ຕອນເຊົ້າວັນທີ 03 ພະຈິກ 2023 ທີ່ຫ້ອງຮັບແຂກ ກະຊວງພະລັງງານ ແລະ ບໍ່ແຮ່ ທ່ານ ເອກອັກຄະລັດຖະທູດ ສະຫະພັນທະລັດ ສະວິດ ປະຈໍາ ສປປ ລາວ ທ່ານ Pedro Zwahlen ໄດ້ເຂົ້າຢ້ຽມຢາມ, ພົບປະກັບ ທ່ານ ທອງພັດ ອິນທະວົງ ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່, ເນື່ອງໃນໂອກາດທີ່ ທ່ານ ເຂົ້າຮັບໜ້າທີ່ໃໝ່ເປັນເອກອັກຄະລັດຖະທູດຜູ້ມີອຳນາດເຕັມ ແຫ່ງ ສະວິດ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານ ທູດ ໄດ້ສະເໜີຈຸດປະສົງຂອງການມາພົບປະ ແລະ ຢ້ຽມຂໍ່ານັບ ທ່ານ ຮອງລັດຖະມົນຕີ ຄັ້ງນີ້, ກໍ່ເພື່ອທົບທວນຄືນ ການຈັດຕັ້ງປະຕິບັດວຽກງານການຮ່ວມມື ລະຫວ່າງ ລາວ ແລະ ສະວິດເຊີແລນ ໃນຂະແໜງພະລັງງານ ແລະ ບໍ່ແຮ່ ໂດຍສະເພາະແມ່ນ ການຊ່ວຍເຫຼືອ 4.8 ລ້ານຝຣັ່ງສະວິດ ພາຍໃຕ້ໂຄງການ Swiss Agency for Development and Cooperation (SDC) ຢູ່ ສປປ ລາວ ຮ່ວມກັບ ໂຄງການ Helvitas ໂດຍສະເພາະ ໂຄງການຊ່ວຍເຫຼືອດ້ານວິຊາການ ແລະ ລະບຽບການດ້ານຄວາມປອດໄພຂອງເຂື່ອນ Dam Safety Technical and Institutional Assistance (DSTIA) ໃນ ສປປ ລາວ.
