ໃນຕອນບ່າຍຂອງ ວັນທີ 24 ພຶດສະພາ ປີ 2024 ຜ່ານມານີ້, ທ່ານ ຈັນທະບູນ ສຸກອາລຸນ, ກໍາມະການ ຄະນະພັກກະຊວງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ລົງພົບປະໂອ້ລົມ ແລະ ເຮັດວຽກວິຊາສະເພາະ ຢູ່ສະຖາບັນຄົ້ນຄວ້າພະລັງງານ ແລະ ບໍ່ແຮ່( ສພບ) ໂດຍໃຫ້ກຽດຕ້ອນຮັບຢ່າງອົບອຸ່ນ ຈາກທ່ານ ປອ. ອະນຸສັກ ພົງສະຫວັດ ວ່າການແທນຫົວໜ້າສະຖາບັນຄົ້ນຄວ້າພະລັງງານ ແລະ ບໍ່ແຮ່ ພ້ອມດ້ວຍຄະນະ ແລະ ພະນັກງານລັດຖະກອນເຂົ້າຮ່ວມຢ່າງພ້ອມພຽງ.
ທ່ານ ປອ. ອະນຸສັກ ພົງສະຫວັດ ວ່າການແທນຫົວໜ້າສະຖາບັນຄົ້ນຄວ້າພະລັງງານ ແລະ ບໍ່ແຮ່ ໄດ້ຕາງໜ້າໃຫ້ຕາງໜ້າໃຫ້ຄະນະໜ່ວຍພັກ, ຄະນະສະຖາບັນ ແລະ ພະນັກງານ ລັດຖະກອນພາຍໃນສະຖາບັນຄົ້ນຄວ້າພະລັງງານ ແລະ ບໍ່ແຮ່ ລາຍງານໂດຍຫຍໍ້ກ່ຽວກັບໃນການກໍ່ສ້າງ ແລະ ຍົກລະດັບດ້ານວິຊາການ, ໃນການຄົ້ນຄວ້າ, ວິໄຈ, ທົດລອງ ແລະ ຢັ້ງຢືນ, ຮັບຮອງຄວາມຖືກຕ້ອງທາງດ້ານເຕັກນິກ ແລະ ບໍລິການດ້ານວິຊາການຂະແໜງພະລັງງານ, ທໍລະນິສາດ ແລະ ບໍ່ແຮ່ ໃນຂອບເຂດທົ່ວປະເທດ.
ສະຖາບັນຄົ້ນຄວ້າພະລັງງານ ແລະ ບໍ່ແຮ່ ປະກອບດ້ວຍ 1 ພະແນກ ແລະ 4 ສູນຄື: ພະແນກສັງລວມຂໍ້ມູນຂ່າວສານ, ສູນຝຶກອົບຮົມພະລັງງານ, ທໍລະນີສາດ ແລະ ບໍ່ແຮ່, ສູນຄົ້ນຄວ້າພະລັງງານທົດແທນ ແລະ ພະລັງງານໃໝ່ສູນຄົ້ນຄວ້າທໍລະນີສາດ ແລະ ບໍ່ແຮ່ ແລະ ສູນວິໄຈ ແລະ ທົດສອບ. ຕະຫຼອດໄລຍະທີ່ຜ່ານມາ, ສະຖາບັນຄົ້ນຄວ້າພະລັງງານ ແລະ ບໍ່ແຮ່ ສາມາດເຮັດຫລ້ອນໜ້າທີ່ຕາມພາລະບົດບາດ ທີ່ໄດ້ຮັບມອບໝາຍຈາກກະຊວງພະລັງງານ ແລະ ບໍ່ແຮ່ ໃນການກໍ່ສ້າງ, ຍົກລະດັບດ້ານວິຊາການ, ສຶກສາຄົ້ນຄວ້າ, ວິໄຈ, ທົດລອງ, ຢັ້ງຢືນ, ຮັບຮອງຄວາມຖືກຕ້ອງທາງດ້ານເຕັກນິກທໍລະນີສາດ ແລະ ບໍ່ແຮ່ ໃນຂອບເຂດທົ່ວປະເທດ.
ສໍາລັບວຽກງານອັນພົ້ນເດັ່ນ ຂອງຂະແໜງພະລັງງານ ແມ່ນໄດ້ມີການຮ່ວມມືທັງພາຍໃນ ແລະ ສາກົນ ໃນຫລາຍດ້ານ ເປັນຕົ້ນ ກັບອົງການຈັດຕັ້ງສາກົນ ອົງການ ຢູນີໂດ ສ້າງສູນຮຽນຮູ້ ກ່ຽວກັບ ພະລັງງານທົດແທນ ໄບໂອມັສ, ຮ່ວມມືກັບ ມະຫາວິທະຍາໄລ ສ້າງຄູຢູນານ ດ້ານການສ້າງບຸກຄະລາກອນ ທຶນຄົ້ນຄວ້າປະລິນຍາໂທ ແລະ ປະລິນຍາເອກ ປີລະ 2 ທ່ານ, ຮ່ວມຄົ້ນຄວ້າຫ້ອງວິໃຈ ກັບມະຫາວິທະຍາໄລ ວິທະຍາສາດ ຂຸນຫມິງ. ສ່ວນວຽກງານ ທໍລະນີສາດ ແລະ ບໍ່ແຮ່ ແມ່ນໄດ້ດໍາເນີນການ ວິໄຈ ແລະ ທົດສອບ ແຮ່ທາດຕ່າງໆ ທີ່ບໍລິສັດເອກະຊົນ ທັ້ງພາຍໃນແລະຕ່າງປະເທດໄດ້ສົ່ງຕົວຢ່າງແຮ່ທາດ ມາວິໃຈຢູ່ສູນວິໃຈແລະທົດສອບ ຂອງ ສພບ ເພື່ອອອກໃບຢັ້ງຢືນ.
ໃນຕອນທ້າຍຂອງກອງປະຊຸມ ທ່ານ ຮອງລັດຖະມົນຕີ ຍັງໄດ້ມີຄໍາເຫັນໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມຊົມຕໍຜົນງານງານທາງສະຖາບັນທີຍາດມາໄດ້ໃນໄລຍະຜ່ານມາ. ພ້ອມກັນນີ້ທ່ານກໍ່ຍັງເນັ້ນໃຫ້ ສະຖາບັນເອົາໃຈໃສ່ໃນການຄົ້ນຄວ້າວິໃຈບໍ່ວ່າຈະເປັນວຽກງານທາງດ້ານພະລັງງານ ແລະ ວຽກງານດ້ານບໍ່ແຮ່, ໃຫ້ວາງແຜນການປັບປຸງຫ້ອງທົດລອງວິໃຈ ໃຫ້ທັນສະໄໝທຽບເທົ່າສາກົນ, ຍົກລະດັບຄວາມຮູ້ຄວາມສາມາດດ້ານວິຊາການຂອງພະນັກ ງານໃຫ້ມີຄວາມພ້ອມດ້ານວິຊາສະເພາະໃຫ້ໄດ້ຫຼາຍໆ.
ພາບ ແລະ ຂ່າວ: ສະຖາບັນຄົ້ນຄວ້າພະລັງງານ ແລະ ບໍ່ແຮ່
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
