ທ່ານລັດຖະມົນຕີ ກະຊວງພະລັງງານ ແລະ ບໍ່ແຮ່ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ

          ພາຍຫຼັງຮັບຟັງການລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານພະລັງງານ ແລະ ບໍ່ແຮ່ ຢູ່ແຂວງວຽງຈັນໃນໄລຍະຜ່ານມາແລ້ວ ຜູ້ເຂົ້າຮ່ວມກໍພັດປ່ຽນກັນປະກອບຄໍາຄິດ-ຄໍາເຫັນເພື່ອເປັນການແລກປ່ຽນບົດເຊິ່ງກັນ ແລະ ກັນ ລະຫວ່າງຂັ້ນສູນກາງ ກັບຂັ້ນທ້ອງຖິ່ນຫຼາຍບັນຫາ ຢ່າງກົງໄປກົງມາ ໂດຍສະເພາະກໍແມ່ນການອອກອະນຸຍາດ ແລະ ການຄຸ້ມຄອງດ້ານພະລັງງານ ແລະ ບໍ່ແຮ່, ການວາງແຜນການກໍ່ສ້າງສະຖານີໄຟຟ້າໃຫ້ບໍລິສັດ ຕ່າງໆ ທີມີການຂຸດຄົ້ນແຮ່ທາດ, ການຄຸ້ມຄອງການຂຸດຄົ້ນບໍ່ແຮ່ຕ່າງໆ ຢູ່ແຂວງວຽງຈັນ ແນໃສ່ເຮັດໃຫ້ວຽກງານດັ່ງກ່າວເດີນແມ່ນແລ່ນສະດວກດີຂຶ້ນກວ່າເກົ່າ. ຈາກນັ້ນ ທ່ານ ໂພໄຊ ໄຊຍະສອນ ກໍາມະການສູນກາງພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ກໍໄດ້ໃຫ້ກຽດຂຶ້ນໂອ້ລົມຕໍ່ພິທີ ໂດຍທ່ານໄດ້ເໜັ້ນໃຫ້ ພະແນກ ພະລັງງານ ແລະ ບໍ່ແຮ່ ແຂວງວຽງຈັນ ເອົາໃຈໃສ່ໃນການຈັດຕັ້ງປະຕິບັດວຽກງານທີ່ແຂວງຮັບຜິດຊອບ ໂດຍສະເພາະແມ່ນວຽກງງານດ້ານບໍ່ແຮ່ ທີ່ຕ້ອງໄດ້ຄຸ້ມຄອງບັນດາຫົວໜ່ວຍຊອກຄົ້ນສໍາຫຼວດ, ຂຸດຄົ້ນ ແລະ ປຸງແຕ່ງບໍ່ແຮ່ ເພື່ອໃຫ້ຖືກຕ້ອງຕາມກົດໝາຍ ແລະ ລະບຽບການທີ່ວາງອອກ ໂດຍສ້າງລາຍຮັບອັນແນ່ນອນເຂົ້າມາພັດທະນາເສດຖະກິດ-ສັງຄົມ ກໍຄືພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ ພ້ອມນີ້ກໍໃຫ້ທາງພະແນກ ພະລັງງານ ແລະ ບໍ່ແຮ່ ແຂວງ ຂຽນແຜນພັດທະນາດ້ານບໍ່່ແຮ່ໃຫ້ລະອຽດຊັດເຈນ ເພື່ອວາງແຜນແກ້ໄຂບັນຫາຜົນກະທົບຕໍ່ສິ່ງແວດລ້ອມ-ສັງຄົມ ແລະ ຫຼີກລ່ຽງຫາງສຽງສັງຄົມຈົ່ມວ່າຕໍ່ການພັດທະນາວຽກງານດັ່ງກ່າວ. ນອກນີ້ກໍໃຫ້ເອົາໃຈໃສ່ສະຫຼຸບລາຍງານວຽກຂອງຕົນໃຫ້ກະຊວງ ພບ ຮັບຊາບຢ່າງເປັນປົກກະຕິ ແລະ ທັນເວລາ.