ກອງປະຊຸມໃຫຍ່ ຄັ້ງທີ III ຂອງໜ່ວຍ ກຳມະບານຮາກຖານ ກົມນະໂຍບາຍ ແລະ ແຜນພະລັງງານ ໄດ້ໄຂຂື້ນ ແລະ ອັດລົງດ້ວຍຜົນສຳເລັດຢ່າງຈົບງາມໃນຕອນເຊົ້າວັນທີ 15 ກໍລະກົດ 2024 ນີ້ ຢູ່ຫ້ອງປະຊຸມໃຫຍ່ຊັ້ນ5, ພາຍໃຕ້ການເປັນປະທານຂອງ ສະຫາຍ ວິທູນລະບັນດິດ ທຸມມະບຸດ ຄະນະບໍລິຫານງານກຳມະບານກະຊວງ, ປະທານໜ່ວຍກຳມະບານຮາກຖານ ກົມນະໂຍບາຍ ແລະ ແຜນພະລັງງານ. ໃຫ້ກຽດ ເຂົ້າຮ່ວມຂອງ ສະຫາຍ ບົວເທບ ມາໄລຄຳ ກຳມະການຄະນະບໍລິຫານງານພັກກະຊວງ, ຮອງປະທານສະຫະພັນກຳມະບານ ກະຊວງພະລັງງານ ແລະ ບໍ່ແຮ່; ສະຫາຍ ນາງ ສັນຕິສຸກ ພິມພະຈັນ ຮອງເລຂາໜ່ວຍພັກ, ຮັກສາການຫົວໜ້າກົມນະໂຍບາຍ ແລະ ແຜນພະລັງງານ; ມີບັນດາສະຫາຍ ຄະນະບໍລິຫານງານກຳມະບານກະຊວງພະລັງງານ ແລະ ບໍ່ແຮ່; ຄະນະໜ່ວຍພັກ, ຄະນະກົມນະໂຍບາຍ ແລະ ແຜນພະລັງງານ; ຄະນະກຳມະບານຮາກຖານ, ໜ່ວຍຮາກຖານ ອ້ອມຂ້າງກະຊວງ, ຕາງໜ້າອົງການຈັດຕັ້ງພາຄີ ຊາວໜຸ່ມ ແລະ ແມ່ຍິງ ພ້ອມດ້ວຍຜູ້ແທນກອງປະຊຸມໃຫຍ່ ເຂົ້າຮ່ວມທັງໝົດ 37 ສະຫາຍ.
ສະຫາຍ ວິທູນລະບັນດິດ ທຸມມະບຸດ ຄະນະບໍລິຫານງານກຳມະບານກະຊວງ, ປະທານໜ່ວຍກຳມະບານຮາກຖານ ກົມນະໂຍບາຍ ແລະ ແຜນພະລັງງານ ໄດ້ຂຶ້ນກ່າວເປີດກອງປະຊຸມ ພ້ອມທັງລາຍງານບົດລາຍງານການເມືອງທັງສອງພາກຕໍ່ກອງປະຊຸມ. ໃນບົດລາຍງານດັ່ງກ່າວ ໄດ້ຕີລາຄາຢ່າງພາວະວິໄສ ເຖິງຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ ໃນການເຄື່ອນໄຫວວຽກງານກຳມະບານຢູ່ພາຍໃນກົມນະໂຍບາຍ ແລະ ແຜນພະລັງງານ. ໜ່ວຍຮາກຖານ ກຳມະບານ ກົມນະໂຍບາຍ ແລະ ແຜນພະລັງງານ ເປັນໜຶ່ງໃນ 3 ອົງການຈັດຕັ້ງມະຫາຊົນ ພາຍໃຕ້ການຊີ້ນຳ-ນຳພາ ໂດຍກົງ ແລະ ຮອບດ້ານ ຂອງໜ່ວຍພັກກົມນະໂຍບາຍ ແລະ ແຜນພະລັງງານ ແລະ ຄະນະບໍລິຫານງານ ກຳມະບານ ກະຊວງ ມີພາລະບົດບາດເປັນເສນາທິການໃຫ້ໜ່ວຍພັກກົມນະໂຍບາຍ ແລະ ແຜນພະລັງງານ, ຄະນະກົມກົມນະໂຍບາຍ ແລະ ແຜນພະລັງງານ ແລະ ຄະນະບໍລິຫານງານ ກຳມະບານກະຊວງ ໃນການເຕົ້າໂຮມຄວາມສາມັກຄີພາຍໃນກົມນະໂຍບາຍ ແລະ ແຜນພະລັງງານ ໃຫ້ມີຄວາມປຶກແຟ້ນແໜ້ນໜາ, ຊ່ວຍເຫຼືອຮັກແພງເຊິ່ງກັນ ແລະ ກັນ; ຕິດຕາມ, ກໍ່ສ້າງ ແລະ ຝຶກຝົນຫຼໍ່ຫຼອມ ໃຫ້ກັບສະມາຊິກ ໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມຮູ້, ຄວາມສະມາດ ກາຍເປັນພະນັກງານ-ຫຼັກແຫຼ່ງ, ພະນັກງານຜູ້ສືບທອດຂອງພັກ. ປັດຈຸບັນ ມີຄະນະໜ່ວຍ 3 ສະຫາຍ, ຍິງ 1 ສະຫາຍ; ມີສະມາຊິກທັງ ໝົດ 30 ສະຫາຍ, ຍິງ 10 ສະຫາຍ ໃນນີ້, ເປັນສະມາຊິກພັກ 23 ສະຫາຍ ເປັນຍິງ 7 ສະຫາຍ, ເປັນສະມາຊິກກໍາມະບານ 30 ສະຫາຍ, ເປັນສະມາຊິກແມ່ຍິງ 10 ສະຫາຍ ; ປະກອບມີ 5 ຈຸຊ່ວຍວຽກ.
