ກອງປະຊຸມໃຫຍ່ ຂອງໜ່ວຍສະຫະພັນແມ່ຍິງກົມກວດກາ ຄັ້ງທີ II ໄດ້ດຳເນີນມາ ເປັນເວລາເຄິ່ງວັນ, ພາຍໃຕ້ການເປັນປະທານຂອງ ສະຫາຍ ນາງ ເພັດດາວອນ ແສງສຸລິຈັນ ຫົວໜ້າໜ່ວຍ ສະຫະພັນແມ່ຍິງກົມກວດກາ. ໃຫ້ກຽດເຂົ້າຮ່ວມກອງປະຊຸມໃຫຍ່ຄັ້ງນີ້ມີ: ສະຫາຍ ນາງ ແສງເດືອນ ວົງອິນ ຄະນະພັກກະຊວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານ ຄະນະບໍລິຫານງານສະຫະພັນແມ່ຍິງກະຊວງ ກະຊວງພະລັງງານ ແລະ ບໍ່ແຮ່, ສະຫາຍ ຄໍາຫຼ້າ ວິຈິດວົງສາ ຄະນະພັກກະຊວງ, ເລຂາ ໜ່ວຍພັກຮາກຖານກົມກວດກາ. ນອກຈາກນີ້, ຍັງມີຜູ້ແທນສົມບູນ 11 ສະຫາຍນາງ, ແຂກຖືກເຊີນ 20 ສະຫາຍ, ຍິງ 17 ສະຫາຍນາງ, ຊາຍ 03 ສະຫາຍ.
ກອງປະຊຸມໃຫຍ່ຄັ້ງ ໄດ້ເປັນເອກະສັນກັນຢ່າງສົມບູນ ຮັບຮອງເອົາບັນດາ ເນື້ອໃນສຳຄັນຕ່າງໆ ທີ່ເປັນພື້ນຖານໃຫ້ແກ່ການເຄື່ອນໄຫວວຽກງານແມ່ຍິງຢູ່ພາຍໃນກົມດັ່ງນີ້:
1. ຮັບຮອງເອົາ ບົດລາຍງານການເມືອງ ຂອງຄະນະໜ່ວຍສະຫະພັນແມ່ຍິງກົມກວດກາ ໃນ ໄລຍະ 05 ປີ ຜ່ານມາ (2019-2023), ຊຶ່ງໄດ້ຕີລາຄາຢ່າງພາວະວິໄສ, ກົງໄປກົງມາ ຕໍ່ຜົນສຳເລັດໃນການນຳພາ-ຊີ້ນຳ ແລະ ຈັດຕັ້ງປະຕິບັດວຽກງານ ຂອງຄະນະໜ່ວຍສະຫະພັນແມ່ຍິງກົມກວດກາ;
2. ຮັບຮອງເອົາ ທິດທາງລວມ, ຄາດໝາຍສູ້ຊົນ ແລະ ວຽກງານຈຸດສຸມ 05 ປີ ຕໍ່ໜ້າ 2024-2028 ເຊິ່ງລວມມີ 05 ຄາດໝາຍສູ້ຊົນຄື: 1). ເຮັດໃຫ້ຄະນະພັກ, ຄະນະນໍາເຫັນໄດ້ຄວາມສຳຄັນ ແລະ ຄວາມຈຳເປັນຂອງວຽກງານແມ່ຍິງ ຖືເອົາວຽກງານວິຊາສະເພາະ ແມ່ນໜ້າທີ່ຄວາມຮັບຜິດຊອບ ແລະ ໜ້າທີ່ໂດຍກົງ, ເປັນເຈົ້າການຊີ້ນຳ-ນຳພາໃນການເຄື່ອນໄຫວວຽກງານແມ່ຍິງ; 2) ສູ້ຊົນໃຫ້ເອື້ອຍນ້ອງຍິງໄດ້ໄປຍົກລະດັບວິຊາສະເພາະ, ທິດສະດີການເມືອງການປົກຄອງ ແລະ ພາສາຕ່າງປະເທດໄລຍະສັ້ນ-ໄລຍະຍາວຢ່າງນ້ອຍ 