູນ ນາຄະວິດ, ຄະນະບໍລິຫານງານກຳມະບານກະຊວງ, ປະທານໜ່ວຍກໍາມະບານຮາກຖານ ກົມຄຸ້ມຄອງພະລັງງານ. ໃນບົດລາຍງານດັ່ງກ່າວ ໄດ້ຕີລາຄາຢ່າງພາວະວິໄສ ເຖິງຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ ໃນການເຄື່ອນໄຫວວຽກງານກຳມະບານຢູ່ພາຍໃນກົມຄຸ້ມຄອງພະລັງງານ. ໜ່ວຍກຳມະບານຮາກຖານກົມຄຸ້ມຄອງພະລັງງານ ເປັນໜຶ່ງໃນ 3 ອົງການຈັດຕັ້ງມະຫາຊົນ ພາຍໃຕ້ການຊີ້ນຳ-ນຳພາ ໂດຍກົງ ແລະ ຮອບດ້ານ ຂອງໜ່ວຍພັກກົມຄຸ້ມຄອງພະລັງງານ ແລະ ໜ່ວຍກຳມະບານຮາກຖານ ກົມຄຸ້ມຄອງພະລັງງານ ມີພາລະບົດບາດເປັນເສນາທິການໃຫ້ໜ່ວຍພັກກົມຄຸ້ມຄອງພະລັງງານ, ຄະນະກົມ ແລະ ຄະນະບໍລິຫານງານສະຫະພັນກຳມະບານກະຊວງ ໃນການເຕົ້າໂຮມຄວາມສາມັກຄີພາຍໃນກົມຄຸ້ມຄອງພະລັງງານ ໃຫ້ມີຄວາມປຶກແຜ່ນແໜ້ນໜາ, ຊ່ວຍເຫຼືອຮັກແພງເຊິ່ງກັນ ແລະ ກັນ; ຕິດຕາມ, ກໍ່ສ້າງ ແລະ ຝຶກຝົນຫຼໍ່ຫຼອມ ໃຫ້ກັບສະມາຊິກ ໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມຮູ້, ຄວາມສະມາດ ກາຍເປັນພະນັກງານ-ຫຼັກແຫຼ່ງ, ພະນັກງານຜູ້ສືບທອດຂອງພັກ. ປະຈຸບັນ ໜ່ວຍກຳມະບານຮາກຖານ ກົມຄຸ້ມຄອງພະລັງງານ ມີຄະນະ ໜ່ວຍ 3 ສະຫາຍ, ຍິງ 1 ສະຫາຍ; ມີສະມາຊິກກຳມະບານທັງໝົດ 31 ສະຫາຍ, ທີ່ເປັນພະນັກງານລັດຖະກອນທັງໝົດ 29 ສະຫາຍ, ຍິງ 6 ສະຫາຍ ໃນນັ້ນມີພະນັກງານຊ່ວຍວຽກ ຈຳນວນ 2 ສະຫາຍ, ຍິງ 1 ສະຫາຍ. ປະກອບມີ 5 ຈຸ ຄື: ຈຸພະແນກສັງລວມຂໍ້ມູນຂ່າວສານ, ຈຸພະແນກຄຸ້ມຄອງມາດຕະຖານ ແລະ ລະບຽບການ, ຈຸພະແນກຄຸ້ມຄອງໂຄງການພະລັງງານ, ຈຸພະແນກຄຸ້ມຄອງກິດຈະການພະລັງງານ ແລະ ຈຸພະແນກຄຸ້ມຄອງນ້ຳມັນເຊື້ອໄຟ. ຕະຫຼອດໄລຍະ 5 ປີທີ່ຜ່ານມາ ພາຍໃຕ້ການຊີ້ນໍາໂດຍກົງ ຂອງຄະນະຫນ່ວຍພັກກົມຄຸ້ມຄອງພະລັງງານ ແລະ ຄະນະບໍລິຫານງານສະຫະພັນກຳມະບານກະຊວງ, ໜ່ວຍກຳມະບານຮາກຖານກົມຄຸ້ມຄອງພະລັງງານ ພວກເຮົາໄດ້ເອົາໃສ່ໃຈປະກອບສ່ວນຢ່າງຫ້າວຫັນ, ອົດທົນ ແລະ ຢ່າງມີຫົວຄິດປະດິດສ້າງ ໃນການຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບຂອງຕົນ;