ໃນວັນທີ 28 ມັງກອນ 2022 ທີ່ຜ່ານມານີ້, ທີ່ຫ້ອງປະຊຸມຂອງຫ້ອງວ່າການປົກຄອງເມືອງຄູນຄຳ, ແຂວງຄຳມ່ວນ ກົມຄຸມຄອງບໍ່ແຮ່ ກະຊວງ ພະລັງງານ ແລະ ບໍ່ແຮ່ ໄດ້ຈັດກອງປະຊຸມເຜີຍແຜ່ເນື້ອໃນສັນຍາສໍາປະທານພັດທະນາບໍ່ແຮ່ ແລະ ສົ່ງອອກ (ແຮ່ເຫຼັກ) ຢູ່ເຂດບ້ານທ່ານາ, ເມືອງຄູນຄຳ, ແຂວງຄຳມ່ວນ ຂອງບໍລິສັດ ບົວທິບ ມາຍນິ້ງ ຈໍາກັັດ, ພາຍໃຕ້ການເປັນປະທານຮ່ວມຂອງທ່ານ ແກ້ວວິໄລ ໄຊຍະບຸດ ເລຂາພັກເມືອງ ເຈົ້າເມືອງໆຄູນຄຳ ແລະ ທ່ານ ສະຖາພອນ ດວງຕາວັນ ຮອງຫົວໜ້າກົມຄຸ້ມຄອງບໍ່ແຮ່. ນອກນັ້ນຍັງມີຜູ້ຕາງຈາກກົມສົ່ງເສີມການລົງທຶນ ກະຊວງ ແຜນການ ແລະ ການລົງທຶນ, ກົມຄຸ້ມຄອງຊັບສິນຂອງລັດ ກະຊວງກາເງິນ, ກົມສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່ ແຂວງຄຳມ່ວນ, ບັນດາພະແນກການທີ່ກ່ຽວຂ້ອງຂອງແຂວງຄຳມ່ວນ ແລະ ບໍລິສັດພັດທະນາໂຄງການ ພ້ອມດ້ວຍອຳນາດການປົກຄອງເມືອງ ແລະ ບ້ານບ່ອນໂຄງການຕັ້ງຢູ່ເຂົ້າຮ່ວມ.
ພາຍຫຼັງ ທ່ານ ປະທານກ່າວເປີດກອງປະຊຸມແລ້ວ, ບໍລິສັດກໍໄດ້ລາຍງານໂດຍຫຍໍ້ກ່ຽວກັບຄວາມເປັນມາ ແລະ ການເຄື່ອນໄຫວວຽກງານຂອງບໍລິສັດ ໂດຍສະເພາະບໍລິສັດໄດ້ລາຍງານສະພາບການຈັດຕັ້ງປະຕິບັດວຽກງານຢູ່ພາກສະໜາມ. ປັດຈຸບັນ ບໍລິສັດ ກຳລັງຢູ່ໃນຂັ້ນຕອນການກໍ່ສ້າງພຶ້ນຖານໂຄ່ງລ່າງເພື່ອກະກຽມເຂົ້າສູ່ການຂຸດຄົ້ນ ແລະ ບໍລິສັດມີແຜນຈະເລີ່ມສົ່ງອອກໃນເດືອນ ມີນາ 2022 ທີ່ຈະມາເຖິງນິີ້, ຄາດວ່າຈະສາມາດສົ່ງແຮ່ເຫຼັກອອກຈຳນວນ 350.000 ໂຕນ.
ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນແລກປ່ຽນຄວາມຄິດເຫັນຮ່ວມກັນ ເຊິ່ງສ່ວນໃຫຍ່ໄດ້ສະແດງຄວາມຍ້ອງຍໍຊົມເຊີຍຕໍ່ບໍລິສັດສຳປະທານໂຄງການ ທີ່ໄດ້ເອົາໃຈໃສ່ປະຕິບັດວຽກງານຂອງຕົນສຳເລັດຕາມແຜນການ. ພ້ອມກັນນີ້, ກອງປະຊຸມຍັງໄດ້ມີຄວາມເປັນເອກະພາບ ແລະ ຕົກລົງບາງບັນຫາຄື: ເຫັນດີເປັນເອກະພາບຕໍ່ການນຳສະເໜີເນື້ອໃນສັນຍາຂອງຄະນະຮັບຜິດຊອບ ຈາກກົມຄຸ້ມຄອງບໍ່ແຮ່ ແລະ ເຫັນດີເປັນເອກະພາບຕໍ່ສັນຍາດັ່ງກ່າວ ເຫັນວ່າ ມີຄວາມຮັດກຸມຫຼາຍພໍສົມຄວນໃນຂອດການປະສານງານລະຫວ່າງ ອຳນາດການປົກຄອງແຂວງ ແລະ ທ້ອງຖິ່ນຮາກຖານ; ບໍລິສັດຜູ້ໄດ້ຮັບສິດສຳປະທານ ໄດ້ຊີ້ແຈງອະທິບາຍຕໍ່ຄຳເຈາະຈີ້ມຂອງຜູ້ເຂົ້າຮ່ວມກອງປະຊຸມ ເພື່ອໃຫ້ຜູ້ເຂົ້າຮ່ວມກອງປະຊຸມໄດ້ເຂົ້າໃຈຢ່າງຈະແຈ້ງ ພ້ອມທັງຮັບເອົາຂໍ້ສະເໜີແນະຂອງທຸກພາກສ່ວນທີ່ກ່ຽວຂ້ອງຂອງລັດ ທັງສູນກາງ ແລະ ທ້ອງຖິ່ນ ເພື່ອນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງຕາມລະບຽບ ແລະ ກົດໝາຍ; ມອບໃຫ້ຜູ້ເຂົ້າຮ່ວມກອງປະຊຸມນຳໄປເຜີຍແຜ່ເນື້ອໃນສັນຍາຄັ້ງນີ້ ຈົ່ງໄດ້ນຳເອົາເນື້ອໃນຈິດໃຈຂອງສັນຍາສະບັບນີ້ໄປເຜີຍແຜ່ໃຫ້ປະຊາຊົນທີ່ຢູ່ໃນຄວາມຮັບຜິດຊອບຂອງຕົນຈົ່ງໄດ້ເຂົ້າໃຈ ແລະ ເອື້ອອຳນວຍຄວາມສະດວກໃຫ້ແກ່ບໍລິສັດໃນການດຳເນີນວຽກງານ, ອຳນາດການປົກຄອງທ້ອງຖິ່ນໄດ້ຮ່ວມມືກັນໃນການຄຸ້ມຄອງຈັດຕັ້ງປະຕິບັດສັນຍາສະບັບນີ້ໃຫ້ປະກົດຜົນເປັນຈິງ ແລະ ໃຫ້ບໍລິສັດຈົ່ງໄດ້ປະສານສົມທົບກັບພາກລັດຂອງສູນກາງ ແລະ ທ້ອງຖິ່ນຢ່າງແໜ້ນແຟ້ນໃນການດຳເນີນວຽກງານໃນຕໍ່ໜ້າ;
ພາບ ແລະ ແຫຼ່ງຂໍ້ມູນ: ກົມຄຸ້ມຄອງບໍ່ແຮ່
ຂ່າວ: ຄຳແສງ ແກ້ວປະເສີດ