03 ທ່ານ ແລະ ສູ້ຊົນໃຫ້ເອື້ອຍນ້ອງຍິງ ໄດ້ເຂົ້າເປັນສະມາຊິກພັກໃຫ້ໄດ້ 92% ຂອງຈໍານວນແມ່ຍິງທັງໝົດ;3) ຕ້ອງຊອກໃຫ້ເຫັນດ້ານດີ, ດ້ານຕັ້ງໜ້າຕົວແບບ ເພື່ອເສີມຂະຫຍາຍຊອກໃຫ້ເຫັນດ້ານອ່ອນ, ຂໍ້ຄົງຄ້າງເພື່ອແກ້ໄຂ, ກໍາແໜ້ນຄຸນທາດການເມືອງ, ຄວາມສາມາດປະຫວັດການເຄື່ອນໄຫວຂອງແມ່ຍິງທີ່ຂື້ນກັບການຄຸ້ມຄອງຂອງຕົນ; 4) ແມ່ຍິງຢູ່ບ່ອນໃດ ການຈັດຕັ້ງຢູ່ບ່ອນນັ້ນຕ້ອງໄດ້ຮັບການປັບປຸງໃຫ້ເຂັ້ມແຂງ, ແບບແຜນວິທີນຳພາເຮັດວຽກຂອງຄະນະພັກ, ຄະນະນຳໃຫ້ໄດ້ຮັບການປັບປຸງດີຂື້ນ. ເອື້ອຍນ້ອງແມ່ຍິງຕ້ອງມີຄວາມ ໜັກແໜ້ນທາງດ້ານການເມືອງ-ແນວຄິດ, ມີຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບການມອບ ໝາຍ;5) ເອົາໃຈໃສ່ລະບຽບທີ່ພົວພັນເຖິງແມ່ຍິງ ເຜີຍແຜ່ໃຫ້ເຂົາເຈົ້າຮັບຮູ້ເພື່ອອອກແຮງປະຕິບັດຂໍ້ແຂ່ງຂັນ 3 ດີຂອງແມ່ຍິງວາງອອກ.
3. ຮັບຮອງເອົາ ບົດສຳຫຼວດການນໍາພາລວມຂອງຄະນະໜ່ວຍສະຫະພັນແມ່ຍິງກົມກວດກາ ຊຶ່ງໄດ້ຕີລາຄາສູງຕໍ່ບົດບາດການນຳພາ, ຄວາມຮັບຜິດຊອບ, ຄວາມເປັນເອກະພາບຂອງຄະນະໜ່ວຍ ຊຸດເກົ່າ;
4. ໄດ້ຮັບຟັງການປະກອບຄໍາຄິດເຫັນຈາກ ສະຫາຍ ຄໍາຫຼ້າ ວິຈິດວົງສາ ຄະນະພັກກະຊວງ, ເລຂາໜ່ວຍພັກກົມກວດກາ ຊຶ່ງໄດ້ເປັນການຢັ້ງຢືນເຖິງ ການເອົາໃຈໃສ່ຊຸກຍູ້ສົ່ງເສີມ ແລະ ສ້າງເງື່ອນໄຂອໍານວຍຄວາມສະດວກໃຫ້ອົງການຈັດຕັ້ງສະຫະພັນແມ່ຍິງ ກໍ່ຄືເອື້ອຍນ້ອງແມ່ຍິງພາຍໃນຂະແໜງການໄດ້ຮັບການ ເຄື່ອນໄຫວວຽກງານຂອງຕົນບົນພື້ນຖານການເສີມຂະຫຍາຍມູນເຊື້ອອັນດີງາມຂອງຊາດຂອງແມ່ຍິງລາວ ແນວທາງແຜນນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ລະບຽບການຕ່າງໆຕໍ່ແມ່ຍິງລາວ ພ້ອມນັ້ນ, ສະຫາຍຍັງໄດ້ກ່າວເຖິງການປະຕິບັດໜ້າທີ່ ທີ່ສໍາຄັນອີກອັນໜື່ງຂອງເອື້ອຍນ້ອງຍິງກໍ່ຄື