Blog

         ຜູ້ແທນກອງປະຊຸມໃຫຍ່ ໄດ້ດຳເນີນການໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍຊຸດໃໝ່ ໂດຍມີຜູ້ລົງສະໝັກຮັບເລືອກຕັ້ງຈຳນວນ 5 ສະຫາຍ ເລືອກເອົາ 3 ສະຫາຍ. ຜ່ານການໃຊ້ສິດປະຊາທິປະໄຕ ຂອງຜູ້ແທນກອງປະຊຸມໃຫຍ່ ແລະ ກອງປະຊຸມຄັ້ງປະຖົມມະລຶກຂອງ ຄະນະໜ່ວຍຮາກຖານ ຊປປລ ກົມທໍລະນີສາດ ແລະ ແຮ່ທາດ ສະໄໝທີ III ໄດ້ເປັນເອກກະສັນເລືອກຕັ້ງເອົາ ສະຫາຍ ສຸກສັນ ພົມສີລາໄລ ເປັນເລຂາ; ສະຫາຍ ນາງ ວັນນະພາ ພົມມະຈັນ ເປັນຮອງເລຂາ ແລະ ສະຫາຍ ວິໂຕ ຈິດຕະບູນ ເປັນກຳມະການ ແລະ ເປັນປະທານກວດກາໜ່ວຍ.

         ຕອນທ້າຍຂອງກອງປະຊຸມໃຫຍ່ ໄດ້ຮັບຟັງ ການໂອ້ລົມ ແລະ ໃຫ້ທິດຊີ້ນຳຂອງ ສະຫາຍ ຈັນທະເລດ ວໍລະບຸດ, ກໍາມະການຄະນະບໍລິຫານງານພັກກະຊວງ, ກຳມະການຄະນະບໍລິຫານງານສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມ ປປລ ກະຊວງພະລັງງານ ແລະ ບໍ່ແຮ່, ຊຶ່ງກ່ອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນງານທີ່ໜ່ວຍຮາກຖານ ຊາວໜຸ່ມປະຊາຊົນປະຕິວັດລາວ ກົມທໍລະນີສາດ ແລະ ແຮ່ທາດ ທີ່ຍາດມາໄດ້ຕະຫຼອດໄລຍະ 5 ປີຜ່ານມາ. ພ້ອມກັນນີ້, ສະຫາຍ ຍັງໄດ້ເນັ້ນໃຫ້ຄະນະໜ່ວຍຊຸດໃໝ່ ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກຊາວໜຸ່ມພາຍໃນໜ່ວຍ ມີທັດສະນະຫຼັກໝັ້ນ, ມີຄຸນ ສົມບັດ, ສິນທຳປະຕິວັດ; ຍົກສູງຄວາມຮັບຜິດຊອບໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ ເພື່ອຮັບປະ ກັນໃຫ້ການຊີ້ນຳ-ນຳພາວຽກງານຊາວໜຸ່ມຂອງກົມທໍລະນີສາດ ແລະ ແຮ່ທາດ ໃນຕໍ່ໜ້າ ເຕີບໃຫຍ່, ເຂັ້ມແຂງ ແລະ ໜັກແໜ້ນກວ່າເກົ່າ; ຈັດຕັ້ງປະຕິບັດຂໍ້ແຂງຂັນ 4 ບຸກ ໃນແຕ່ລະໄລຍະ ໃຫ້ບັນລຸຕາມແຜນການທີ່ວາງໄວ້ ພ້ອມທັງຮັກສາມູນເຊື້ອເປັນຊາວໜຸ່ມ 4 ບຸກຂອງຕົນ ໃຫ້ໜັກແໜ້ນ; ນຳພາຊາວໜຸ່ມກົມທໍລະນີສາດ ແລະ ແຮ່ທາດ ກາຍເປັນຊາວໜຸ່ມແບບຢ່າງໃນການເຄື່ອນໄຫວວຽກງານຕ່າງໆ ເຊັ່ນ: ວຽກງານວິຊາສະເພາະ, ວຽກງານຂະບວນການ, ວຽກງານຊ່ວຍເຫຼືອສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານ ອື່ນໆ;