ສອງກະຊວງ ພະລັງງານ ແລະ ບໍ່ແຮ່ ສປປລາວ ແລະ ກະຊວງ ອຸດສາຫະກຳ ແລະ ການຄ້າ ສສ ຫວຽດນາມ ເພີ່ມທະວີການພົວພັນຮ່ວມມືໃນຂົງເຂດພະລັງງານ ແລະ ບໍ່ແຮ່
ເນື່ອງໃນໂອກາດເດີນທາງຕິດຕາມການຢ້ຽມາມ ຢ່າງເປັນທາງການຢູ່ ສາທາລະນະລັດ ສັງຄົມນະຍົມ ຫວຽດນາມຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ລະຫວ່າງ ວັນທີ 8-10 ມັງກອນ 2022 ຜ່ານມານີ້. ໃນວັນທີ 9 ມັງກອນ 2022 ຢູ ໂຮງແຮມ Melia Hanoi ນະຄອນຫຼວງຮ່າໂນ້ຍ ສາທາລະນະລັດ ສັງຄົມນິຍົມ ຫວຽດນາມ, ທ່ານ ປອ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ພົບປະສອງຝ່າຍກັບ ທ່ານ ຫວຽນ ຮົ່ງ ຢຽມ (Nguyen Hong Dien) ລັດຖະມົນຕີກະຊວງ ອຸດສາຫະກຳ ແລະ ການຄ້າ ແຫ່ງ ສາທາລະນະລັດ ສັງຄົມນິຍົມ ຫວຽດນາມ.
ໃນບັນຍາກາດທີ່ເຕັມໄປດ້ວຍຄວາມໝາຍ, ຄວາມສຳຄັນນີ້ ທ່ານ ລັດຖະມົນຕີທັງສອງ ກໍ່ພ້ອມກັນທົບທວນຄືນໝາກຜົນການຈັດຕັ້ງປະຕິບັດສັນຍາການຮ່ວມມືລະຫວ່າງ ສອງລັດຖະບານ ໂດຍສະເພາະແມ່ນບັນດາໂຄງການທີ່ຕິດພັນກັບການຄຸ້ມຄອງຂອງຂະແໜງການຕົນ. ທ່ານ ລັດຖະມົນຕີກະຊວງ ອຸດສາຫະກຳ ແລະ ການຄ້າ ແຫ່ງ ສາທາລະນະລັດສັງຄົມນິຍົມ ຫວຽດນາມ ຕີລາຄາສູງຕໍ່ການພົບປະຂອງການນຳສອງກະຊວງ ອຸດສາຫະກຳ ແລະ ການຄ້າ ສສ. ຫວຽດນາມ ແລະ ກະຊວງ ພະລັງງານ ແລະ ບໍ່ແຮ່ ສປປລາວ ໃນຄັ້ງນີ້ ພ້ອມກັນນີ້, ທ່ານ ຫວຽນ ຮົ່ງ ຢຽມ ກໍ່ໄດ້ສະແດງຊົມເຊີຍຕໍ່ ທ່ານ ປອ ດາວວົງ ພອນແກ້ວ ທີ່ໄດ້ຮັບການແຕ່ງຕັ້ງເປັນ ລັດຖະມົນຕີກະຊວງ ພະລັງງານ ແລະ ບໍ່ແຮ່ ສປປລາວ ຜູ້ໃໝ່. ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ຕາງໜ້າໃຫ້ຄະນະພັກ, ຄະນະນຳ ແລະ ພະນັກງານ-ລັດຖະກອນ ທົ່ວກະຊວງ ພະລັງງານ ແລະ ບໍ່ແຮ່ ສະແດງຄວາມຂອບໃຈຢ່າງຈິງໃຈ ຕໍ່ພັກ, ລັດຖະບານ ແລະ ປະຊາຊົນ ຫວຽດນາມອ້າຍນ້ອງ ທີ່ຍາມໃດກໍ່ໃຫ້ຄວາມຮ່ວມມື, ຊ່ວຍເຫຼືອ ແລະ ສະໜັບສະໜູນຂະແໜງການພະລັງງານ ແລະ ບໍ່ແຮ່ ໄດ້ຮັບການພັດທະນາຢ່າງໜັກແໜ້ນ. ໃນຕໍ່ໜ້ານີ້, ທ່ານ ລັດຖະມົນຕີ ທັງສອງ ເຫັນພ້ອມກັນວ່າ: ທັງສອງກະຊວງ ຈະພ້ອມກັນເພີ່ມທະວີຊຸກຍູ້ການພົວພັນຮ່ວມມືລະຫວ່າງສອງຂະແໜງການໃຫ້ເລິກເຊິ່ງ; ຕິດຕາມ, ຊຸກຍູ້ ແລະ ສະໜັບສະໜູນວິສາຫະກິດຂອງສອງປະເທດ ໃຫ້ລົງທຶນຫຼາຍຂຶ້ນກວ່າເກົ່າ ເພື່ອຊຸກຍູ້ໃຫ້ແກ່ການພັດທະນາຂອງສອງປະເທດ.
