ວັນທີ 22 ສິງຫາ 2024 ນີ້, ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະລົງໄດ້ເຄື່ອນໄຫວຢ້ຽມຢາມ ເພື່ອຕິດຕາມ ແລະ ຊຸກຍູ້ ການຈັດຕັ້ງປະຕິບັດໂຄງການເຂື່ອນໄຟຟ້າຢູ່ແຂວງຫຼວງພະບາງ ໂດຍສະເພາະແມ່ນ ການດຳເນີນການຜະລິດ, ການບໍລິຫານຈັດການນໍ້າ, ການກຽມພ້ອມແຜນຮັບມືສຸກເສີນ ແລະ ການຄຸ້ມຄອງຄວາມປອດໄພຂອງເຂື່ອນ. ພາຍຫຼັງ ທ່ານ ລັດຖະມົນຕີ ພ້ອມຄະນະເດີນທາງມາເຖິງ ກໍ່ໄດ້ໄປຢ້ຽມຢາມໂຄງການເຂື່ອນໄຟຟ້ານໍ້າຄານ2 ແລະ 3 ຂອງບໍລິສັດ ຜະລິດໄຟຟ້າລາວ ມະຫາຊົນ (ຜ-ຟຟລ) ໂດຍໄດ້ຮັບຕ້ອນຮັບຈາກ ທ່ານ ດາວວຽງ ສຸນັນທະລາດ ຮອງຜູ້ອຳນວຍການໃຫຍ່ ບໍລິສັດຜະລິດໄຟຟ້າລາວ ມະຫາຊົນ ສາຍງານການຜະລິດ ພ້ອມດ້ວຍຄະນະ.
ໃນໂອກາດດັ່ງກ່າວ, ທ່ານ ຮອງຜູ້ອໍານວຍການໃຫຍ່ ບໍລິສັດຜະລິດໄຟຟ້າລາວ ມະຫາຊົນ ໄດ້ຕາງໜ້າໃຫ້ບໍລິສັດກ່າວຕ້ອນຮັບ ພ້ອມທັງລາຍງານສະພາບການຈັດຕັ້ງປະຕິບັດວຽກງານຂອງໂຄງການໃນໄລຍະຜ່ານມາ ແລະ ແຜນການຄຸ້ມຄອງບໍລິຫານ, ຈັດການໂຄງການ ໃນຕໍ່ໜ້າໃຫ້ ທ່ານ ລັດຖະມົນຕີ ຮັບຊາບ ໂດຍສະເພາະໃນໄລຍະ 6 ເດືອນຕົ້ນປີ 2024 ແລະ ແຜນວຽກຈຸດສຸມໄລຍະ 6ເດືອນທ້າຍປີ ວ່າ: ເຂື່ອນໄຟຟ້າທີ່ຢູ່ພາຍໃຕ້ການຄຸ້ມຄອງຂອງ ຜ-ຟຟລ ມີທັງໝົດ 13 ແຫ່ງ, ລວມກຳລັງຕິດຕັ້ງ 944 MW, ນອກຈາກນີ້ ຍັງມີເຂື່ອນໄຟ້າ ທີ່ ຜ-ຟຟລໄດ້ຮ່ວມຮຸ້ນກັບຜູ້ລົງທຶນພາກເອກະຊົນ ຫຼື IPP ຈໍານວນ 18 ແຫ່ງ ມີກໍາລັງຕິດຕັັງ 1,963 MW.
ທ່ານ ຮອງຜູ້ອຳນວຍການໃຫຍ່ ໄດ້ໃຫ້ຮູ້ຕື່ມວ່າ: ສະເພາະເຂື່ອນໄຟຟ້ານໍ້າຄານ 2 ໄດ້ເລີ່ມລົງມືກໍ່ສ້າງມາແ່ປີ 2011 ແລະ ກໍ່ສ້າງສຳເລັດ ພ້ອມດຳເນີນການຜະລິດຢ່າງເປັນທາງການ ໃນກາງປີ 2015 ແລະ ເຂື່ອນໄຟຟ້ານໍ້າຄານ 3 ກໍ່ສ້າງສຳເລັດ ພ້ອມທັງເປີດການຜະລິດໃນກາງປີ2016. ຕະຫຼອດໄລຍະການດໍາເນີນງານຂອງທັງສອງໂຄງການ, ໄດ້ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງໂຄງການຖືກຕ້ອງຕາມມາດຕະຖານ-ເຕັກນິກຢ່າງເຂັ້ມງວດ ໂດຍສະເພາະແມ່ນການບໍລິຫານ-ຈັດການນໍ້າ ເຊິ່ງກ່ອນຈະລະບາຍນໍ້າຜ່ານ Spillway ທຸກຄັ້ງ ແມ່ນໄດ້ປະຕິບັດຕາມຂັ້ນຕອນຂອງ ບົດ EAP ຄື: ເຮັດໜັງສືສະເໜີຫາພາກສ່ວນກ່ຽວຂ້ອງ ເພື່ອອະນຸຍາດ ພ້ອມທັງແຈ້ງເຕືອນປະຊາຊົນ ຢູ່ລຸ່ມເຂື່ອນໃຫ້ຮັບຊາບ ເພື່ອກຽມພ້ອມຮັບມື.
