ເພື່ອສະແດງຄວາມຮູ້ບຸນຄຸນ ແລະ ອາໄລຮັກຂອງປະຊາຊົນລາວບັນດາເຜົ່າເວົ້າລວມ, ເວົ້າສະເພາະ ຂອງພະນັກງານ, ລັດຖະກອນ ແລະ ກຳມະກອນ ຢູ່ໃນຂົງເຂດພະລັງງານ ແລະ ບໍ່ແຮ່ ຕໍ່ປະທານ ສຸພານຸວົງ ອາດີດກຳມະການກົມການເມືອງສູນກາງພັກ, ອາດີດປະທານແນວລາວຮັກຊາດ, ອາດີດປະທານປະທດຄົນທຳອິດ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ພັກ, ປະຊາຊົນ ແລະ ປະເທດຊາດຂອງພວກເຮົາ.
ຕອນເຊົ້າວັນທີ 9 ມັງກອນ 2024 ເຊິ່ງກົງກັບມື້ທີ່ເພິ່ນໄດ້ຈາກພວກເຮົາໄປໂດຍບໍ່ມີວັນຈະກັບຄືນຫວນມາຫາພວກເຮົາອີກ ກ່ອນໜ້ານີ້ 29 ປີ ຄືວັນທີ 9 ມັງກອນ 1995. ທ່ານ ປະລິຍາເອກ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ນຳພາຄະນະພັກ, ຄະນະນຳ ແລະ ສະມາຊິກສະພາປະຊາຊົນແຂວງຫຼວງພະບາງ ແລະ ຄະນະພັກ, ຄະນະນຳພະແນກພະລັງງານ ແລະ ບໍ່ແຮ່ ແຂວງຫຼວງພະບາງ ເຂົ້າວາງກະຕ່າດອກໄມ້ ຢູ່ຕໍ່ໜ້າຮູບຫຼໍ່ປະທານ ສຸພານຸວົງ ຢູ່ອະນຸສາວະລີຂອງເພິ່ນ ຢູ່ນະຄອນຫຼວງພະບາງ.
