ກອງປະຊຸມສຳມະນາວິທະຍາສາດກ່ຽວກັບການຄຸ້ມຄອງບໍ່ແຮ່ໃນໄລຍະໃໝ່ ໄດ້ຈັດຂື້ນໃນວັນທີ 23 ສິງຫາ 2024 ທີ່ໂຮງແຮມລາວເທວ ໂດຍໃຫ້ກຽດເປັນປະທານຂອງ ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ມີຜູ້ເຂົ້າຮ່ວມຈາກຕາງໜ້າ ຈາກບັນດາກະຊວງທີ່ກ່ຽວຂ້ອງ, ສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ, ມະຫາວິທະຍາໄລແຫ່ງສາດ, ຊ່ຽວຊານດ້ານທໍລະນີສາດ ແລະ ບໍ່ແຮ່, ບໍລິສັດພູເບ້ຍມາຍນິ້ງ ພ້ອມດ້ວຍບັນດາກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງພະລັງງານ ແລະ ບໍ່ແຮ່ ເຂົ້າຮ່ວມ.
ໃນວາລະການດຳເນີນກອງປະຊຸມ ທ່ານ ສຸຂັນສັກ ສີສຸກ ຫົວຫນ້າກົມທໍລະນີສາດ ແລະ ແຮ່ທາດ ແລະ ທ່ານ ບຸນຍົງ ສີດາວົງ ຫົວໜ້າ ກົມຄຸ້ມຄອງບໍ່ແຮ່ ໄດ້ລາຍງານຫຍໍ້ກ່ຽວກັບຂັ້ນຕອນ, ວິທີການ ອະນຸຍາດແລະຄຸ້ມຄອງໂຄງການບໍ່ແຮ່ ໄລຍະຊອກຄົ້ນສຳຫຼວດຕາມກົດຫມາຍ ແລະ ເຕັກນິກ ທີ່ຈັດຕັ້ງປະຕິບັດຢູ່ໃນປັດຈຸບັນ ແລະ ແຜນການ ຫຼື ຂໍ້ສະເໜີປັບປຸງໃຫ້ດີຂື້ນໃນຕໍ່ໜ້າ ພ້ອມນັ້ນກໍໄດ້ມີການແລກປ່ຽນ ປະກອບຄໍາຄິດຄໍາເຫັນຂອງຜູ້ເຂົ້າຮ່ວມກອງປະຊຸມຈາກພາກສ່ວນຕ່າງໆ.
