ໃນວັນທີ: 07 ມີນາ 2024 ທີ່ໂຮງແຮມ ແລນມາກ ແມ່ຂອງ ລີເວີໄຊ, ນະຄອນຫຼວງວຽງຈັນ. ກົມທຸລະກິດພະລັງງານ (ກທພ), ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມຄະນະກຳມະການຊີ້ນໍາຮ່ວມໂຄງການ ເຂື່ອນໄຟຟ້ານໍ້າຂອງຫຼວງພະບາງ ຄັ້ງທີ 1 ຂຶ້ນ ໃນຖານະເປັນກອງເລຂາຄະນະກຳມະການຊີ້ນໍາຮ່ວມໂຄງການ ພາຍໃຕ້ການເປັນປະທານຂອງ ທ່ານ ໂພໄຊ ໄຊຍະສອນ ລັດຖະມົນຕີ ກະຊວງ ພະລັງງານ ແລະ ບໍ່ແຮ່, ມີບັນດາ ທ່ານ ລັດຖະມົນຕີ, ຮອງລັດຖະມົນຕີ, ຮອງເຈົ້າແຂວງ ແລະ ຄະນະກຳມະການຈາກຂະແໜງການທີ່ກ່ຽວຂ້ອງທັງຢູ່ສູນກາງ ແລະ ທ້ອງຖິ່ນ (ແຂວງໄຊຍະບູລີ, ຫຼວງພະບາງ, ອຸດົມໄຊ) ພ້ອມດ້ວຍຜູ້ພັດທະນາໂຄງການເຂົ້າຮ່ວມ.
ກອງປະຊຸມໃນຄັ້ງນີ້ຈັດຂຶ້ນ ເພື່ອປະຕິບັດຕາມພາລະບົດບາດຂອງຄະນະກຳມະການ ຊີ້ນໍາຮ່ວມໂຄງການ ໃນການຕິດຕາມກວດກາ ແລະ ຕີລາຄາສະພາບຄວາມຄືບໜ້າການຈັດຕັ້ງປະຕິບັດໂຄງການໃນ ໄລຍະຜ່ານມາ ລວມທັງຂໍ້ສະດວກ, ຂໍ້ຫຍຸ້ງຍາກ ແລະ ບັນຫາອື່ນໆ ເພື່ອພ້ອມກັນປຶກສາຫາລື ໃຫ້ທິດຊີ້ນໍາຢ່າງເໝາະສົມ ຮັບປະກັນການຈັດຕັ້ງປະຕິບັດໂຄງການໄດ້ດໍາເນີນການຢ່າງຕໍ່ເນື່ອງ ແລະ ສຳເລັດຕາມແຜນທີ່ວາງໄວ້.
ທ່ານ ສົມພິດ ແກ້ວວິຈິດ ຫົວໜ້າກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່ ໄດ້ຂຶ້ນນໍາສະເໜີກ່ຽວກັບຄວາມເປັນມາຂອງໂຄງການ, ຂໍ້ມູນດ້ານເຕັກນິກດ້ານເສດຖະກິດ ແລະ ການນຳໃຊ້ແຮງງານ. ນອກນັ້ນຍັງໄດ້ນຳສະເໜີຄວາມຄືບໜ້າການຈັດຕັ້ງປະຕິບັດໂຄງການ ແລະ ການຈັດຕັ້ງປະຕິບັດໜ້າທີ່ຂອງ ກົມທຸລະກິດພະລັງງານ ໃນຖານະກອງເລຂາຂອງຄະນະກຳມະການຊີ້ນໍາລວມຂອງໂຄງການ. ຫຼັງຈາກນັ້ນ, ບັນດາໜ່ວຍງານຈັດສັນຈາກພາກສ່ວນທີ່ກ່ຽວຂ້ອງ ເປັຍຕົ້ນແມ່ນ: ລາຍງານກ່ຽວກັບວຽກງງານຄຸ້ມຄອງສິ່ງແວດລ້ອມ ຈາກໜ່ວຍງານຈັດສັນຂອງກະຊວງຊັບພະຍາກອນ ແລະ ສິ່ງແວດລ້ອມ, ລາຍງານການຈັດຕັ້ງປະຕິບັດຂອງໜ່ວຍງານ EMU ຈາກພາກສ່ວນຂອງແຂວງ ຫຼວງພະບາງ, ແຂວງອຸດົມໄຊ ແລະ ແຂວງ ໄຊຍະບູລີ. ນອກນັ້ນ ບໍລິສັດພັດທະນາໂຄງການ ກໍໄດ້ລາຍງານຂໍ້ສະດວກ, ຂໍ້ຫຍຸ້ງຍາກ, ຂໍ້ສະເໜີ ແລະ ແຜນການຈັດຕັ້ງປະຕິບັດໂຄງການໃນຕໍ່ໜ້າຕື່ມອີກ.
ພາຍຫຼັງຮັບຟັງການລາຍງານຈາກແຕ່ລະພາກສ່ວນແລ້ວ, ຜູ້ເຂົ້າຮ່ວມກອງປະຊຸມ ກໍ່ໄດ້ພ້ອມກັນປຶກສາຫາລື ແລະ ແລກປ່ຽນຄວາມຄິດເຫັນຮ່ວມກັນຢ່າງກົງໄປກົງມາ ເພື່ອເຮັດໃຫ້ການຈັດຕັ້ງປະຕິບັດໂຄງການ ດຳເນີນໄປຕາມກົດໝາຍ, ລະບຽບການ ແລະ ສັນຍາພັດທະນາໂຄງການ ລັດຖະບານ ແລະ ຜູ້ພັດທະນາໂຄງການໄດ້ລົງນາມຮ່ວມກັນ ທັງຮັບປະກັນໃຫ້ໂຄງການສາມາດຈັດຕັ້ງປະຕິບັດສຳເລັດຕາມແຜນການທີ່ວາງໄວ້.
ພາບ ແລະ ຂ່າວ: ລຸ້ງຟ້າ ອົບພະຈັນ
ຮຽບຮຽງ: ຄຳແສງ ແກ້ວປະເສີດ
Website:www.mem.gov.la
ສາຍດ່ວນ: 1506
