ພິທີດັ່ງກ່າວໄດ້ຈັດຂຶ້ນຢ່າງຄຶກຄື້ນໃນຕອນບ່າຍວັນທີ 5 ສິງຫາ 2024 ຢູ່ຫ້ອງປະຊຸມໃຫຍ່ ລັດວິສາຫະກິດໄຟຟ້າລາວ ໂດຍໃຫ້ກຽດເຂົ້າຮ່ວມຂອງ ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່; ທ່ານ ນາງ ອາລີ ວົງໜໍ່ບຸນທຳ ກຳມະການສູນກາງພັກ, ເລຂາຄະນະພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີຄະນະພັກຮາກຖານ, ຄະນະໜ່ວຍພັກ, ບັນດາ ຄະນະບໍລິຫານງານສະຫະພັນແມ່ຍິງກະຊວງ, ຄະໜ່ວຍແມ່ຍິງ ພ້ອມດ້ວຍເອື້ອຍນ້ອງແມ່ຍິງອ້ອມຂ້າງກະຊວງເຂົ້າຮ່ວມຢ່າງຫຼວງຫຼາຍ.
ທ່ານ ນາງ ແສງເດືອນ ວົງອິນ ຄະນະພັກກະຊວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານກະຊວງ ໄດ້ກ່າວລາຍງານຕໍ່ພິທີວ່າ: ສະຫະພັນແມ່ຍິງກະຊວງໄດ້ເລີ່ມສ້າງຂະບວນການຕ້ອນຮັບ ແລະ ສະເຫຼີມສະຫຼອງວັນສ້າງຕັ້ງອົງການສະຫະພັນແມ່ຍິງລາວ ດ້ວຍການສ້າງຂະບວນການຊ່ວຍເຫຼືອສັງຄົມ ຮ່ວມກັບ ອົງການຈັດຕັ້ງຊາວໜຸ່ມ, ກໍາມະບານຂອງກະຊວງ ໃນການບໍລິຈາກເລືອດເພື່ອຊ່ວຍເຫຼືອສັງຄົມ ຊຶ່ງສາມາດເກັບກໍາຜູ້ບໍລິຈາກເລືອດໄດ້ ຈໍານວນ 99 ຄົນ, ໄດ້ນໍາພາ ເອື້ອຍນ້ອງແມ່ຍິງເຂົ້າຢ້ຽມຊົມຫໍມູນເຊື້ອຂອງແມ່ຍິງລາວ ແລະ ຍັງມີແຜນຈະໄປແລກປ່ຽນບົດຮຽນ ໃນການເຄື່ອນໄຫວແລະຊຸກຍູ້ວຽກງານສະຫະພັນແມ່ຍິງຢູ່ຂັ້ນທ້ອງຖີ່ນ, ນອກຈາກນີ້ ສະຫະພັນແມ່ຍິງ ກະຊວງໄດ້ນໍາສະເໜີຄະນະພັກ-ຄະນະນໍາກະຊວງ ຂໍເປີດຂະບວນການແຂ່ງຂັນຂຽນແຜນໂຄງການແມ່ຍິງກັບການແກ້ໄຂຂໍ້ຫຍຸ້ງຍາກທາງດ້ານເສດຖະກິດຂອງຂະແໜງການ ພບ, ຊຶ່ງຂະບວນການດັ່ງກ່າວກໍແມ່ນຜັນຂະຫຍາຍແຜນພັດທະນາແມ່ຍິງແຫ່ງຊາດຕິດພັນກັບ 2 ວາລະແຫ່ງຊາດ ໄດ້ເລີ່ມເປີດຂະບວນການຕັ້ງແຕ່ເດືອນ ມີນາ 2024 ເປັນຕົ້ນມາ ແລະ ຈະມີພິທີປິດຂະບວນການດັ່ງກາວໃນມື້ນີ້, ຊຶ່ງເປັນຂະບວນການສ້າງຄວາມເຂັ້ມແຂງ ແລະ ສົ່ງເສີມຄວາມກ້າວໜ້າໃຫ້ກັບແມ່ຍິງ ແລະ ເພື່ອຍົກໃຫ້ເຫັນຄວາມສາມາດທີ່ບົ່ມຊ້ອນຂອງເອື້ອຍນ້ອງແມ່ຍິງໃຫ້ເປັນຮູບປະທໍາ.
ການຈັດພິທີສະເຫຼີມສະຫຼອງໃນຄັ້ງນີ້ ເພື່ອເປັນການຫວນຄືນ ມູນເຊື້ອອັນດີງາມຂອງ ການຈັດຕັ້ງສະຫະພັນແມ່ຍິງແມ່ຍິງລາວ ຕັ້ງແຕ່ອາດີດ ຈົນເຖິງປະຈຸບັນ ແລະ ເພື່ອເປັນການສ້າງຄວາມສາມັກຄີ ຮັກແພງ, ການພົບປະ ຊຶງກັນ ແລະ ກັນຂອງເອື້ອຍນ້ອງແມ່ຍິງໃນທົ່ວຂະແໜງການ, ພິທີໃນມື້ນີ້ຖືເປັນການອະນຸລັກວັດທະນາອັນດີງາມຂອງຊາດລາວ ໂດຍຜ່ານຂະບວນການແຕ່ງກາຍຊຸດຂອງບັນດາຊົນເຜົາຕ່າງໆທີ່ເປັນເອກະລັກສະເພາະ ທັງນີ້ກໍເພື່ອເປັນການສົ່ງເສີມຜະລິດຕະພັນພາຍໃນຂອງລາວເຮົາທີ່ມີຄວາມສວຍງາມສາມາດເປັນເອກະລັກສະເພາະຕົວ ແລະ ນອກຈາກນັ້ນ ກໍມີການວາງຂາຍສິນຄ້າຜະລິດຕະພັນພື້ນບ້ານຂອງລາວເຮົາ ທີ່ບັນດາໜ່ວຍສະຫະພັນແມ່ຍິງໄດ້ນໍາມາຂາຍ ເພື່ອເປັນການຊຸກຍູ້ສົ່ງເສີມຜະລິດຕະພັນພາຍໃນປະເທດ. ໃນປີ 2024 ຖືວ່າເປັນປີສຸມໃສ່ການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຄັ້ງທີ 11 ໄລຍະທ້າຍສະໄໝໃຫ້ປະກົດຜົນເປັນຈິງ ພ້ອມກັບການກະກຽມການດໍາເນີນກອງປະຊຸມໃຫຍ່ 3 ຂັ້ນຂອງພັກ, ສໍາລັບສະຫະພັນແມ່ຍິງກະຊວງ ກໍພວມ ຂຸ້ນຂ້ຽວສ້າງຜົນງານ ແລະ ຂະບວນການເພື່ອຕ້ອນຮັບກອງປະຊຸມໃຫຍ່ຂອງຕົນໃນທ້າຍປີ 2024 ຊຶ່ງກໍໄດ້ມີການກະກຽມບັນດາເອກະສານຕ່າງໆ ແລະ ບັນດາໜ່ວຍສະຫະພັນແມ່ຍິງ ອ້ອມຂ້າງກະຊວງທັງ 17 ໜ່ວຍ ກໍໄດ້ສໍາເລັດກອງປະຊຸມຂອງຕົນ.
