ຄະນະພັກຮາກຖານ ພະແນກພະລັງງານ ແລະ ບໍ່ແຮ່ ແຂວງສະຫວັນນະເຂດ ຫວນຄືນມູນເຊື້ອວັນສຳຄັນຕ່າງໆຂອງພັກ, ຂອງຊາດ

          ໃນພິທີ ສະຫາຍ ເລຂາຄະນະພັກຮາກຖານ ໄດ້ຍົກໃຫ້ເຫັນເຖິງມູນເຊື້ອອັນພິລະອາດຫານ ແລະ ການເຕີບໃຫຍ່ຂະຫຍາຍຕົວຂອງສອງວັນປະຫວັດສາດດັ່ງກ່າວ ໂດຍສະເພາະແມ່ນການປົດປ່ອຍປະເທດຊາດ ຄວາມເປັນເອກະລາດ ປະຊາທິປະໄຕ ຂອງປະຊາຊົນຊາວຫວຽດນາມ ອ້າຍນ້ອງ ຈາກພວກຈັກກະພັດຕ່າງດ້າວ ໃນປີ 1945 ເຊິ່ງເປັນກາລະໂອກາດອັນດີໃຫ້ແກ່ການປະຕິວັດລາວ ພາຍໃຕ້ການຊີ້ນໍາ-ນຳພາຂອງພັກຄ້ອມມູນນິດອິນດູຈີນ. ຫຼັງຈາກນັ້ນ, ສະຫາຍ ເລຂາຄະນະພັກຮາກຖານ ຍັງໄດ້ເລົ່າຄືນປະຫວັດຄວາມເປັນມາ ແລະ ຄວາມໝາຍຄວາມສຳຄັນຂອງອົງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ພາຍໃຕ້ຮົ່ມທຸງຂອງພັກ, ບັນດາພາລະບົດ ບາດ ແລະ ຜົນງານອັນພົ້ນເດັ່ນໃນການເຄື່ອນໄຫວ ປະກອບສ່ວນເຂົ້າໃນພາລະກິດປະຕິວັດຊາດ, ປົກປັກຮັກສາ ແລະ ພັດທະນາປະເທດຊາດ. ນັກຮົບເກົ່າລາວ ແມ່ນອະດີດນັກຮົບປະຕິວັດ ໃນຖັນແຖວກໍາລັງປະກອບອາວຸດຂອງປະຊາຊົນລາວ ແມ່ນນາຍ ແລະ ພົນທະຫານ, ນາຍ ແລະ ພົນຕໍາຫລວດ ທີ່ໄດ້ຮັບບໍານານ, ບໍາເນັດ ຫລື ເສຍອົງຄະຍ້ອນການສູ້ຮົບ, ຮັບໃຊ້ການສູ້ຮົບ, ການປະຕິບັດໜ້າທີ່ໃນພາລະ ກິດປົດປ່ອຍຊາດ, ປົກປັກຮັກສາ ແລະ ພັດທະນາປະເທດຊາດ. ສະຫາຍ ໃຫ້ຮູ້ຕື່ມວ່າ: ນັກຮົບເກົ່າລາວ ແມ່ນຜູ້ທີ່ມີຄວາມອົງອາດກ້າ ຫານຊໍານິຊໍານານໃນການສູ້ຮົບ, ແມ່ນນັກຕໍ່ສູ້ປະຈັນບານໂດຍກົງຢູ່ສະໜາມຮົບ, ນັກຮົບກອງທັບປະຊາ ຊົນລາວ ແມ່ນຜູ້ທີ່ໄດ້ຝຶກອົບຮົມເຊື່ອມຊຶມທາງດ້ານທິດສະດີການເມືອງ, ບໍາລຸງກໍ່ສ້າງທາງດ້ານວິຊາການທະຫານ, ສິລະປະຍຸດ-ຍຸດທະວິທີ ແລະ ວິຊາສະເພາະອື່ນໆ ຢູ່ພາຍໃນກົມກອງ, ຈາກບັນດາໂຮງຮຽນຢູ່ພາຍໃນ ແລະ ຕ່າງປະເທດ.