ພ້ອມກັນນີ້, ທ່ານ ລັດຖະມົນຕີ ພ້ອມດ້ວຍຄະນະ ກໍ່ໄດ້ລົງຢ້ຽມຢາມ ແລະ ຕິດຕາມສູນຄຸ້ມຄອງການດໍາເນີນງານ ແລະ ບໍາລຸງຮັກສາ ຂອງໂຄງການເຂື່ອນໄຟຟ້າທີ່ຢູ່ໃນຄວາມຮັບຜິດຊອບຂອງບໍລິສັດ Power China ໃນນີ້ລວມມີ: ໂຄງການຕາມສາຍນໍ້າອູ ແລະ ນໍ້າງື່ມ5 ໂດຍໄດ້ຮັບການຕ້ອນຮັບຂອງ ທ່ານ Jia Peng ຜູ້ອຳນວຍການ ບໍລິສັດ Power China ພ້ອມດ້ວຍຄະນະຕື່ມອີກ.
ຢູ່ແຕ່ລະບ່ອນ ພາຍຫຼັງໄດ້ຮັບຟັງການລາຍງານສະພາບການຄຸ້ມຄອງ, ບໍລິຫານ-ຈັດການໂຄງການ ຈາກຜູ້ບໍລິຫານຂອງແຕ່ລະໂຄງການແລ້ວ, ທ່ານ ລັດຖະມົນຕີ ກໍ່ໄດ້ມີຄຳເຫັນໂອ້ລົມ ແລະ ຊີ້ນຳຕໍ່ຄະນະອຳນວຍການ ແລະ ຜູ້ລິຫານຂອງແຕ່ລະໂຄງການ. ກ່ອນອື່ນ ທ່ານ ລັດຖະມົນຕີ ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຄວາມເອົາໃຈໃສ່ໃນການຕິດຕາມ, ກວດກາ ແລະ ຄຸ້ມຄອງໂຄງການຢ່າງມີປະສິດທິພາບ, ມີປະສິດທິຜົນ ເຮັດໃຫ້ແຕ່ລະໂຄງການສາມາດດຳເນີນງານເປັນໄປຕາມແຜນການວາງໄວ້. ຢ່າງໃດກໍ່ຕາມ, ເພື່ອຮັບປະກັນຄວາມປອດໄພສູງສຸດ ທ່ານ ລັດຖະມົນຕີ ຍັງໄດ້ເນັ້ນໜັກໃຫ້ເຈົ້າຂອງໂຄງການແຕ່ລະໂຄງການ ສືບຕໍ່ເພີ້ມທະວີຕິດຕາມ, ກວດກາ ຄວາມປອດໄພຂອງເຂື່ອນຢ່າງເປັນປົກກະຕິ, ຕໍ່ເນື່ອງ ແລະ ເຮັດເປັນປະຈຳ. ພ້ອມກັນນີ້, ກໍ່ຕິດຕາມ, ບໍລິຫານຈັດການນໍ້າຢ່າງຖືກຕ້ອງ, ສອດຄ່ອງກັບສະພາບແວດລ້ອມແຕ່ລະໄລຍະ ໂດຍສະເພາະແມ່ນໃນຊ່ວງລະດູຝົນ ທັງນີ້ ກໍ່ເພື່ອຮັບປະກັນຄວາມປອດໄພຕໍ່ຊີວິດ, ຊັບສິນ ແລະ ສິ່ງແວດລ້ອມ.
ພາບ ແລະ ຂ່າວ ວຽງສະຫວັນ ປຣະດິດ
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
