ພິທີເຊັນສັນຍາ ສໍາປະທານ (CA) ໂຄງການຂຸດຄົ້ນ ແລະ ປຸ່ງແຕ່ງແຮ່ຄໍາ, ແຮ່ມັງການ ຢູ່ເມືອງອະນຸວົງ ແລະ ເມືອງລ້ອງແຈ້ງ ແຂວງໄຊສົມບູນ ໄດ້ຈັດຂຶ້ນຢ່າງເປັນທາງ ໃນວັນທີ 17 ມັງກອນ 2023 ຜ່ານມານີ້, ຢູ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງໄຊສົມບູນ. ຕາງໜ້າລັດຖະບານ ລົງນາມເຊັນສັນຍາສຳປະທານໂຄງການໂດຍທ່ານ ພອຍຄໍາ ຮຸ່ງບຸນຍວງ ເຈົ້າແຂວງໆໄຊສົມບູນ, ທ່ານ ບຸນທ່ຽມ ໄຊສົງຄາມ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ທ່ານ ສົມລິດ ສຸພັດດີ ຮອງຫົວໜ້າພະແນກແຜນການ ແລະ ການລົງທຶນ ແຂວງ ແລະ ຕາງໜ້າຝ່າຍບໍລິສັດ ເຊັນໂດຍທ່ານ ຢັງຮົງເວີຍ ປະທານບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ແລະ ທ່ານ ວັນດີ ກວາລີວົງ ອໍານວຍການບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ໂດຍຊ່ອງໜ້າການເຂົ້າຮ່ວມເປັນສັກຂີພິຍານຂອງ ທ່ານ ປອ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ, ມີການນໍາຂອງແຂວງ, ຂອງເມືອງ ຕະຫຼອດຮອດພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ໂຄງການຂຸດຄົ້ນ ແລະ ປຸງແຕ່ງແຮ່ຄໍາ, ແຮ່ມັງການ ຢູ່ເມືອງອະນຸວົງ ແລະ ເມືອງລ້ອງແຈ້ງ ແຂວງໄຊສົມບູນ ແມ່ນໄດ້ດໍາເນີນການຊອກຄົ້ນ, ສຳຫລວດ ແລະ ສຶກສາຄວາມເປັນໄປໄດ້ທາງດ້ານແຮ່ທາດ ຢູ່ 2 ເມືອງດັ່ງກ່າວ ມາເປັນເວລາ 2 ປີ ໃນເນື້ອທີ່ 22,97 ກິໂລຕາແມັດ ພາຍຫຼັງທີ່ໄດ້ເຊັນບົດບັນທຶກຄວາມເຂົ້າໃຈ MOU ກັບລັດຖະບານແຫ່ງ ສປປລາວ ແຕ່ປີ 2020 ເປັນຕົ້ນມາ ແລະ ເຫັນໄດ້ວ່າຢູ່ໃນຂອບເຂດເນື້ອທີ່ດັ່ງກ່າວ ແມ່ນມີບັນດາແຮ່ທາດຄື: ແຮ່ຄໍາ ແລະ ແຮ່ມັງການ. ດັ່ງນັ້ນ ບໍລິສັດຈຶ່ງໄດ້ດໍາເນີນການເຊັນສັນຍາ ເພື່ອສໍາປະທານໂຄງການຂຸດຄົ້ນ ແລະ ປຸ່ງແຕ່ງ ຢ່າງເປັນທາງການ ເພື່ອກໍານົດສິດ, ໜ້າທີ່ ແລະ ພັນທະຕ່າງໆ ລະຫວ່າງຄູ່ຮ່ວມສັນຍາ ກໍຄືລັດຖະບານ ແຫ່ງ ສປປ ລາວ ຕາງໜ້າໂດຍອົງການປົກຄອງ ແຂວງໄຊສົມບູນ ກັບບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ. ຊຶ່ງມີໄລຍະເວລາໃນການສຳປະທານ 20 ປີ ໃນນັ້ນ ໄລຍະການກໍ່ສ້າງ 2 ປີ, ໄລຍະຂຸດຄົ້ນ 15 ປີ ແລະ ໄລຍະການປິດບໍ່ 3 ປີ ໂດຍບໍລິສັດ ຕ້ອງໄດ້ມອບຄ່າຊັບພະຍາກອນລ່ວງໜ້າ ຈໍານວນ 1.000.000 ໂດລາສະຫະລັດ ໃນນັ້ນຕ້ອງມອບກ່ອນເຊັນສັນຍາ ຈໍານວນ 500.000 ໂດລາສະຫະລັດ ແລະ ມອບພາຍຫຼັງເຊັນສັນຍາອີກ ຈໍານວນ 500.000 ໂດລາສະຫະລັັດ ພ້ອມທັງຕ້ອງປະຕິບັດພັນທະປະກອບສ່ວນພັດທະນາສັງຄົມ, ພັດທະນາທ້ອງຖີ່ນ ແລະ ເງິນຕິດຕາມທາງດ້ານວິຊາການ ຈໍານວນ 80.000 ໂດລາສະຫະລັດ/ປີ ຕາມທີ່ໄດ້ກໍານົດໄວ້ໃນສັນຍາ ເພື່ອຮັບປະກັນດ້ານຄວາມຖືກຕ້ອງ, ສອດຄ່ອງຕາມລະບຽບຫຼັກການ ພ້ອມທັງໄດ້ຮັບຜົນປະໂຫຍດຮ່ວມກັນ ທັງສອງຝ່າຍ. ໃນໂອກາດກັ່ງກ່າວ ບໍລິສັດຍັງໄດ້ມອບລົດກະບະໄຟຟ້າ ຈໍານວນ 1 ຄັນ ໃຫ້ແຂວງໄຊສົມບູນ ຕື່ມອີກ.
ພາບ ແລະ ແຫຼ່ງຂ່າວ: ພະແນກພະລັງງານ ແລະ ບໍ່ແຮ່ ແຂວງໄຊສົມບູນ
ຮຽບຮຽງຂ່າວ: ຄຳແສງ ແກ້ວປະເສີດ
