ລະຫວ່າງວັນທີ 18-19 ພະຈິກ 2024 ນີ້ ທ່ານ ປອ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະໄດ້ເຄື່ອນໄຫວ, ຊຸກຍູ້ ການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ຢູ່ແຂວງໄຊຍະບູລີ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ປອ ໄຊພອນ ບຸນຊູ ວ່າການແທນຫົວໜ້າພະແນກພະລັງງານ ແລະ ບໍ່ແຮ່ ແຂວງ, ພ້ອມດ້ວຍຄະນະພັກ, ຄະນະພະແນກ ແລະ ພະນັກງານພາຍໃນພະແນກພະລັງງານ ແລະ ບໍ່ແຮ່ ແຂວງໄຊຍະບູລີ.
ໃນໂອກາດເຄື່ອນໄຫວວຽກງານວິຊາສະເພາະຢູ່ແຂວງໄຊຍະບູລີ ຄັ້ງນີ້, ທ່ານ ຮອງລັດຖະມົນຕີ ໄດ້ເຂົ້າພົບປະ, ຢ້ຽມຂໍ່ານັບ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆ ໄຊຍະບູລີ ພ້ອມດ້ວຍຄະນະນຳຂອງແຂວງ. ໃນໂອກາດດັ່ງກ່າວ, ທ່ານ ຮອງລັດຖະມົນຕີ ໄດ້ແຈ້ງຈຸດປະສົງຂອງການມາເຄື່ອນໄຫວ ແລະ ເຮັດວຽກຂອງການນຳກະຊວງພະລັງງານ ແລະ ບໍ່ແຮ່ ຢູ່ແຂວງໄຊຍະບູລີ ໃນຄັ້ງນີ້ ໃຫ້ ທ່ານ ເຈົ້າແຂວງໄດ້ຮັບຊາບ ໂດຍສະເພາະແມ່ນໂຄງການເຂື່ອນໄຟຟ້ານ້ຳຮຸ່ງ 1 ແລະ ໂຄງການຂຸດຄົ້ນ ແລະ ປຸງແຕ່ງແຮ່ຄຳ ຂອງບໍລິສັດ MPG ມາຍນິ້ງ.
ຫຼັງຈາກນັ້ນ, ທ່ານ ເຈົ້າແຂວງ ໄດ້ຕາງໜ້າການນຳຂອງແຂວງ ສະແດງຄວາມຕ້ອນຮັບ ແລະ ຕີລາຄາສູງຕໍ່ການລົງມາເຄື່ອນໄຫວຊີ້ນຳວຽກວິຊາສະເພາະຂະແໜງການພະລັງງານ ແລະ ບໍ່ແຮ່ ຂອງ ທ່ານ ປອ ຈັນສະແຫວງ ບຸນຍົງ ຮອງລັດຖະມົນຕີ ພ້ອມດ້ວຍຄະນະໃນຄັ້ງນີ້. ພ້ອມກັນນີ້, ທ່ານ ເຈົ້າແຂວງກໍ່ໄດ້ລາຍງານສະພາບຂອງແຂວງໂດຍຫຍໍ້ໃຫ້ ທ່ານ ຮອງລັດຖະມົນຕີຊາບວ່າ: ແຂວງໄຊຍະບູລີ ເປັນແຂວງໜຶ່ງໃນຈໍານວນ 8 ແຂວງພາກເໜືອຂອງລາວ ຕັ້ງຢູ່ຝັ່ງຂວາຂອງແມ່ນໍ້າຂອງ, ມີເນື້ອທີທັງໝົດ 16.389 ກິໂລຕາແມັດ, ເນື້ອທີ່ 80% ເປັນພູດອຍ, ປະກອບມີ 11 ເມືອງ, 430 ບ້ານ, ມີພົນລະເມືອງທັງໝົດ 401.949 ຄົນ, ມີ 8 ເຜົ່າຢູ່ຮ່ວມກັນ. ການພັດທະນາເສດຖະກິດຂອງແຂວງ ແມ່ນອີງໃສ່ 3 ທ່າແຮງຕົ້ນຕໍ ທີ່ເປັນເສົາຄໍ້າຄື: ການຜະລິດກະສິກໍາຮອບດ້ານຕິດພັນກັບການປຸງແຕ່ງ, ອຸດສາຫະກໍາພະລັງງານໄຟຟ້າ, ການບໍລິການ ແລະ ການຄ້າຊາຍແດນ. ໂດຍອີງໃສ່ 3 ທ່າແຮງບົ່ມຊ້ອນດັ່ງກ່າວ ຄາດວ່າໝົດປີອັດຕາການເຕີບໂຕເສດຖະກິດຂອງແຂວງ ຈະບັນລຸໃນລະດັບ 5,5% ລວມຍອດຜະລິດຕະພັນພາຍໃນ 15.762 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 36,93 ລ້ານກີບ.
