ຕອນເຊົ້າວັນທີ 19 ມັງກອນ 2022 ນີ້, ກົມນິຕິກໍາ, ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມທາບທາມຮ່າງກົດໝາຍວ່າດ້ວຍຄວາມປອດໄພຂອງເຂື່ອນ ໃນຮູບແບບກອງປະຊຸມເຊິ່ງໜ້າ ແລະ ກອງປະຊຸມທາງໄກ ຢູ່ຫ້ອງປະຊຸມ102 ກະຊວງ ພະລັງງານ ແລະ ບໍ່ແຮ່, ພາຍໃຕ້ການເປັນປະທານຂອງ ທ່ານ ປອ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານແລະ ບໍ່ແຮ່, ສະມາຊິກສະພາແຫ່ງຊາດຊຸດທີ IX ເຂດເລືອກຕັ້ງທີ VI ແຂວງຫຼວງພະບາງ, ມີ ທ່ານ ຄຳໂສ້ ກຸໂພຄຳ ຫົວໜ້າກົມນິຕິກຳ, ກະຊວງ ພະລັງງານ ແລະ ບໍ່ແຮ່ ພ້ອມດ້ວຍພາກສ່ວນທີ່ກ່ຽວຂ້ອງທັງຢູ່ສູນກາງ ແລະ ທ້ອງຖິ່ນເຂົ້າຮ່ວມ.
ໃນໂອກາດກ່າວເປີດກອງປະຊຸມ ທ່ານ ຮອງລັດຖະມົນຕີ ກ່າວວ່າ: ຜ່ານການລົງກວດກາບັນດາເຂື່ອນໄຟຟ້າຕົວຈິງ ແລະ ຈັດກອງປະຊຸມຖອດຖອນບົດຮຽນຄວາມປອດໄພຂອງເຂື່ອນຫຼາຍຄັ້ງທີ່ຜ່ານມາ, ສະຫຼຸບໄດ້ວ່າ ໄລຍະຜ່ານມາ ບັນດາກົດໝາຍ ແລະ ນິຕິກໍາທີ່ຄຸ້ມຄອງຄວາມປອດໄພຂອງເຂື່ອນຢູ່ປະເທດລາວເຮົາ ຍັງມີໜ້ອຍ ແລະ ບໍ່ທັນເໝາະສົມກັບສະພາບການຂອງໂລກປັດຈຸບັນທີ່ມີໄພທໍາມະຊາດເກີດຂຶ້ນຫຼາຍ ແລະ ຮ້າຍແຮງ, ນິຕິກໍາທີ່ມີຍັງມີລັກສະນະສົ່ງເສີມການລົງທຶນ ແຕ່ຍັງບໍ່ທັນເວົ້າເຖິງຄວາມປອດໄພຂອງເຂື່ອນເທົ່າທີ່ຄວນ, ການຈັດຕັ້ງປະຕິບັດ ແລະ ການບັງຄັບໃຊ້ກົດໝາຍ ຫຼື ນິຕິກໍາຍັງບໍ່ທັນແຂງແຮງ, ການແບ່ງຂັ້ນຄຸ້ມຄອງ ແລະ ຄວາມຮັບຜິດຊອບ ໃຫ້ກັບພາກສ່ວນຕ່າງໆທີ່ກ່ຽວຂ້ອງ ໃນດ້ານຄວາມປອດໄພຂອງເຂື່ອນຍັງບໍ່ທັນຈະແຈ້ງ ແລະ ລະອຽດ, ຄວາມຮູ້, ຄວາມສາມາດ ແລະ ຄວາມເອົາໃຈໃສ່ຄຸ້ມຄອງເຂື່ອນໃຫ້ມີຄວາມປອດໄພ ຂອງຂະແໜງພະລັງງານ ແລະ ບໍ່ແຮ່ ແຕ່ສູນກາງ ລົງຮອດທ້ອງຖິ່ນ ຍັງບໍ່ທັນເຮັດໄດ້ດີ, ການຈັດຕັ້ງ ແລະ ພະນັກງານຍັງບໍ່ທັນພຽງພໍ ຫຼື ເໝາະສົມ, ການສຶກສາ, ສໍາຫຼວດດ້ານທໍລະນີສາດ,ດ້ານອຸທົກກະສາດ ແລະ ສິ່ງແວດລ້ອມ, ການກໍ່ສ້າງ ແລະ ການດໍາເນີນງານ ຍັງບໍ່ທັນມີການຄຸ້ມຄອງທີ່ດີ.
ດ້ວຍເຫດຜົນດັ່ງກ່າວ, ມາໃນປີ 2020 ລັດຖະບານ ຈຶ່ງຕົກລົງສ້າງກົດໝາຍວ່າດ້ວຍຄວາມປອດໄພຂອງເຂື່ອນ ແລະ ໃນປີ 2021 ໄດ້ປັບປຸງພາລະບົດບາດຂອງກະຊວງພະລັງງານ ແລະ ບໍ່ແຮ່ຄືນໃໝ່ ຊຶ່ງໄດ້ສ້າງຕັ້ງກົມຄຸ້ມຄອງຄວາມປອດໄພອຸດສາຫະກໍາພະລັງງານ ເພື່ອຮັບປະກັນໃຫ້ການກໍ່ສ້າງ ແລະ ດໍາເນີນງານບັນດາເຂື່ອນ ແຕ່ລະປະເພດໃຫ້ມີຄວາມປອດໄພທີ່ສຸດ. ດັ່ງນັ້ນ, ກົດໝາຍວ່າດ້ວຍຄວາມປອດໄພຂອງເຂື່ອນ ຈຶ່ງແມ່ນໜຶ່ງໃນກົດໝາຍທີ່ນອນຢູ່ໃນແຜນການຂອງລັດຖະບານໃນປີ 2021-2025. ພ້ອມກັນນີ, ທ່ານ ຮອງລັດຖະມົນຕີ ຍັງໄດ້ຮຽກຮ້ອງຜູ້ເຂົ້າຮ່ວມທຸກໆທ່ານ ຈົ່ງເອົາໃຈໃສ່ປະກອບຄໍາຄິດເຫັນໃສ່ຮ່າງກົດໝາຍຢ່າງສ້າງສັນ ແລະ ກົງໄປ ກົງມາ ເພື່ອເຮັດໃຫ້ກົດໝາຍດັ່ງກ່າວ ມີເນື້ອໃນຄົບຖ້ວນ ສາມາດຈັດຕັ້ງປະຕິບັດໄດ້. ກອງປະຊຸມດັ່ງກ່າວນີ້ ຈະດຳເນີນໄປເປັນເວລາ 1 ວັນຈຶ່ງຈະປິດລົງ.
ພາບ: ສົມສະໜຸກ ທອງສະຫງວນ
ແຫຼ່ງຂໍ້ມູນ: ກົມນິຕິກຳ
ຮຽບຮຽງຂ່າວ: ຄຳແສງ ແກ້ວປະເສີດ
