ພິທີດັ່ງກ່າວ ໄດ້ຈັດຂຶ້ນໃນວັນທີ 28 ຕຸລາ 2024 ທີ່ຜ່ານມາ ຢູ່ຫ້ອງປະຊຸມໃຫຍ່ຂອງແຂວງ, ພາຍໃຕ້ການເປັນປະທານຂອງ ທ່ານ ຄຳແສນ ພະສະແຫວງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກພະລັງງານ ແລະ ບໍ່ແຮ່ ແຂວງ. ໃຫ້ກຽດເຂົ້າຮ່ວມຂອງ ທ່ານ ບຸນຫຼາຍ ວຸດທິ ຮອງເລຂາພັກແຂວງ, ຜູ້ຊີ້ນຳວຽກງານພັກພະນັກງານ. ມີບັນດາ ທ່ານ ຮອງຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານລັດຖະກອນພາຍໃນພະແນກເຂົ້າຮ່ວມ.
ທ່ານ ຄຳແສນ ພະສະແຫວງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກພະລັງງານ ແລະ ບໍ່ແຮ່ ແຂວງ ໄດ້ຕາງໜ້າໃຫ້ຄະນະພັກ, ຄະນະນຳພະແນກພະລັງງານ ແລະ ບໍ່ແຮ່ ແຂວງ ລາຍງານການຈັດຕັ້ງປະຕິບັດ ບັ້ນແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ “ ຮັກຊາດ-ພັດທະນາ ” ຂອງພະແນກ ພບ ແຂວງ 5 ປີ 2016-2020 ແລະ ທິດທາງແຜນການ 5 ປີ 2021-2025 ບາງຕອນ ທ່ານ ໄດ້ກ່າວ່າ: ໂດຍປະຕິບັດຕາມ ລັດຖະດໍາລັດຂອງປະທານປະເທດ ສະບັບເລກທີ 011/ປປທ, ລົງວັນທີ 20 ມັງກອນ 2010 ວ່າດ້ວຍການເປີດຂະບວນການແຂ່ງຂັນ-ຍ້ອງຍໍ ທົ່ວປະເທດໃນໄລຍະໃໝ່; ເພື່ອຊຸກຍູ້ຂະບວນການແຂ່ງ ຂັນ“ຮັກຊາດ ແລະ ພັດທະນາ”ໃຫ້ແຂງແຮງເລິກເຊິ່ງ, ບົນພື້ນຖານຈຸດໝາຍລວມຂອງພັກ, ຂອງຊາດ ແລະ ບົນຈິດໃຈບຸກບືນ ສູ້ຊົນຈັດຕັ້ງປະຕິບັດບັນດາຄາດໝາຍໃນການພັດທະນາວຽກງານພະລັງງານ ແລະ ບໍ່ແຮ່. ຄະນະພັກ-ຄະນະພະແນກພະລັງງານ ແລະ ບໍ່ແຮ່ ແຂວງເຊກອງ ໄດ້ຖືເອົາວຽກງານແຂ່ງຂັນ-ຍ້ອງຍໍ ເປັນວຽກງານໜຶ່ງທີ່ສໍາຄັນໃນການປະຕິບັດນະໂຍບາຍຂອງພັກຕໍ່ພະນັກງານ-ລັດຖະກອນພາຍໃນພະແນກ, ທັງເປັນສິ່ງກະຕຸກຊຸກຍູ້ໃນການປະຕິບັດແຜນພັດທະນາເສດຖະກິດ-ສັງຄົມ, ຕິດພັນກັບການປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ໃນແຕ່ລະໄລຍະ ຕາມ 8 ແຜນງານບຸລິມະສິດໃນການພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງເຊກອງ ໃຫ້ມີຜົນສໍາເລັດ, ຄະນະພັກຖືເອົາການຍ້ອງຍໍສັນລະເສີນເປັນຂີດໝາຍໃນການຮັບຮູ້ຜົນງານ, ຄຸນງາມຄວາມດີຂອງບຸກຄົນ ແລະ ກົມກອງລວມໝູ່ ທີ່ໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ . ຕະຫຼອດໄລຍະຜ່ານມາ ຄະນະພັກ, ຄະນະພະແນກ,ຄະນະກໍາມະການແຂ່ງຂັນ-ຍ້ອງຍໍຂອງພະແນກກໍ່ໄດ້ເອົາໃຈໃສ່ຊີ້ນໍາ-ນໍາພາໂດຍກົງຕໍ່ກັບວຽກງານແຂ່ງຂັນ-ຍ້ອງຍໍ ໂດຍຕິດພັນກັບຄໍາຂວັນຂອງກອງປະຊຸມໄຫຍ່ຄັ້ງທີ II ຂອງອົງຄະນະພັກກະຊວງທີ່ວ່າ (ພັດທະນາພະລັງງານ-ບໍ່ແຮ່ຕາມທິດຫັນເປັນອຸດສະພະກໍາ ແລະ ທັນສະໄໝ,ຂຸດຄົ້ນ ແລະ ນໍາໄຊ້ທ່າແຮງຊັບພະຍາກອນ ແລະ ທໍາມະຊາດໄຫ້ເຂັ້ມແຂງ,ຍູ້ແຮງການສະໜອງໄຟຟ້າຮັບໄຊ້ພາຍໃນໄຫ້ພຽງພໍ ແລະ ໝັ້ນຄົງ,ເຊື່ອມໂຍງ ແລະ ແລກປຽ່ນພະລັງງານກັບປະເທດເພື່ອນບ້ານ ແລະ ພາກພື້ນ,ພັດທະນາພະລັງງານ ແລະ ບໍ່ແຮ່ໄຫ້ໄປຕາມທິດຍືນຍົງ) ,ຍຸດທະສາດການພັດທະນາແຮ່ທາດຮອດປີ 2030 ຂອງກະຊວງພະລັງງານ ແລະ ບໍ່ແຮ່ ແລະ ຂະບວນການຕ່າງໆ ທີ່ ໄດ້ວາງກໍານົດແຜນສູ້ຊົນຂອງພະແນກ, ແລະ ອົງການຈັດຕັ້ງມະຫາຊົນ ກໍານົດອອກແຕ່ລະໄລຍະ.