ໃນເວລາຕໍ່ມາ ທ່ານ ປອ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະ ບໍ່ແຮ່ ກໍ່ໄດ້ຕ້ອນຮັບການຢ້ຽມຂ່ຳນັບຂອງ ທ່ານ ຫວຽນ ດຶກ ກື (Nguyen Duc Cu) ປະທານສະພາບໍລິຫານ ບໍລິສັດຫຸ້ນສ່ວນໄຟຟ້າຫວຽດນາມ-ລາວ ເຊິ່ງເປັນຜູ້ສຳປະທານໂຄງການໄຟຟ້າເຊຂະມານ 1, ເຊຂະໝານຊານໄຊ ຢູ່ເມືອງ ຊານໄຊ ແຂວງ ອັດຕະປື ແລະ ໂຄງການໄຟຟ້າເຊຂະໝານ3 ຢູ່ເມືອງ ດາກຈຶງ ແຂວງ ເຊກອງ ແລະ ທ່ານ ເຈືອງ ກວັກ ຫວຽດ (Truong Quoc Viet) ອຳນວຍການບໍລິສັດ ຂາອອກ-ຂາເຂົ້າລັອງແທັ່ງ ພ້ອມຄະນະຕື່ມອີກ.
ຫຼັງຈາກນັ້ນ, ວັນທີ 10 ມັງກອນ 2022 ທ່ານ ລັດຖະມົນຕີ ທັງສອງກໍ່ໄດ້ເຂົ້າຮ່ວມກອງປະຊຸມຄັ້ງທີ 44 ຂອງຄະນະກໍາມະທິການຮ່ວມມືທະວີພາຄີ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ປະຈໍາປີ 2022. ກອງປະຊຸມ ໄດ້ຈັດຂຶ້ນຢູ່ໂຮງແຮມ Melia Hanoi ນະຄອນຫຼວງຮ່າໂນ້ຍ ສາທາລະນະລັດ ສັງຄົມນິຍົມ ຫວຽດນາມ ຄະນະຜູ້ແທນຝ່າຍ ສປປລາວ ນຳໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຝ່າຍຫວຽດນາມ ນຳໂດຍ ທ່ານຟ້າມ ມິງ ຈິງ ນາຍົກລັດຖະມົນຕີແຫ່ງ ສາທາລະນະລັດ ສັງຄົມນິຍົມ ຫວຽດນາມ. ກອງປະຊຸມຄັ້ງນີ້, ສອງຝ່າຍ ໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດຂໍ້ຕົກລົງ ວ່າດ້ວຍການຮ່ວມມື ໃນປີ 2021 ທີ່ຜ່ານມາ, ເຊິ່ງສາມາດບັນລຸຜົນສຳເລັດໃນຫລາຍດ້ານ ເປັນຕົ້ນການຮ່ວມມືດ້ານການເມືອງ-ການຕ່າງປະເທດ, ດ້ານປ້ອງກັນຊາດປ້ອງກັນຄວາມສະຫງົບ, ການຮ່ວມມືໃນຂົງເຂດການສຶກສາ-ບຳລຸງສ້າງ
ສຳລັບທິດທາງແຜນການຮ່ວມມື ໃນປີ 2022 ສອງຝ່າຍ ໄດ້ຕົກລົງເຫັນດີເປັນເອກະພາບ ສືບຕໍ່ຈັດຕັ້ງຜັນຂະຫຍາຍ ບັນດາເນື້ອໃນຖະແຫລງການຮ່ວມ ແລະ ຂໍ້ຕົກລົງລະຫວ່າງ ການນໍາຂັ້ນສູງຂອງສອງປະເທດໃຫ້ເປັນຮູບປະທຳ; ສືບຕໍ່ຮ່ວມມືຢ່າງແໜ້ນແຟ້ນ ໃນການຮັກສາສະຖຽນລະພາບທາງດ້ານການເມືອງ, ການປ້ອງກັນຊາດ-ປ້ອງກັນ ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຂອງແຕ່ລະປະເທດ; ສ້າງເສັ້ນຊາຍແດນລາວ-ຫວຽດນາມ ໃຫ້ເປັນຊາຍແດນແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຮອບດ້ານ, ສະໜັບສະໜູນ ແລະ ສ້າງຄວາມເຊື້ອໝັ້ນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ; ສອງຝ່າຍສູ້ຊົນຊຸກຍູ້ມູນຄ່າການຄ້າສອງຝ່າຍໃຫ້ເພີ່ມຂຶ້ນ 