ການປະຕິບັດໜ້າທີ່ໃນການເບິ່ງແຍງອົບຮົມລູກຫຼານ, ການເຕົ້າໂຮມຄວາມສາມັກຄີ, ການສ້າງສະຖາບັນຄອບຄົວໃຫ້ມີຄວາມຜາສຸກ ພາຍໃນຄອບຄົວ. ນອກຈາກນີ້, ສະຫາຍຍັງເນັ້ນ ໃຫ້ສືບຕໍ່ຮັກສາມູນເຊື້ອອັນດີງາມຂອງແມ່ຍິງລາວໄວ້ ເພື່ອໃຫ້ກາຍເປັນ ລູກສາວຜູ້ປະເສີດ ຂອງພັກ ແລະ ຂອງປະເທດຊາດ;
5. ຮັບຟັງການໂອ້ລົມ ແລະ ໃຫ້ທິດຊີ້ນໍາ ຂອງ ສະຫາຍ ປະທານຄະນະບໍລິຫານງານສະຫະພັນແມ່ຍິງ ກະຊວງພະລັງງານ ແລະ ບໍ່ແຮ່ ຊື່ງໄດ້ເປັນການຢັ້ງຢືນເຖິງ ການນໍາພາ-ຊີ້ນໍາຂອງຄະນະບໍລິຫານງານສະຫະພັນແມ່ຍິງກະຊວງ ຕໍ່ຂົງເຂດວຽກງານກວດກາ;
6. ກອງປະຊຸມໃຫຍ່ ໄດ້ປ່ອນບັດເລືອກຕັ້ງເອົາ ຄະນະໜ່ວຍສະຫະພັນແມ່ຍິງກົມກວດກາ ຊຸດໃໝ່ ຈຳນວນ 03 ທ່ານ ດັ່ງມີລາຍຊື່ລຸ່ມນີ້:
1) ສະຫາຍ ນາງ ພະທຸມວັນ ສຸລິຍະ ເປັນປະທານໜ່ວຍ
2) ສະຫາຍ ນາງ ເພັດດາວອນ ແສງສຸລິຈັນ ເປັນຮອງປະທານທັງເປັນປະທານກວດກາໜ່ວຍ
3) ສະຫາຍ ນາງ ລັດດາພອນ ວົງໄຊຍະລາດ ເປັນກໍາມະການໜ່ວຍ
ກອງປະຊຸມໃຫຍ່ ຮຽກຮ້ອງມາຍັງ ຄະນະໜ່ວຍ, ສະມາຊິກສະຫະພັນ ແມ່ຍິງທຸກສະຫາຍ ພາຍໃນໜ່ວຍຈົ່ງພ້ອມກັນຮັກສາຄວາມສາມັກຄີ ເປັນເອກະພາບ ພາຍໃຕ້ການນຳພາ-ຊີ້ນຳຂອງ ສະຫາຍເລຂາໜ່ວຍພັກກົມກວດກາ ເສີມຂະຫຍາຍມູນເຊື້ອຂອງຊາດ, ຂອງພັກ ຕິດພັນກັບຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ, ແນໃສ່ເສີມຂະຫຍາຍບົດບາດການນຳພາຂອງຄະນະໜ່ວຍ ແລະ ຜົນສັກສິດໃນ ການຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄຳສັ່ງ ຂອງພັກ, ເຮັດໃຫ້ ໜ່ວຍສະຫະພັນແມ່ຍິງກົມກວດກາ ມີຄວາມໜັກ ແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ແບບແຜນວິທີນຳພາ.
ພາບ: ກົມກວດກາ
ຂ່າວ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
