ຄະ​ນະ​ບໍ​ລິ​ຫານ​ງານ ສະ​ຫະ​ພັນ​ແມ່​ຍິງ​ກະ​ຊວງ ພະ​ລັງ​ງານ ແລະ ບໍ່​ແຮ່ ສຳ​ເລັດ​ດຳ​ເນີນກອງ​ປະ​ຊຸມ ຂອງຕົນ

ຄະນະບໍລິຫານງານ ສະຫະພັນແມ່ຍິງກະຊວງ ພະລັງງານ ແລະ ບໍ່ແຮ່ ສຳເລັດດຳເນີນກອງປະຊຸມປະຈຳໄຕ IV ສົກປີ 2021 ພ້ອມທັງວາງແຜນຈຸດສຸມໃນໄຕມາດ I ປີ 2022

​ກອງ​ປະ​ຊຸມ​ໄດ້​ຈັດ​ຂຶ້ນ​ໃນ​ວັນ​ທີ 30 ທັນ​ວາ 2021 ໃນ​ຮູບ​ແບບກອງ​ປະ​ຊຸມ​ທາງ​ໄກ ໂດຍ​ການ​ເປັນ​ປະ​ທານ​ຂອງ ສະ​ຫາຍ ນາງ ແສງ​ເດືອນ ວົງ​ອິນ ຄະ​ນະ​ພັກ​ກະ​ຊວງ, ຄະ​ນະ​ບໍ​ລິ​ຫານ​ງານ​ສູນ​ກາງ ສະ​ຫະ​ພັນ​ແມ່​ຍິງ​ລາວ, ປະ​ທານ​ຄະ​ນະ​ບໍ​ລິ​ຫານ​ງານ ສະ​ຫະ​ພັນ​ແມ່​ຍິງ​ກະ​ຊວງ ພະ​ລັງ​ງານ ແລະ ບໍ່​ແຮ່. ມີ​ບັນ​ດາ ສະ​ຫາຍ ຮອງ​ປະ​ທານ ແລະ ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ກະ​ຊວງ ເຂົ້າ​ຮ່ວມ​ຢ່າງ​ພ້ອມ​ພຽງ.

          ກອງ​ປະ​ຊຸມ​ຄັ້ງ​ນີ້, ໄດ້​ພ້ອມ​ກັນ ທົບ​ທວນ ແລະ ຕີ​ລາ​ຄາ​ຄືນ​ສະ​ພາບ​ທີ່​ພົນ​ເດັ່ນ​ໃນ​ໄລ​ຍະ 1 ປີ​ຜ່ານ​ມາ​ເປັນ​ຕົ້ນ​ແມ່ນ: ວຽກ​ງານສຶກສາອົບຮົມດ້ານການເມືອງ-ແນວຄິດ, ວຽກ​ງານປັບ​ປຸງ​ການ​ຈັດ​ຕັ້ງ, ວຽກ​ງານສົ່ງ​ເສີມ​ຄວາມ​ກ້າວ​ໜ້າ​ຂອງ​ແມ່​ຍິງ, ວຽກ​ງານ​ຂະ​ບວນ​ການ, ວຽກ​ງານ​ຊ່ວຍ​ເຫຼືອ​ສັງ​ຄົມ, ວຽກ​ງານກວດ​ກາ, ວຽກ​ງານ​ວິ​ຊາ​ສະ​ເພາະ, ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ, ວຽກ​ງານ​ເຂົ້າ​ຮ່ວມ ແລະ ຈັດ​ກອງ​ປະ​ຊຸມ, ວຽກ​ງານຍ້ອງ​ຍໍ ແລະ ວຽກ​ງານ​ການ​ເງິນ​. ພ້ອມ​ກັນ​ນີ້, ຜູ້​ແທນກອງ​ປະ​ຊຸມ​ຍັງ​ໄດ້​ປະ​ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ແລະ ສ້າງ​ສັນ ຕໍ່​ຂໍ້​ຄົງ​​ຄ້າງ ແລະ ຈຸດ​ອ່ອນ ເຊິ່ງ​ເປັນ​ການ​ທ້ວງ​ດຶງ​ຕໍ່​ກາ​ນ​ພັດ​ທະ​ນາ​ແມ່​ຍິງ​ລາວ​ເວົ້າ​ລວມ, ເວົ້າ​ສະ​ເພາະ​ຕໍ່​ເອື້ອຍ​ນ້ອງ​ແມ່​ຍິງ​ພາຍ​ໃນ​ກະ​ຊວງ ພະ​ລັງ​ງານ ແລະ ບໍ່​ແຮ່. ນອກ​ຈາກນີ້, ກອງ​ປະ​ຊຸມ​ຍັງ​ໄດ້ພ້ອມ​​ກັນ​ຄົ້ນ​ຄວ້າ-ແລກ​ປ່ຽນ ແລະ ຖອດ​ຖອນ​ບົດ​ຮຽນ​ຮ່ວມ​ກັນ​ ເພື່ອຊອກ​ຫາ​ສາຍ​ເຫດ ແລະ ວິ​ທີ​ການແກ້​ໄຂ​ໃນ​ຊຸມ​ປີ​ຕໍ່​ໜ້າ​ຕື່ມ​ອີກ. ກອງ​ປະ​ຊຸມ ມີ​ຄວາມ​ເປັນ​ເອ​ກະ​ພາບ​ສູງ ​ແລະ ເຫັນ​ດີ​ຈະ​ພ້ອມ​ກັນ​ສູ້​ຊົນ​ຈັດ​ຕັ້ງ​ປະ​ຕິ​ບັດ​ແຜນ​ການ​ເຄື່ອນ​ໄຫວ​ ປະ​ຈຳ​ປີ 2022 ຂອງ ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ກະ​ຊວງ ພະ​ລັງ​ງານ ແລະ ບໍ່​ແຮ່ ​ວາງ​ອອກໃຫ້​ບັນ​ລຸ​ຕາມ​ລຳ​ດັບ​ຄາດ​ໝາຍ​ທີ່​ວາງ​ໄວ້.

