ໃນວັນທີ 30 ພະຈິກ 2021 ຜ່ານມານນີ້, ທີ່ໂຮງແຮມແລນມາກ, ທ່ານ ປອ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ໃຫ້ກຽດເຂົ້າຮ່ວມກ່າວເປີດກອງປະຊຸມເປີດກວ້າງຜູ້ມີສ່ວນຮ່ວມຄັ້ງທີ 11 ຂອງຄະນະກໍາມາທິການແມ່ນໍ້າຂອງສາກົນ, ເຊິ່ງແມ່ນກິດຈະກຳໜຶ່ງຂອງຂະບວນການປຶກສາຫາລືລ່ວງໜ້າ ສໍາລັບໂຄງການເຂື່ອນໄຟຟ້າພະລັງນໍ້າຊະນະຄາມ ພາຍໃຕ້ຂະບວນການແຈ້ງໃຫ້ຊາບ ການປຶກສາຫາລືລ່ວງໜ້າ ແລະ ການເຮັດຂໍຕົກລົງ ຫຼື Procedure for Notification Prior Consultation and Agreement-PNPCA ຂອງຂອບການຮ່ວມມືສັນຍາແມ່ນໍ້າຂອງປີ 1995.
ກອງປະຊຸມຄັ້ງນີ້, ມີບັນດາຜູ້ແທນເຂົ້າຮ່ວມຈາກຂະແໜງການຕ່າງໆ ປະກອບດ້ວຍກະຊວງພະລັງງານ ແລະ ບໍ່ແຮ່, ກະ ຊວງກະສິກຳ ແລະ ປ່າໄມ້, ກະຊວງໂຍທາທິການ ແລະ ຂົນສົ່ງ, ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ. ນອກຈາກນີ້ ຍັງມີຜູ້ແທນຈາກກອງເລຂາ ຄະນະກຳມະການແມ່ນໍ້າຂອງແຫ່ງຊາດ ຂອງບັນດາປະເທດສະມາຊິກຄະນະກຳມາທິການແມ່ນໍ້າຂອງສາກົນ, ບັນດາອົງການຈັດຕັ້ງທາງສັງຄົມ, ບັນດາອົງການຈັດຕັ້ງທີ່ບໍ່ສັງກັດລັດ ຖະບານ, ບັນດາຜູ້ຊ່ຽວຊານ ແລະ ກອງເລຂາ ຄະນະກຳມາທິການແມ່ນໍ້າຂອງສາກົນ.
ກອງປະຊຸມຄັ້ງນີ້ ໄດ້ຈັດຂຶ້ນເປັນເວລາ 02 ວັນເຕັມ, ໃນວັນທີ 29-30 ພະຈິກ 2021 ເຊິ່ງໄດ້ແບ່ງອອກເປັນ 02 ຫົວຂໍ້ໃຫຍ່ ຄື: (1) ວັນທີ 29 ພະຈິກ 2021 ແມ່ນການປຶກສາຫາລື ກ່ຽວກັບການປະຕິບັດງານຂອງໂຄງການເຂື່ອນໄຟຟ້າແບບຍືນຍົງ ເພື່ອເປີດໂອກາດໃຫ້ຜູ້ເຂົ້າຮ່ວມໄດ້ປຶກສາຫາລື ດ້ານຕ່າງໆທີ່ກ່ຽວຂ້ອງກັບການຄຸ້ມຄອງໂຄງການເຂື່ອນໄຟຟ້າໃນອ່າງແມ່ນໍ້າຂອງ ແລະເນັ້ນໃສ່ການພັດທະນາ, ການຄຸ້ມຄອງ ແລະການດໍາເນີນງານຂອງເຂື່ອນໄຟຟ້າພະລັງນໍ້າໃນແມ່ນສາຍດຽວ (ເຂື່ອນຂັ້ນໄດ) ໂດຍມີຈຸດປະສົງຫຼັກເພື່ອ: 1) ປຶກສາຫາລືກ່ຽວກັບຂະບວນການທີ່ກ່ຽວຂ້ອງກັບການແລກປ່ຽນຂໍ້ມູນຂ່າວສານ, ການປະສານງານ, ການດຳ ເນີນງານ ເພື່ອເພີ່ມປະສິດທິພາບການດຳເນີນງານ ແລະຄວາມຍືນຍົງຂອງບັນດາໂຄງການເຂື່ອນໄຟຟ້າພະລັງນໍ້າ ພາຍໃຕ້ສະພາບການຂ້າມຜ່ານຊາຍແດນຂອງອ່າງແມ່ນໍ້າຂອງ; 2) ປຶກສາຫາລືກ່ຽວກັບບົດບາດຂອງຜູ້ພັດທະນາໂຄງການ, ຜູ້ປະກອບການ, ອົງການຈັດຕັ້ງພາກລັດ ແລະ ອົງການຈັດ ຕັ້ງລະດັບພາກພື້ນ ລວມທັງອົງການຈັດຕັ້ງທາງສັງຄົມ (Civil Society Organizations-CSOs) ຫຼືອົງການຈັດຕັ້ງທີ່ບໍ່ຂຶ້ນກັບລັດຖະບານ (Non-Governmental Organizations-NGOs) ກ່ຽວກັບຂະບວນການແບ່ງປັນຂໍ້ມູນຂ່າວສານ ແລະການປະສານງານໂຄງການກໍ່ສ້າງເຂື່ອນໄຟຟ້າພະລັງນໍ້າ; 3) ສະເໜີກົນໄກຕ່າງໆ ສຳລັບການດຳເນີນງານ ແລະການຄຸ້ມຄອງເຂື່ອນໄຟຟ້າພະລັງນໍ້າຢ່າງມີປະສິດທິພາບ ແລະຄວາມຮັບຜິດຊອບຕໍ່ອ່າງແມ່ນ້ຳຂອງ. (2) ວັນທີ 30 ພະຈິກ 2021 ແມ່ນການປຶກສາຫາລືລະດັບພາກພື້ນ ເພື່ອແລກປ່ຽນ ແລະປຶກສາຫາລືກັບພາກສ່ວນກ່ຽວຂ້ອງຂອງຂະບວນການ (Prior Consultation-PC) ສໍາລັບໂຄງການເຂື່ອນໄຟຟ້າພະລັງນໍ້າຊະນະ ໂດຍມີຈຸດປະສົງຫຼັກເພື່ອ: 1) ຮັບຟັງຄວາມຄືບໜ້າ ແລະການປັບປຸງຜົນໄດ້ຮັບຈາກການປຶກສາຫາລືພາຍໃນ; 2) ປຶກສາຫາລື ແລະປະກອບຄໍາເຫັນໃສ່ ຮ່າງບົດລາຍງານການທົບທວນດ້ານວິຊາການ (Technical Review Report-TRR) ສະບັບສຸດທ້າຍ ພາຍໃຕ້ຂະບວນການປຶກສາຫາລືລ່ວງໜ້າ (Prior Consultation-PC) ຂອງໂຄງການເຂື່ອນໄຟຟ້າພະລັງນໍ້າຊະນະຄາມ.
ບັນດາຜູ້ແທນທີ່ເຂົ້າຮ່ວມກອງປະຊຸມໄດ້ຮັບຟັງການລາຍງານຈາກຕົວແທນຂອງບັນດາປະເທດສະມາຊິກ ແລະ ກອງເລ ຂາ ຄະນະກຳມາທິການແມ່ນໍ້າຂອງສາກົນ ແລະ ກໍໄດ້ປຶກສາຫາລືແລກປ່ຽນບົດຮຽນ ລະຫວ່າງຕົວແທນຈາກສາມປະ ເທດສະມາຊິກ ແລະ ຜູ້ພັດທະນາໂຄງການ ໃນແຕ່ລະດ້ານທີ່ເຫັນວ່າອາດຈະມີຜົນກະທົບທີ່ຈະຕ້ອງໄດ້ພິຈາລະນາ ເຊັ່ນ: 1) ອຸທົກກະສາດ; 2) ການເດີນເຮືອ; 3) ການເຄື່ອນຍ້າຍຕະກອນ; 4) ການເຄື່ອນຍ້າຍ (ທາງຂຶ້ນ-ລົງ ສໍາລັບປາ) ແລະ ການອະນຸລັກປາ, 5)ຄວາມປອດໄພຂອງເຂື່ອນ ແລະ 6) ການບໍລິຫານຈັດການເຂື່ອນ.
ແຫຼ່ງຂໍ້ມູນ ແລະ ພາບ: ກອງເລຂາການນຳກະຊວງ
ຮຽບຮຽງຂ່າວ: ຄຳແສງ ແກ້ວປະເສີດ
