ກອງປະຊຸມລະດັບເຈົ້າໜ້າທີ່ ອາວຸໂສພະລັງງານ ອາຊຽນ ໄດ້ຈັດຂຶ້ນໃນວັນທີ 24 ກັນຍາ 2024 ນີ້ ຢູ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ສປປລາວ ພາຍໃຕ້ການເປັນປະທານຂອງ ທ່ານ ປອ.ອາຄົມເດດ ວົງໄຊ ຫົວໜ້າກົມແຜນການ ແລະ ການຮ່ວມມື, ກະຊວງພະລັງງານ ແລະ ບໍ່ແຮ່, ຫົວໜ້າເຈົ້າໜ້າທີ່ອາວຸໂສພະລັງງານອາຊຽນ ແຫ່ງ ສປປ ລາວ, ມີບັນດາຫົວໜ້າເຈົ້າໜ້າທີອາວຸໂສພ້ອມດ້ວຍຄະນະຜູ້ແທນຈາກ 10 ປະເທດອາຊຽນ ແລະ ຕີມໍ ເລດເຕ ໃນນາມປະເທດສັງເກດການ, ກອງເລຂາອາຊຽນ, ສູນພະລັງງານອາຊຽນ, ກອງເລຂາ HAPUA ແລະ ASCCOP ເຂົ້າຮ່ວມ.
ກອງປະຊຸມລະດັບເຈົ້າໜ້າທີ່ ອາວຸໂສພະລັງງານ ອາຊຽນ ຄັ້ງນີ້, ຈັດຂຶ້ນເພື່ອປຶກສາຫາລື ແລະ ກະກຽມບົດສະຫຼຸບລາຍງານຂອງທຸກໆບັນດາກິດຈະກຳພາຍໃຕ້ແຜນງານການຮ່ວມມືດ້ານພະລັງງານອາຊຽນ APAEC ທັງໝົດ 7 ໜ້າວຽກຍ່ອຍລວມເຖິງການກະກຽມຮັບຮອງເອົາບັນດາ 8 ແຜນວຽກບູລິມະສິດ (Annual Priority on Energy) ພາຍໃຕ້ການເປັນປະທານຂອງ ສປປ ລາວ. ກອງປະຊຸມສະຫຼຸບໄດ້ຫລາຍບັນຫາໂດຍສະເພາະຕິດພັນກັບສັນຍາຕະຂ່າຍໄຟຟ້າອາຊຽນ (APG); ສັນຍາວ່າດ້ວຍຄວາມໝັ້ນຄົງທາງດ້ານນໍ້າມັນເຊື້ອໄຟອາຊຽນ (APSA); ບົດສຶກສາການຄາດຄະເນແນວໂນ້ມດ້ານພະລັງງານອາຊຽນ ສະບັບທີ 8 ເພື່ອເປັນພື້ນຖານໃນການລາຍງານແກ່ກອງປະຊຸມລັດຖະມົນຕີພະລັງງານອາຊຽນທີ່ຈະຈັດຂຶ້ນໃນວັນທີ 26-27 ກັນຍາ 2024.
