ຫວ່າງວັນທີ 14-19 ກໍລະກົດ 2024 ຜ່ານມານີ້, ທ່ານ ສຸຂັນສັກ ສີສຸກ ຫົວໜ້າກົມທໍລະນີສາດ ແລະ ແຮ່ທາດ, ກະຊວງພະລັງງານ ແລະ ບໍ່ແຮ່ ສປປລາວ ໄດ້ນຳພາຄະນະຜູ້ແທນກະຊວງພະລັງງານ ແລະ ບໍ່ແຮ່ ສປປລາວ ເດີນທາງໄປຢ້ຽມຢາມ ແລະ ເຮັດວຽກກັບກົມຊັບພະຍາກອນທໍລະນີ, ກະຊວງ ຊັບພະຍາກອນທຳມະຊາດ ແລະ ສິ່ງແວລ້ອມ ແຫ່ງຣາຊະອາຈັກໄທ ໂດຍໄດ້ຮັບການຕ້ອນຮັບຢ່າງອົບອຸ່ນ ແລະ ສະໜິດສະໜົມຈາກ ທ່ານ ພິຊິດ ສົມບັດມາກ ຫົວໜ້າກົມຊັບພະຍາກອນທໍລະນີ, ກະຊວງຊັບພະຍາກອນທຳມະ ຊາດ ແລະ ສິ່ງແວດລ້ອມ ພ້ອມດ້ວຍຄະນະ.
ໃນໂອກາດພົບປະ, ປຶກສາຫາລືກັນຄັ້ງນີ້, ທັງສອງຝ່າຍ ໄດ້ເຫັນດີເປັນເອກະພາບກັນ ສືບຕໍ່ຮ່ວມມືດ້ານວິຊາການຮ່ວມກັນໃນນີ້ໄດ້ເນັ້ນໃສ່ການຮ່ວມມືໃນການແລກປ່ຽນຄວາມຮູ້ທາງດ້ານທໍລະນີວິທະຍາສາດ ແລະ ຊັບພະຍາກອນແຮ່ທາດ ໂດຍສະເພາະກ່ຽວກັບວຽກງານການສໍາຫຼວດສຶກສາແຫຼ່ງທ່ອງທ່ຽວທາງດ້ານທໍລະນີສາດ, ໄພພິບັດທາງທໍລະນີສາດ (ດິນເຈື່ອນ ແລະ ຮອຍເລື່ອນມີພະລັງທີ່ເປັນສາເຫດກໍ່ໃຫ້ເກີດແຜ່ນດິນໄຫວ);
ສຶກສາໂຄງສ້າງທໍລະນີສາດ-ແຮ່ທາດ ແລະ ຊາກດຶກດໍາບັນ (Fossils) ໃນເຂດພື້ນທີ່ ທີ່ເປັນທ່າແຮງ ເພື່ອສ້າງເປັນແຫຼ່ງທ່ອງທ່ຽວລະດັບຊາດ; ການສ້າງລະບົບຈັດເກັບຂໍ້ມູນ ແລະ ຖານຂໍ້ມູນທາງດ້ານທໍລະນີສາດ ໂດຍການຖ່າຍທອດຄວາມຮູ້ດ້ວຍການຈັດຝຶກອົບຮົມ ແລະ ແລກປ່ຽນຄວາມຮູ້ເພື່ອສ້າງຄວາມເຂັ້ມແຂງໃຫ້ແກ່ພະນັກງານ ກົມທໍລະນີສາດ ແລະ ແຮ່ທາດ, ກະຊວງພະລັງງານ ແລະ ບໍ່ແຮ່ ສປປລາວ ພ້ອມທັງເປັນການສ້າງຄວາມສໍາພັນຂອງທັງສອງປະເທດໃຫ້ຮັດແໜ້ນຫຼາຍຂຶ້ນກວ່າເກົ່າ, ຊຶ່ງຄະນະຮັບຜິດຊອບວຽກງານດັ່ງກ່າວ ຂອງທັງສອງຝ່າຍ ຈະຮ່ວມກັນສ້າງແຜນການຮ່ວມມືລະຫວ່າງ ສອງຂະແໜງການລາວ-ໄທ ໃນໄລຍະ 5 ປີ ຕໍ່ໜ້າ ເພື່ອເປັນການສືບຕໍ່ດໍາເນີນວຽກງານການຮ່ວມມືໃນໄລຍະຕໍ່ໄປ.
ພາຍຫຼັງການພົບປະ, ປຶກສາຫາລືຮ່ວມກັນ. ຄະນະຜູ້ແທນທັງສອງຝ່າຍ ໄດ້ລົງທັດສະນະສຶກສາວຽກງານພາກສະໜາມ ເພື່ອສຶກສາເບິ່ງວຽກງານດ້ານທໍລະນີສາດ ແລະ ແຮ່ທາດ ຢູ່ໂຄງການຂຸດຄົ້ນແຮ່ໄພໂລຟິນໄລ ຂອງບໍລິສັດ ຊີມັງໄທ (SCG) ຈໍາກັດ ທີ່ແຂວງສະລະບູລີ;
ໂຄງການຂຸດຄົ້ນແຮ່ຄໍາ ແລະ ແຮ່ເງິນ ຂອງບໍລິສັດ ອັກຄະລະ ຣີຊອດ໌ ຈໍາກັດ ທີ່ແຂວງພິຈິດ ແລະ ຢ້ຽມຢາມສູນສຶກສາວິໄຈ ແລະ ພິພິຕະພັນໄດໂນເສົາ ຂອງກົມຊັບພະຍາກອນທໍລະນີແຫ່ງຣາຊະອານາຈັກໄທ ທີ່ແຂວງຂອນແກ່ນ, ພ້ອມນັ້ນກໍ່ໄດ້ແລກປ່ຽນບົດຮຽນຂັ້ນຕອນການດໍາເນີນງານການຍົກລະດັບອຸທະຍານທໍລະນີສາດຂອນແກ່ນ ໃນລະດັບປະເທດ ໃຫ້ກ້າວໄປສູ່ລະດັບໂລກຂອງອົງການ UNESCO, ຊຶ່ງນໍາໄປສູ່ການພັດທະນາການຮ່ວມມືທາງດ້ານວິຊາການຮ່ວມກັນໃນຕໍ່ໜ້າ ແລະ ສ້າງຄວາມສໍາພັນຂອງທັງສອງປະເທດໃຫ້ຮັດແໜ້ນຍິ່ງໆຂຶ້ນ.
ພາບ ແລະ ຂ່າວ: ກົມທໍລະນີສາດ ແລະ ແຮ່ທາດ
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
