ພິທີ ປະກາດ ແຕ່ງຕັ້ງ ຮອງຫົວຫນ້າພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ຈັດຂຶ້ນໃນທ້າຍອາທິດຜ່ານມາ ທີ່ສະໂມສອນແຂວງອຸດົມໄຊ. ໃນພິທີ ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງອຸດົມໄຊ ວ່າດ້ວຍການແຕ່ງຕັ້ງ ທ່ານ ຄໍາພຸດ ອິນທະວົງ ເປັນຮອງພະແນກ ພະລັງງານ ແລະ ບໍ່ແຮ່.
ການ ປະກາດ ແຕ່ງຕັ້ງ ຮອງຫົວຫນ້າພະແນກ ພະລັງງານ ກໍເພື່ອປະຕິບັດຕາມຄວາມຮຽກຮ້ອງຕ້ອງການຂອງຫນ້າທີ່ການເມືອງ ທັງເປັນການປັບປຸງ ລະບົບ ກົງຈັກ ການຈັດຕັ້ງ ຢູ່ພາຍໃນຂະແຫນງການຂອງຕົນ ໃຫ້ຖືກຕ້ອງ, ສອດຄ່ອງກັບສະພາບຄວາມເປັນຈິ່ງຂອງວຽກງານ ແລະ ຄົບຖ້ວນຕາມການກຳນົດຕຳແຫນ່ງງານ ໂດຍແນ່ໃສ່ເຮັດໃຫ້ການເຄື່ອນໄຫວວຽກງານ ມີປະສິດທິພາບ ແລະ ມີຜົນສຳເລັດຕາມລະດັບຄາດຫມາຍ.
ເປັນກຽດເຂົ້າຮ່ວມພິທີມີ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ທ່ານ ອາລຸນ ບຸນວິໄລ ຫົວຫນ້າພະແນກ ພະລັງງານ ແລະ ບໍ່ແຮ່, ມີຕາງຫນ້າຫ້ອງການ ພະລັງານ ແລະ ບໍ່ແຮ່ 7 ເມືອງ, ລັດວິສາຫະກິດໄຟຟ້າແຂວງ-ເມືອງ, ຂະແຫນງການອ້ອມຂ້າງແຂວງ ຕະຫລອດຮອດພະນັກງານພາຍໃນ ພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ເຂົ້າຮ່ວມ.
ຂ່າວ: ຄານມະນີ ຮຽນດໍຈັນ, ສະຖານີວິທະຍຸ ແລະ ໂທລະພາບ ແຂວງອຸດົມໄຊ
