ຕອນເຊົ້າວັນທີ 21 ມີນາ 2022 ຜ່ານມານີ້, ຢູ່ກະຊວງ ພະລັງງານ ແລະ ບໍ່ແຮ່. ທ່ານ ປອ ດາວວົງ ພອນແກ້ວ ກຳມະການສູນກາງພັກປະຊາຊົນປະຕິວັດລາວ, ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ໃຫ້ການຕ້ອນຮັບ ທ່ານ ພົນໂທ ຫງວນ ຢ໊ວນ ແອັງ ກຳມະການສູນກາງພັກຄ້ອມມູນິດຫວຽດນາມ, ຫົວໜ້າການທະຫານເຂດ4 ສສ.ຫວຽດນາມ ໃນໂອກາດເດີນທາງເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ຂອງຄະນະຜູ້ແທນການທະຫານຂັ້ນສູງ ແຫ່ງ ສສ.ຫວຽດນາມ.
ໃນໂອກາດດັ່ງກ່າວ ທ່ານ ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ສະໜິດສະໜົມ ພ້ອມທັງສະແດງຄວາມຊົມເຊີຍຕໍ່ ທ່ານ ຫົວໜ້າການທະຫານເຂດ 4 ແຫ່ງ ສສ. ຫວຽດນາມ ທີ່ໄດ້ນຳພາຄະນະຜູ້ແທນຂັ້ນສູງຂອງກອງທັບຫວຽດນາມ ຢ້ຽມຢາມ ແລະ ເຮັດວຽກຢູ່ ສປປລາວ ເວົ້າລວມ, ເວົ້າສະເພາະ ການເຂົ້າພົບປະ, ໂອ້ລົມ ແລະ ແລກປ່ຽນຄວາມຄິດເຫັນຕ່າງໆ ກັບກະຊວງ ພະລັງງານ ແລະ ບໍ່ແຮ່. ພ້ອມກັນນີ້, ທ່ານ ລັດຖະມົນຕີ ຍັງໄດ້ຍົກໃຫ້ເຫັນສະພາບການພັດທະນາເສດຖະກິດ-ສັງຄົມ ຢູ່ ສປປລາວ ແລະ ຜົນສຳເລັດການພັດທະນາວຽກງານພະລັງງານ ແລະ ບໍ່ແຮ່ ຂອງລາວໃນໄລຍະ 40 ປີຜ່ານມາ. ໃນນີ້ ສສ. ຫວຽດນາມ ໃນຖານະທີ່ເປັນປະເທດອ້າຍນ້ອງທີ່ມີຄວາມຜູກພັນກັນຢ່າງສະໜິດແໜ້ນມາໄດ້ຫຼາຍທົດສະວັດ ເຊິ່ງຍາມໃດ ສສ ຫວຽດນາມ ກໍ່ໄດ້ປະກອບສ່ວນຊ່ວຍເຫຼືອ ເຂົ້າໃນການພັດທະນາເສດຖະກິດ-ສັງຄົມ ຂອງລາວ. ເວົ້າລວມເວົ້າສະເພາະຕໍ່ກັບວຽກງານໃນຂະແໜງພະລັງງານ ແລະ ບໍ່ແຮ່ ເຫັນວ່າ ສສ. ຫວຽດນາມ ໄດ້ປະກອບສ່ວນໃນການພັດທະນາໃນຂະແໜງການ ພະລັງງານ ແລະ ບໍ່ແຮ່ ຢ່າງຕັ້ງໜ້າ ບໍ່ວ່າຈະເປັນການພັດທະນາເຂື່ອນໄຟຟ້າເພື່ອສົ່ງອອກໄຟຟ້າໄປຫວຽດນາມ ລວມທັງການມາລົງທຶນໃນວຽກງານບໍ່ແຮ່. ມາຮອດປັດຈຸບັນ ໄດ້ເຊັນສັນຍາຊື້-ຂາຍໄຟຟ້າ (PPA) ກັບ ລັດວິສາຫະກິດໄຟຟ້າຫວຽດນາມ (EVN) ທັງໝົດມີ 18 ສັນຍາ (25 ໂຄງການ) ລວມກຳລັງຕິດຕັ້ງ 2.180 MW. ໃນນັ້ນ, ໄດ້ສົ່ງໄຟຂາຍອອກແລ້ວມີ 2 ສັນຍາ ຈາກ 03 ໂຄງການ ລວມກໍາລັງຕິດຕັ້ງ 572 MW ຄື: ເຊຂະໝານ 1, ເຊຂະໝານຊານໄຊ ແລະ ເຊຂະໝານ 3; ໂຄງການທີ່ໄດ້ເຊັນບົດບັນທຶກຄວາມເຂົ້າໃຈສັນຍາຊື້ຂາຍໄຟຟ້າ (Tariff MOU) ກັບ EVN ມີ 05 ສັນຍາ (5 ໂຄງການ) ລວມກຳລັງຕິດຕັ້ງ 1.814 MW; ໂຄງການທີ່ໄດ້ຮັບການຕົກລົງເຫັນດີດ້ານຫຼັກການ ຮັບຊື້ໄຟຈາກລັດຖະບານ ສສ ຫວຽດນາມ ມີ 06 ສັນຍາ (6 ໂຄງການ) ລວມກຳລັງຕິດຕັ້ງ 2.485 MW.
