ຕອນບ່າຍວັນທີ 21 ກຸມພາ 2023 ນີ້, ທ່ານ ນາງ ຈັນສະຫວາດ ບຸບຜາ ຄະນະປະຈຳພັກ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ພົບປະ, ໂອ້ລົມ ແລະ ໃຫ້ທິດຊີ້ນຳການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຫ້ອງການກະຊວງ ໂດຍໄດ້ຮັບການຕ້ອນຮັບຂອງ ທ່ານ ຄຳໂສ້ ກຸໂພຄຳ ກຳມະການຄະນະພັກກະຊວງ, ເລຂາໜ່ວຍພັກ, ຫົວໜ້າຫ້ອງການກະຊວງ; ມີຄະນະໜ່ວຍພັກ, ຄະນະຫ້ອງການ, ຫົວໜ້າ-ຮອງຫົວໜ້າພະແນກ ພ້ອມດ້ວຍພະນັກງານລັດຖະກອນພາຍໃນຫ້ອງການກະຊວງເຂົ້າຮ່ວມ.
ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງ ໄດ້ລາຍງານຫຍໍ້ການເຄື່ອນໄຫວຈັດຕັ້ງປະຕິບັດວຽກງານຂອງຫ້ອງການ ໃນຖານະທີ່ເປັນເສນາທິການໃຫ້ການນຳກະຊວງ ໃນໄລຍະຜ່ານມາ ແລະ ສະເໜີວຽກງານຈຸດສຸມໃນຕໍ່ໜ້າ. ຫຼັງຈາກນັ້ນ, ບັນດາ ທ່ານ ຮອງຫົວໜ້າຫ້ອງການ, ຄະນະພະແນກ ແລະ ພະນັກງານລັດຖະກອນ ໄດ້ຜັດປ່ຽນກັນແລກປ່ຽນຄວາມຄິດເຫັນຢ່າງກົງໄປກົງມາ ແລະ ສະເໜີບາງຂໍ້ຄິດເຫັນ ເພື່ອໃຫ້ຂັ້ນເທິງໄດ້ພິຈາລະນາແກ້ໄຂ.
ຕອນທ້າຍຂອງກອງປະຊຸມ ທ່ານ ຮອງລັດຖະມົນຕີໄດ້ມີຄຳເຫັນໂອ້ລົມເຊິ່ງກ່ອນອື່ນໝົດ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຫ້ອງການກະຊວງຍາດມາໄດ້ຕະຫຼອດໄລຍະຜ່ານມາ ເຊິ່ງເຫັນໄດ້ວ່າມີຫຼາຍວຽກງານໄດ້ຮັບການຈັດຕັ້ງປະຕິບັດດ້ວຍຜົນສຳເລັດທີ່ໜັກແໜ້ນ, ມີປະສິດທິພາບ, ມີປະສິດທິຜົນ.
ພ້ອມກັນນີ້, ທ່ານ ຮອງລັດຖະມົນຕີ ຍັງໄດ້ເນັ້ນໜັກໃຫ້ຄະນະພັກ, ຄະນະຫ້ອງການ ແລະ ພະນັກງານລັດຖະກອນທຸກ ທ່ານ ສືບຕໍ່ເອົາໃຈໃສ່ຈັດຕັ້ງປະຕິບັດວຽກງານຂອງຕົນໃຫ້ໄດ້ຮັບຜົນສຳເລັດຫຼາຍຂຶ້ນກວ່າເກົ່າ ໃນນີ້ໃຫ້ຖືເອົາວຽກງານການສຶກສາອົບຮົມການເມືອງແນວຄິດເປັນກົກ ຕິດພັນກັບການກໍ່ສ້າງ, ບຳລຸງພະນັກງານໃຫ້ມີຄວາມຮູ້, ຄວາມສາມາດ, ມີຄຸນສົມບັດ, ສິນທຳປະຕິບັດ; ສືບຕໍ່ແກ້ໄຂວຽກງານທີ່ຄົງຄ້າງໃນໄລຍະຜ່ານມາ ໃຫ້ມີບາດກ້າວອັນໃໝ່ທີ່ຍິງໃຫຍ່ ແລະ ໜັກແໜ້ນກວ່າເກົ່າ.
ພາບ: ວິລະຊາດ ສາຍອັດຕະປື
ຂ່າວ: ຄຳແສງ ແກ້ວປະເສີດ
