ກອງປະຊຸມ ສະຫລຸບການເຄື່ອນໄຫວ ຈັດຕັ້ງປະຕິບັດວຽກງານ ປະຈໍາປີ 2023 ແລະ ທິດທາງແຜນການ 2024 ຂອງ ພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ຈັດຂຶ້ນໃນທ້າຍອາທິດຜ່ານມາ ທີ່ ສະໂມສອນຂອງແຂວງ ໂດຍການເປັນປະທານຂອງ ທ່ານ ອາລຸນ ບຸນວິໄລ ຫົວຫນ້າພະແນກ ພະລັງງານ ແລະ ບໍ່ແຮ່, ມີຕາງຫນ້າການນຳເມືອງ, ພະແນກການຂັ້ນແຂວງ, ຫົວຫນ້າຫ້ອງການພະລັງງານ ແລະ ບໍ່ແຮ່ 7 ເມືອງ, ລັດວິສາຫະກິດ ໄຟຟ້າ ຂັ້ນແຂວງ ແລະ ເມືອງ ເຂົ້າຮ່ວມ.
ໃນກອງປະຊຸມ ໄດ້ຜ່ານຮ່າງບົດສະຫລຸບການເຄື່ອນໄຫວ ຈັດຕັ້ງປະຕິບັດວຽກງານ ພະລັງງານ ແລະ ບໍ່ແຮ່ ໃນໄລຍະ 1 ປີຜ່ານມາ ໂດຍຍົກໃຫ້ເຫັນເຖິງດ້ານດີ,ຜົນງານ,ດ້ານອ່ອນ ແລະ ຂໍ້ຄົງຄ້າງ ຈຳນວນຫນຶ່ງ. ເປັນຕົ້ນແມ່ນ ວຽກງານ ພະລັງງານ ເຊິ່ງທົ່ວແຂວງມີແຫລ່ງຜະລິດໄຟຟ້າ ທັງຫມົດ 4 ແຫ່ງ ສາມາດຜະລິດຜະລັງງານໄດ້ 122.098.663 ກິໂລວັດໂມງ ທຽບໃສ່ປີຜ່ານມາ ເກີນແຜນ 52.62%, ສາມາດຮັບພະລັງງານໄດ້ 148.017.407 ກິໂລວັດໂມງ ແລະ ຈໍາຫນ່າຍພະລັງງານໄດ້ 131.563.376 ກິໂລວັດໂມງ ທຽບໃສ່ແຜນປີ ບັນລຸ 101,20%, ມີປະຊາຊົນ ທີ່ຊົມໃຊ້ໄຟຟ້າ ທັງຫມົດ 60.635 ຄົວເຮືອນ ເທົ່າກັບ 94,89%, ວຽກງານຄຸ້ມຄອງບໍ່ແຮ່ ກໍໄດ້ມີການຂຸດຄົ້ນ ແລະ ປຸງແຕ່ງ ຈຳນວນ 9 ບໍລິສັດ ມີ 13 ກິດຈະການ ທີ່ຂັ້ນສູນກາງເປັນຜູ້ອະນຸຍາດ ໃນເນື້ອທີ່ 9.626 ເຮັດຕາ ໃນນີ້ ບໍລິສັດ ພາຍໃນ ມີ 3 ບໍລິສັດ ແລະ ຕ່າງປະເທດ 6 ບໍລິສັດ. ສ່ວນໂຄງການທີ່ຂັ້ນທ້ອງຖິ່ນອະນຸຍາດ ມີ 33 ຫົວຫນ່ວຍທຸລະກິດ ໃນນີ້ ແຮ່ຫີນອຸດສາຫະກຳ ຄື: ແຮ່ບາຣິດ ຈຳນວນ 3 ກິດຈະການ, ອັງຕີມອນ 1 ກິດຈະການ ແລະ ແຮ່ທາດອະໂລຫະ ສຳລັບ ການກໍ່ສ້າງ ຈຳນວນ 27 ກິດຈະການ ແລະ ການຜະລິດ ແຮ່ທາດ ປະເພດ ຫີນປູນ ຜະລິດໄດ້ 30 ພັນກວ່າແມັດກ້ອນ, ແຮ່ບາຣິດ 39 ພັນກວ່າໂຕນ, ແຮ່ເຫລັກ 3 ແສນກວ່າໂຕນ, ແຮ່ຄຳ 7 ແສນກວ່າໂຕນ ແລະ ແຮ່ຊືນ – ສັງກະສີ 250 ໂຕນ.
