ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນປັດຈຸບັນ, ຄະນະຊາວໜຸ່ມປະຊາຊົນປະຕິວັດລາວ ຮາກຖານ ລັດວິສາຫະກິດໄຟຟ້າລາວ ໄດ້ຈັດພິທີປະກາດການຈັດຕັ້ງຂຶ້ນຢ່າງເປັນທາງການໃນຕອນເຊົ້າວັນທີ 15 ພະຈິກ 2022 ນີ້ ຢູ່ສະໂມສອນໃຫຍ່ ລັດວິສາຫະກິດໄຟຟ້າລາວ ໂດຍເປັນກຽດເຂົ້າຮ່ວມຂອງ ສະຫາຍ ຈັນທະເລດ ວໍລະບຸດ ຄະນະພັກກະຊວງ, ຄະນະບໍລິຫານງານສູນກາງ ຊປປລ, ເລຂາ ຄະນະບໍລິຫານງານ ຊປປລ ກະຊວງ ພະລັງງານ ແລະ ບໍ່ແຮ່, ສະຫາຍ ຟອງປະສິດ ເພັດສີສຸກ ຮອງເລຂາຄະນະພັກຮາກຖານ, ຮອງຜູ້ອຳນວຍການລຫດວິສາຫະກິດໄຟຟ້າລາວ. ມີບັນດາ ສະຫາຍ ຮອງເລຂາ, ຄະນະປະຈຳ, ຄະນະບໍລິຫານງານ ຊປປລ ກະຊວງ; ເລຂາ, ຮອງເລຂາ ບັນດາ ຄຊປປລ ຮາກຖານ ແລະ ໜ່ວຍຮາກຖານອ້ອມຂ້າງກະຊວງ ພ້ອມດ້ວຍຄະນະບໍລິຫານງານ ຊປປລ ຮາກຖານ ລັດວິສາຫະກິດໄຟຟ້າລາວ ແລະ ສະມາຊິກຊາວໜຸ່ມພາຍໃນ ຄຊປປລ ຮາກຖານ ລັດວິສາຫະກິດໄຟຟ້າລາວເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ມ້ອນ ເພັດພູໄທ ຮອງເລຂາ ຄະນະບໍລິຫານງານ ຊປປລ ກະຊວງ ທັງເປັນຫົວໜ້າຫ້ອງການ ຄຊປປລ ກະຊວງ ໄດ້ຂຶ້ນຜ່ານມະຕິຕົກລົງຂອງ ຄະນະບໍລິຫານງານ ຊປປລ ກະຊວງ ວ່າດ້ວຍການແຕ່ງຕັ້ງບົ່ງຕົວ ຄະນະບໍລິຫານງານ ຊປປລ ຮາກຖານ ລັດວິສາຫະກິດໄຟຟ້າ ຈຳນວນ 15 ສະຫາຍ ເຊິ່ງປະກອບມີ: ສະຫາຍ ປາດຖະໜາ ທອງດີ ເປັນເລຂາ; ສະຫາຍ ພຸດທະສອນ ອິນທະວົງ ແລະ ສະຫາຍ ປອ. ເບັນທິລາວັນ ເຕໂຊ ເປັນຮອງເລຂາ; ສະຫາຍ ນາງ ພອນວິໄລ ພິມມະສອນ ເປັນປະທານກວດກາ. ນອກຈາກນີ້ຍັງປະກອບມີຄະນະກຳມະການຕື່ມອີກ ຈຳນວນ 11 ສະຫາຍ.
