ທ່ານ ລັດຖະມົນຕີ ຕ້ອນຮັບ ທ່ານ ເອກອັກຄະລັດຖະທູດ ອົດສະຕາລີ ເຂົ້າຢ້ຽມຢາມຂໍ່ນັບ

          ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ ທ່ານ ນາງ Megan Jones ໄດ້ຮັບໜ້າທີ່ໃໝ່ເປັນເອກອັກຄະລັດຖະທູດ ອົດສະຕາລີ ປະຈຳ ສປປລາວ ເຊິ່ງເປັນຂີດໝາຍແຫ່ງການພົວພັນຮ່ວມມືທີ່ດີ ແລະ ມີບັນຍາກາດຟົດຟື້ນລະຫວ່າງ ສປປລາວ ແລະ ອົດສະຕາລີ ໂດຍສະເພາະແມ່ນຜົນສຳເລັດການສະເຫຼີມສະຫຼອງ 60 ປີ ສາຍພົວພັນການທູດລະຫວ່າງສອງປະເທດທີ່ຈັດຂຶ້ນໃນຕົ້ນປີ 2024 ທີ່ຜ່ານມາ. ພ້ອມກັນນີ້, ທ່ານ ລັດຖະມົນຕີ ຍັງໄດ້ລາຍງານຫຍໍ້ ກ່ຽວກັບຜົນສຳເລັດການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ຂອງ ສປປລາວ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ທ່ານ ລັດຖະມົນຕີ ສະແດງຄວາມຮຸ້ບຸນຄຸນ ແລະ ຂອບໃຈຢ່າງສູງ ຕໍ່ລັດຖະບານ ອົດສະຕາລີ ທີ່ໃຫ້ການຊ່ວຍເຫຼືອ ຂະແໜງການພະລັງງານ ແລະ ບໍ່ແຮ່ ສປປລາວ ມາໂດຍຕະຫຼອດ ເຊິ່ງຜົນສຳເລັດຂອງຂະແໜງການ ພະລັງງານ ແລະ ບໍ່ແຮ່ ໃນໄລຍະຜ່ານມານັ້ນ ດ້ານໜຶ່ງກໍ່ຍ້ອນໄດ້ຮັບການສະໜັບສະໜູນ, ຊ່ວຍເຫຼືອຈາກປະເທດເພື່ອນມິດສາກົນ ໃນນີ້ກໍ່ລວມທັງ ອົດສະຕາລີ. . ຕອນທ້າຍຂອງການພົບປະ, ປຶກສາຫາລືກັນ ທ່ານ ລັດຖະມົນຕີ ຍັງໄດ້ສະເໜີໃຫ້ ທ່ານ ທູດ ສືບຕໍ່ປຸກລະດົມ, ຂົ້ນຂວາຍ ແລະ ສະໜັບສະໜູນ ນັກລົງທຶນຈາກ ອົດຕາລີ ເຂົ້າມາລົງທຶນພັດທະນາອຸດສາຫະກຳພະລັງງານໄຟຟ້າ ແລະ ບໍ່ແຮ່ ຢູ່ ສປປລາວ ໃຫ້ຫຼາຍຂື້ນກວ່າເກົ່າ ໂດຍສະເພາະແມ່ນພະລັງງານແສງແດດ ແລະ ພະລັງງານລົມ ເຊິ່ງເປັນພະລັງງານສະອາດ ທີ່ ສປປລາວ ມີທ່າແຮງພັດທະນາເກືອບທົ່ວປະເທດ.