ໄລຍະ 5 ປີ 2020-2024 ກະຊວງພະລັງງານ ແລະ ບໍ່ແຮ່ ໄດ້ສຸ່ມທຶນຮອນເຂົ້າໃນວຽກງານ3ສ້າງ ຫຼາຍກວ່າ 800 ລ້ານກີບ

          ທ່ານ ນາງ ແສງເດືອນ ວົງອິນ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ທັງເປັນຫົວໜ້າກອງເລຂາ 3 ສ້າງຂອງກະຊວງ ໄດ້ລາຍງານໃຫ້ຮູ້ວ່າ: ປະຕິບັດຕາມມະຕິຕົກລົງຂອງກົມການເມືອງສູນກາງພັກ, ຕາມຄຳສັ່ງແນະນຳຂອງຄະນະເລຂາທິການສູນກາງພັກ , ຄຳສັ່ງຂອງນາຍົກລັດຖະມົນຕີ ແລະ ການຊີ້ນຳຂອງຄະນະພັກຄະນະນຳກະຊວງ. ຄະນະພັກກະຊວງ ຈັດຕັ້ງປະຕິບັດວຽກງານຕ່າງທຂອງຂະແໜງການ ໄດ້ເອົາໃຈໃສ່ຈັດຕັ້ງຜັນຂະຫາຍຕາມມະຕິ, ຄຳສັ່ງ ດັ່ງກ່າວ ເປັນຕົ້ນແມ່ນໄດ້ລົງສົມທົບກັບອຳນາດການປົກຄອງທ້ອງຖິ່ນຂອງບັນດາແຂວງ ໃນຂອບເຂດທົ່ວປະເທດ ເພື່ອທົບທວນ ຄືນຄວາມຄືບໜ້າກ່ຽວກັບ ການແບ່ງຄວາມຮັບຜິດຊອບໃນການຄຸ້ມຄອງຂອງຕົນ ທີ່ໄດ້ມອບໝາຍໃຫ້ອຳນາດການປົກຄອງທ້ອງຖິ່ນໃນໄລຍະຜ່ານມານັ້ນ ໂດຍສະເພາະແມ່ນໄດ້ກວດກາຕີລາຄາຄືນບັນດາໂຄງການພັດທະນາຕ່າງໆ ນັບທັງບັນດາໂຄງການລົງທຶນດ້ານພະລັງງານ ແລະ ບໍ່ແຮ່ ທີ່ໄດ້ຖືກມອບໝາຍໃຫ້ອຳນາດການປົກຄອງ ທ້ອງຖິ່ນເປັນເຈົ້າການຈັດຕັ້ງປະຕິບັດ ແລະ ເກີດຜົນເປັນຈິງ ມີການປັບປຸງພາລະບົດບາດ ຄຸ້ມຄອງດ້ານມະຫາພາກ ແລະ ຈຸລະພາກ ຂອງຂະແໜງການພະລັງງານ ແລະ ບໍ່ແຮ່ ຕາມທິດ 3 ສ້າງ.