ສຳລັບໂຄງການຮ່ວມມື ແລະ ລົງທຶນ ດ້ານທໍລະນີສາດ ແລະ ບໍ່ແຮ່ ມາຮອດປະຈຸບັນ ໄດ້ມີບໍລິສັດຈາກ ສສ ຫວຽດນາມ ເຂົ້າມາລົງທຶນການຂຸດຄົ້ນ ແລະ ປຸງແຕ່ງແຮ່ທາດ ຢູ່ ສປປ ລາວ ທັງໝົດ 17 ບໍລິສັດ, 21 ກິດຈະການ ໃນເນື້ອທີ່ສຳປະທານທັງໝົດ 18.209,83 ເຮັກຕາ, ຊຶ່ງກວມເອົາ 8,65% ຂອງເນື້ອທີ່ສຳປະທານຂຸດຄົ້ນ ແລະ ປຸງແຕ່ງແຮ່ທາດທັງໝົດທີ່ຂັ້ນສູນກາງອອກອະນຸຍາດ. ການລົງທຶນໃນຂະແໜງຊອກຄົ້ນ-ສຳຫຼວດແຮ່ທາດ ມີ 8 ບໍລິສັດ 14 ກິດຈະການ; ໂຄງການຮ່ວມມື (ການຊ່ວຍເຫຼືອລ້າ) ຂອງລັດຖະບານ ຫວຽກນາມ ໃນການສໍາຫຼວດສ້າງຂໍ້ມູນພື້ນຖານທໍລະນີສາດ ແລະ ແຮ່ທາດ ໃຫ້ແກ່ລັດຖະບານ ສປປລາວ ລວມມີ 3 ໂຄງການຄື: ໂຄງການ “ສໍາຫຼວດສ້າງແຜນທີ່ທໍລະນີສາດ ແລະ ແຮ່ທາດ ມາດຕາສ່ວນ 1:200.000 ເຂດເໜືອວຽງຈັນ – ໃຕ້ຫຼວງພະບາງ”. ໂຄງການດັ່ງກ່າວ ມີເນື້ອທີ່ ປະມານ 15.870 ກມ2 ກວມເອົາ 4 ແຂວງ ໄດ້ຄື: ແຂວງວຽງຈັນ, ຫຼວງພະບາງ, ຊຽງຂວາງ ແລະ ແຂວງໄຊສົມບູນ ຊຶ່ງໄດ້ຈັດຕັ້ງປະຕິບັດມາແຕ່ປີ 2013; ໂຄງການ ສຶກສາວິທະຍາສາດ ພາຍໃຕ້ຫົວຂໍ້ “ສຶກສາຄົ້ນຄ້ວາຮອຍເລື່ອນ – ຫີນມາກມາ ແລະ ການກໍາເນີດແຮ່ກົ່ວ, ໂວນຟຣາມ, ຄໍາ ແລະ ແຮ່ທາດອື່ນໆ ບໍລິເວນທິດຕາເວັນຕົກສ່ຽງເໜືອເຫງ້ອານ – ຊໍາເໜືອ”. ໂຄງການດັ່ງກ່າວ ມີເນື້ອທີ່ທັງໝົດ ປະມານ 9.400 ກມ2 ແລະ ໂຄງການ “ສໍາຫຼວດສ້າງແຜນທີ່ທໍລະນີສາດ ແລະ ແຮ່ທາດ ມາດຕາສ່ວນ 1:200.000 ເຂດບໍລິຄໍາໄຊ – ໄຊສົມບູນ” ມູນຄ່າຂອງໂຄງການທີ່ໄດ້ຮັບການອະນຸມັດທັງໝົດ 1.000.000.000 ດົງ ຫຼື ປະມານ 50.000 ໂດລາ ສາ ຫະລັດ.
ທ່ານ ພົນໂທ ຫງວນ ຢ໊ວນ ແອັງ ກຳມະການສູນກາງພັກຄ້ອມມູນິດຫວຽດນາມ, ຫົວໜ້າການທະຫານເຂດ4 ສສ.ຫວຽດນາມ ໄດ້ສະແດງຄວາມຂອບໃຈຢ່າງຈິງໃຈ ຕໍ່ ທ່ານ ລັດຖະມົນຕີ ທີ່ໄດ້ໃຫ້ການຕ້ອນຮັບ ແລະ ລາຍງານສະພາບການພັດທະນາເສດຖະກິດ-ສັງຄົມຂອງ ສປປລາວ ໂດຍຫຍໍ້. ພິເສດການລາຍງານສະພາບການຮ່ວມມື ແລະ ລົງທຶນ ຂອງ ວິສາຫະກິດ ແລະ ນັກລົງທຶນຂອງ ສສ.ຫວຽດນາມ ຢູ່ ສປປລາວ ໃນຂົງເຂດພະລັງງານ ແລະ ບໍ່ແຮ່ ເຊິ່ງເປັນນິມິດໝາຍທີ່ດີ ແລະ ພ້ອມສືບຕໍ່ເສີມຂະຫຍາຍ, ສົ່ງເສີມໃຫ້ນັກທຸລະກິດຂອງ ຫວຽດນາມ ເຂົ້າມາລົງທຶນຢູ່ ສປປລາວ ນັບມື ນັບຫຼາຍຂຶ້ນ ໄປພ້ອມໆກັບການຮັບປະກັນດ້ານປະສິດຜົນ ເພື່ອນຳເອົາຜົນປະໂຫຍດມາສູ່ ລັດຖະບານ ແລະ ປະຊາຊົນ ສອງຊາດລາວ-ຫວຽດນາມ.
ແຫຼ່ງຂໍ້ມູນ : ກົມແຜນການ ແລະ ການຮ່ວມມື
ພາບ: ວຽງສະຫວັນ ປຣະດິດ
ຂ່າວ: ຄຳແສງ ແກ້ວປະເສີດ
