ລະຫວ່າງວັນທີ 25-26 ກໍລະກົດ 2024 ນີ້, ຢູ່ນະຄອນຫຼວງວຽງຈັນ ບັນດາປະເທດສະມາຊິກອາຊຽນ ແລະ ຄູ່ຮ່ວມພັດທະນາ ໄດ້ຈັດກອງປະຊຸມປຶກສາຫາລືລະດັບສູງ ພ້ອມກັນນີ້ ກໍ່ພ້ອມກັນແລກປ່ຽນບົດຮຽນກ່ຽວກັບການພັດທະນາພະລັງງານຢູ່ໃນພາກພື້ນທີ່ເປັນມິດກັບສິ່ງແວດລ້ອມ ຫຼື ພະລັງງານທີ່ມີກາກບອນຕໍ່າ ໂດຍແມ່ນກະຊວງພະລັງງານ ແລະ ບໍ່ແຮ່ ສປປລາວ ໄດ້ຮັບກຽດເປັນເຈົ້າພາບຈັດຂຶ້ນ. ກອງປະຊຸມຄັ້ງນີ້, ໄດ້ຮັບກຽດກ່າວເປີດກອງປະຊຸມຂອງ ທ່ານ ໂພໄຊ ໄຊຍະສອນ ລັດຖະມົນຕີກະຊວງກະຊວງພະລັງງານ ແລະ ບໍ່ແຮ່. ມີຜູ້ແທນຈາກ 10 ປະເທດອາຊຽນ, ປະເທດສັງເກດການ ແລະ ປະເທດຄູ່ຮ່ວມມື ພ້ອມດ້ວຍອົງການຈັດຕັ້ງສາກົນ ເຂົ້າຮ່ວມ.
ບັນຫາທີ່ນຳມາປຶກສາຫາລື ແລະ ຄົ້ນຄວ້າຮ່ວມກັນໃນຄັ້ງນີ້ມີຫຼາຍປະເດັ່ນ ທີ່ຕິດພັນກັບການວາງນະໂຍບາຍພັດທະນາພະລັງງານສະອາດຢູ່ໃນພາກພື້ນເປັນຕົ້ນແມ່ນ: ການນຳໃຊ້ຜົນປະໂຫຍດຈາກລະບົບສາຍສົ່ງໄຟຟ້າຂອງຊຽນ ເພື່ອຫຼຸດຜ່ອນການປ່ອຍກາກບອນໃນພາກອຸດສາຫະກຳພະລັງງານອາຊຽນ; ການວາງນະໂຍບາຍໄປສູ່ເສດຖະກິດກາກບອນຕໍ່າ ໃນແຜນແມ່ບົດການພັດທະນາພະລັງງານຢູ່ໃນພາກພື້ນອາຊຽນໃນຕໍ່ໜ້າ ແລະ ການກ້າວໄປສູ່ການຫັນປ່ຽນພະລັງງານກາກບອນຕໍ່າ ໂດຍສະເພາະແມ່ນໂອກາດ ທາງການເງິນ ແລະ ເຕັກໂນໂລຊີ ທີຜ່ານການຮ່ວມມືໃນຂອບອາຊຽນ.
ກອງປະຊຸມປຶກສາຫລືລະດັບສູງຂອງອາຊຽນ ແລະ ການສຳມະນາລະດັບພາກພື້ນ ກ່ຽວກັບນະໂບາຍພະລັງງານກາກບອນຕໍ່າ ຄັ້ງນີ້ ແມ່ນແນ່ໃສ່ການສ້າງໃຫ້ພາກພື້ນອາຊຽນກາຍເປັນພາກພື້ນທີມີການປ່ອຍກາກບອນຕໍ່າ ໂດຍສະເພາະແມ່ນການພັດທະນາໃນພາກອຸດສາຫະກຳພະລັງງານໄຟຟ້າ ເຊິ່ງປັດຈຸບັນ ກຳລັງຈັດຕັ້ງປະຕິບັດການຮ່ວມມືກັນຢ່າງມີປະສິດທິພາບ ມີປະສິດທິຜົນ.
ພາບ: ວຽງສະຫວັນ ປຣະດິດ
ຂ່າວ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
