ໃນໂອກາດສະເຫຼີ່ມສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 66 ປີ ທີ່ໝູນວຽນອີກວາລະໜຶ່ງໃນປີ 2022 ນີ້, ສະຫາຍ ປອ ອະນຸສັກ ພົງສະຫວັດ ຮອງປະທານຄະນະບໍລິຫານງານສະຫະພັນກຳມະບານກະຊວງ ພະລັງງານ ແລະ ບໍ່ແຮ່ ພ້ອມຄະນະ ເຂົ້າອວຍພອນການນຳສູນກາງສະຫະພັນກຳມະບານລາວ ໂດຍໃຫ້ກຽດຕ້ອນຮັບຂອງ ສະຫາຍ ວິໄລ ວົງຂະເສີມ ຮອງປະທານສູນກາງສະຫະພັນກຳມະບານລາວ ພ້ອມດ້ວຍຄະນະ ຢູ່ ຫ້ອງຮັບແຂກຂອງສູນກາງສະຫະພັນກຳມະບານລາວ.
ໃນໂອກາດດັ່ງກ່າວ ສະຫາຍ ປອ ອະນຸສັກ ພົງສະຫວັດ ໄດ້ຕາງໜ້າໃຫ້ ຄະນະບໍລິຫານງານ ແລະ ສະມາຊິກກຳມະບານທົ່ວກະຊວງ ພະລັງງານ ແລະ ບໍ່ແຮ່ ໄດ້ກ່າວຄຳອວຍພອນໃຫ້ຄະນະພັກ, ຄະນະນຳສູນກາງສະຫະພັນກຳມະລາວ ໃຫ້ເຕີບໃຫຍ່ເຂັ້ມແຂງ, ສືບຕໍ່ເປັນຂັນທຸງໃຫ້ຊາວກຳມະກອນລາວບັນດາເຜົ່າເວົ້າລວມ, ເວົ້າສະເພາະ ພະນັກງານ-ກຳມະກອນ ໃນຂົງເຂດພະລັງງານ ແລະ ບໍ່ແຮ່ ເຊິ່ງເປັນຂະແໜງການ ທີ່ມີກຳລັງແຮງງານຫຼາຍ ກຳລັງປະຕິບັດໜ້າທີ່ວຽກງານຂອງຕົນຢູ່ຕາມບັນດາໂຄງການລົງທຶນດ້ານພະລັງງານ ແລະ ບໍ່ແຮ່ ໃນຂອບເຂດທົ່ວປະເທດ. ພ້ອມກັນນີ້, ສະຫາຍ ຮອງປະທານຄະນະບໍລິຫານງານສະຫະພັນກຳມະບານກະຊວງ ພະລັງງານ ແລະ ບໍ່ແຮ່ ຍັງໄດ້ນຳເອົາເງິນສົດ ແລະ ເຄື່ອງບໍລິໂພກ-ອຸປະໂພກ ລວມມູນຄ່າທັງໝົດ 10.000.000 ກີບ ນຳມາມອບໃຫ້ສູນກາງສະຫະພັນກຳມະບານລາວ ເພື່ອສະໜັບສະໜູນ ແລະ ມອບເປັນຂອງຂັວນໃຫ້ນາຍ ແລະ ພົນທະຫານ ຢູ່ແຂວງ ໄຊສົມບູນ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ ຕື່ມອີກ.
ສະຫາຍ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ສະແດງຄວາມຕ້ອນຮັບ ແລະ ຂອບໃຈຢ່າງຈິງໃຈ ຕໍ່ຄະນະບໍລິຫານງານສະຫະພັນກຳມະບານກະຊວງ ພະລັງງານ ແລະ ບໍ່ແຮ່ ພ້ອມດ້ວຍພະນັກງານ-ລັດຖະກອນ ແລະ ກຳມະກອນ ທີ່ໄດ້ປະກອບສ່ວນວັດຖຸ, ເງິນສົດ ໃຫ້ສູນກາງສະຫະພັນກຳມະບານລາວ ເພື່ອໄປມອບຕໍ່ໃຫ້ອ້າຍ-ເອື້ອຍ-ນ້ອງທະຫານທີ່ປະຈຳຢູ່ເຂດຫ່າງໄກສອກຫຼີກ ແລະ ທຸລະກັນດານ ໂດຍສະເພາະແມ່ນຢູ່ ແຂວງໄຊສົມບູນ ແລະ ທັງໄດ້ນຳເອົາຄວາມຢື້ຢາມຖາມຂ່າວ ແລະ ຄຳອວຍພອນອັນປະເສີດຂອງ ຄະນະນຳ ແລະ ສະມາຊິກກຳມະບານທົ່ວກະຊວງ ພະລັງງານ ແລະ ບໍ່ແຮ່ ຕໍ່ຄະນະພັກ, ຄະນະນຳຂອງສູນກາງສະຫະພັນກຳມະບານລາວ ໃນຄັ້ງນີ້. ສະຫາຍ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ຍັງສະແດງຄວາມເຊື້ອໝັ້ນວ່າ: ໃນຕໍ່ໜ້ານີ້ ຈະໄດ້ຮັບຊຸກຍູ້, ອຸ້ມຊູ ແລະ ຊ່ວຍເຫຼືອ ຈາກພະນັກງານ-ລັດຖະກອນ ແລະ ກຳມະກອນ ກະຊວງພະລັງງານ ແລະ ບໍ່ແຮ່ ຕື່ມອີກ.
ພາບ ແລະ ຂໍ້ມູນ: ຄະນະບໍລິຫານງານສະຫະພັນກຳມະບານກະຊວງ
ຂ່າວ: ຄຳແສງ ແກ້ວປະເສີດ