10-15% ທຽບໃສ່ປີຜ່ານມາ, ສືບຕໍ່ຜັນຂະຫຍາຍການບົດບັນທຶກຄວາມເຂົ້າໃຈ ກ່ຽວກັບການຮ່ວມມືດ້ານຄົມມະນາຄົມ ແລະ ຂົນສົ່ງ, ການຮ່ວມມືພັດທະນາບັນດາໂຄງການໄຟຟ້າຢູ່ລາວ,ເຊື່ອມຕໍ່ລະບົບໄຟຟ້າ ແລະ ການຊື້-ຂາຍ ໄຟຟ້າ;ຄຽງຄູ່ກັນນີ້ ສອງຝ່າຍ ກໍຈະພ້ອມກັນສືບຕໍ່ເພີ່ມທະວີການຮ່ວມມື ແລະ ສ້າງເງື່ອນໄຂ ເພື່ອເອື້ອອໍານວຍຄວາມສະດວກ ໃຫ້ແກ່ການຮ່ວມມືດ້ານການຄ້າ, ການລົງທຶນ, ການສຶກສາ ກໍຄື ການພັດທະນາຊັບພະຍາກອນມະນຸດຂອງສອງປະເທດ ແລະ ການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ;
ພາຍຫລັງສຳເລັດກອງປະຊຸມ, ສອງນາຍົກລັດຖະມົນຕີ ໄດ້ຮ່ວມເປັນສັກຂີພິຍານໃນການລົງນາມ ແລະ ມອບ-ຮັບເອກະສານຮ່ວມມືຂອງບັນດາກະຊວງ ແລະ ພາກທຸລະກິດສອງປະເທດ ຈຳ ນວນ 09 ສະບັບ, ໃນນີ້ພາກລັດວິສາຫະກິດ 01 ສະບັບ ຄື: ມອບ-ຮັບໃບຢັ້ງຢືນຂໍ້ຜູກພັນກ່ຽວກັບການເພີ່ມອັດຕາສ່ວນກຳມະສິດຂອງ ລັດຖະບານລາວຈາກ 20% ຂຶ້ນເປັນ 60% ຂອງທ່າເຮືອຫວຸງອາງ 1,2,3 ທຶນຈົດທະບຽນ ໃນບໍລິສັດຫຸ້ນສ່ວນທ່າເຮືອສາກົນ ລາວ-ຫວຽດນາມ; ຕິດພັນກັບຂະແໜງ ພະລັງງານ ແລະ ບໍ່ແຮ່ ແມ່ນໄດ້ເຊັນສັນຍາຊື້-ຂາຍໄຟຟ້າ (PPA) ໂຄງການເຂື່ອນໄຟຟ້ານໍ້າຊໍາ 3A ລະຫວ່າງບໍລິສັດ ພົງຊັບທະວີ ກໍ່ສ້າງຂົວທາງ ເຄຫະສະຖານ ແລະ ຊົນລະປະທານ ກັບ ລັດວິສຫະກິດໄຟຟ້າຫວຽດນາມ.
ພິເສດ, ສອງຝ່າຍ ຈະໄດ້ຮ່ວມກັນຈັດຕັ້ງ ການສະເຫລີມສະຫລອງ ປີສາມັກຄີມິດຕະພາບ ໃນປີ 2022 ກໍຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໃຫ້ມີບັນຍາກາດຟົດຟື້ນ ແລະ ເຕັມໄປດ້ວຍຄວາມໝາຍສໍາຄັນ ເພື່ອໃຫ້ຄົນຮຸ່ນຫລັງໄດ້ຮັບຮູ້ ແລະ ເຂົ້າໃຈຕໍ່ສາຍພົວພັນພິເສດສອງປະເທດ;
ຕອນບ່າຍຂອງມື້ດຽວກັນ, ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ສປປລາວ ແລະ ລັດຖະມົນຕີກະຊວງ ອຸດສາຫະກຳ ແລະ ການຄ້າ ສສ ຫວຽດນາມ ຍັງໄດ້ເຂົ້າຮ່ວມກອງປະຊຸມພົບປະທຸລະກິດລາວ ແລະ ຫວຽດນາມ ໂດຍມີ 02 ນາຍົກລັດຖະມົນຕີ ເຂົ້າເປັນປະທານຮ່ວມກອງປະຊຸມດັ່ງກ່າວ ເພື່ອໃຫ້ນັກທຸລະກິດສອງຝ່າຍໄດ້ຮ່ວມມືລົງທຶນ, ຊຸກຍູ້-ຊອກຫາທາງອອກ, ສ້າງເງື່ອນໄຂຂໍ້ສະດວກ ແລະ ແກ້ໄຂຂໍ້ຫຍຸ້ງຍາກ ຂອງບັນດາທຸລະກິດ ຫວຽດນາມ ລົງທຶນ ຢູ່ ລາວ ແລະ ທຸລະກິດລາວ ລົງທຶນ ຢູ່ຫວຽດນາມ
ຂໍ້ມູນ: ສຳນັກຂ່າວສານປະເທດລາວ