ຕອນ​ທ້າຍ​ຂອງກອງ​ປະ​ຊຸມ ສະ​ຫາຍ ນາງ ແສງ​ເດືອນ ວົງ​ອິນ ຄະ​ນະ​ພັກ​ກະ​ຊວງ, ຄະ​ນະ​ບໍ​ລິ​ຫານ​ງານ​ສູນ​ກາງ​ສະ​ຫະ​ພັນ​ແມ່​ຍິງ​ລາວ, ປະ​ທານ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ແມ່​ຍິງ​ກະ​ຊວງ ໄດ້​ຮຽກ​ຮ້ອງ​ໃຫ້​ການ​ນຳ​ສະ​ຫະ​ພັນ​ແມ່​ຍິງ​ທຸກ​ຂັ້ນ ແລະ ເອື້ອຍ​ນ້ອງ​ແມ່​ຍິງ​ທຸກ​ຄົນສຶບຕໍ່ສຶກສາອົບຮົມແນວຄິດການເມືອງ, ຄຸນທາດການເມືອງ ແລະ ຄຸນສົມບັດສິນທໍາປະຕິວັດ ຂອງ ເອື້ອຍນ້ອງແມ່ຍິງກໍ່ຄືສະມາຊິກແມ່ຍິງກະຊວງພະລັງງານ ແລະ ບໍ່ແຮ່; ປັບປຸງກົງຈັກການຈັດຕັ້ງຂອງໜ່ວຍ ຕາມການປັບປຸງກົງຈັກການຈັດຕັ້ງຂອງ ກະຊວງ ພບ ແລະ ກົດລະບຽບສະຫະພັນແມ່ຍິງສະໄໝທີ VIII ທີ່ຖືກຮັບຮອງໃນກອງປະຊຸມ; ສືບຕໍ່ຈັດຕັ້ງປະຕິບັດວຽກງານກວດກາແມ່ຍິງເພື່ອຊຸກຍູ້ສົ່ງເສີມບັນດາໜ່ວຍ ສະຫະພັນແມ່ຍິງອ້ອມຂ້າງໃຫ້ເຂັ້ມແຂງ; ສ້າງແຜນພັດທະນາແມ່ຍິງກະຊວງພະລັງງານ ແລະ ບໍ່ແຮ່ 5 ປີ ( 2021-2025) ຜັນຂະຫຍາຍຈາກມະຕິຂອງກອງປະຊຸມອົງຄະນະພັກກະຊວງ ຄັ້ງທີ 3 ແລະ ກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 8;ສືບຕໍ່ນໍາພາ ເອື້ອຍນ້ອງແມ່ຍິງເຂົ້າຮ່ວມສ້າງຂະບວນການຕ່າງໆ ໃຫ້ ຟົດຟື້ນ ແລະ ຫຼາຍຮູບຫຼາຍສີ; ສືບຕໍ່ປະສານສົມທົບເພື່ອຈັດຕັ້ງປະຕິບັດ ແຜນພັດທະນາເພື່ອຄວາມສະເໝີພາບຍິງ-ຊາຍ ຂອງກະຊວງພະລັງງານ ແລະ ບໍ່ແຮ່ 5 ປີ ຄັ້ງທີ II (2021-2025); ກະກຽມຈັດກອງປະຊຸມເຜີຍແຜ່ມະຕິຂອງກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 8; ກະກຽມຈັດພິທີມອບຮັບຍ້ອງຍໍຜົນງານການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງ ສະຫະພັນແມ່ຍິງກະຊວງໄລຍະ( 2016-2020) ແລະ ສືບຕໍ່ເປີດບັ້ນຂະບວນການແຂ່ງຂັນ 3 ດີໃຫ້ຕິດພັນກັບຂະບວນການວິຊາສະເພາະ ແລະ ໃຫ້ມີບຸກຄົນຕົວແບບສໍາລັບຂະແໜງການພະລັງງານ ແລະ ບໍ່ແຮ່.

ພ​າບ ແລະ ແຫຼ່ງ​ຂໍ້​ມູນ: ສະ​ຫະ​ພັນ​ແມ່​ຍິງ​ກະ​ຊວງ

ຮຽບ​ຮຽງ​ຂ່າວ: ຄຳ​ແສງ ແກ້ວ​ປະ​ເສີດ