           ທ່ານ ຫົວໜ້າກອງເລຂາ ໄດ້ລາຍງານໃຫ້ຮູ້ຕື່ມວ່າ: ຂະແໜງການພະລັງງານ ແລະ ບໍ່ແຮ່ ໄດ້ຈັດສັນງົບປະມານຈຳນວນໜຶ່ງເພື່ອລົງຊຸກຍູ້ ແລະ ປະເມີນການຈັດຕັ້ງປະຕິບັດວຽກງານ 3 ສ້າງ ໃຫ້ກັບພະແນກພະລັງງານ ແລະ ບໍ່ແຮ່ ນະຄອນຫຼວງ ແລະ ແຂວງ ເພື່ອໄປຊຸກຍູ້ໃຫ້ແກ່ ເມືອງ ແລະ ບ້ານ ໃນການສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານໃຫ້ເປັນຫົວໜ່ວຍພັດທະນາ ໄດ້ຊຸກຍຸ້ດ້ານງົບປະມານ ໃຫ້ພະແນກ ພບ ນະຄອນຫຼວງ ແລະ ບັນດາພະແນກ ພບ ປະຈຳແຂວງ ເພື່ອລົງຊຸກຍູ້ເມືອງ 3 ສ້າງ ລວມທັງໝົດ 846ລ້ານ ກີບ ໃນນີ້ ປີ 2020 ຈຳນວນ 180 ລ້ານກີບ (ແຂວງລະ 10ລ້ານກີບ); ປີ 2021 ຈໍານວນ 180 ລ້ານກີບ (ແຂວງລະ 10ລ້ານກີບ); ປີ 2022 ຈໍານວນ 270ລ້ານກີບ (ແຂວງລະ 15 ລ້ານກີບ) ແລະ ປີ 2023 ຈໍານວນ 216ລ້ານກີບ (ແຂວງລະ 12,000,000 ກີບ). ວຽກງານການຕິດຕາມກວດກາ ແລະ ຊຸກຍູ້ການແກ້ໄຂຜົນກະທົບທາງດ້ານສິ່ງແວດລ້ອມ-ດ້ານສັງຄົມ ມາຮອດປີ 2023 ການຈັດສັນການຍົກຍ້າຍ, ການຟື້ນຟູ ແລະ ຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກບັນດາໂຄງການການພັດທະນາພະລັງງານໄຟຟ້າທົ່ວປະເທດ ຈຳນວນ 22 ໂຄງການ ແລະ ໄດ້ສຳເລັດການຈັດສັນຍົກຍ້າຍ 222 ບ້ານ, ມີ 11,717 ຫຼັງຄາເຮືອນ, ມີມູນຄ່າຊົດເຊີຍຜົນກະທົບທັງໝົດປະມານ 888,648,961 ໂດລາສະຫະລັດ ເຊິ່ງຜ່ານການຈັດຕັ້ງປະຕິບັດເຫັນວ່າໂຄງການພັດທະນາໄຟຟ້າເປັນວຽກໜຶ່ງທີ່ສຳຄັນໃນການພັດທະນາພະລັງງານໄຟຟ້າເພື່ອຜະລິດ ແລະ ຈຳໜາ່ຍຊົມໃຊ້ພາຍໃນ ແລະ ສົ່ງຂາຍໄປຕ່າງປະເທດ, ຄຽງຄູ່ດຽວກັນກັນກໍ່ຍັງສາມາດພັດທະນາພື້ນຖານໂຄງລ່າງໃຫ້ແກ່ຂັ້ນທ້ອງຖິ່ນ ໂດຍສະເພາະການໂຮມບ້ານນ້ອຍເຂົ້າເປັນບ້ານໃຫຍ່ ຊຶ່ງເຫັນໄດ້ວ່າໂຄງການພັດທະນາພະລັງງານໄຟຟ້າແມ່ນເຮັດຖືກຕ້ອງຕາມແນວທາງ ແລະ ນະໂຍບາຍຂອງພັກ-ລັດ. ອັນທີ່ພົ້ນເດັ່ນອີກວຽກງານໜຶ່ງ ແມ່ນການຂະຫຍາຍຕາໜ່າງໄຟຟ້າ ໄປສູ່ຊົນນະບົດ, ເຂດພູດອຍ-ຫ່າງໄກສອກຫຼີກ ເຂດທີ່ເປັນພື້ນຖານຂອງການປະຕິວັດໃນໄລຍະຕໍ່ຕ້ານຈັກກະພັດຜູ້ຮຸກຮານ ມາຮອດທ້າຍປີ 2023 ບັນດາແຂວງ, ເມືອງ ໃນຂອບເຂດທົ່ວປະເທດມີໄຟຟ້າຊົມໃຊ້ແບບຖາວອນ 100%, ບ້ານກວມເອົາ 90ກວ່າ% ແລະ ກວມເອົາ 95%ຂອງຄົວເຮືອນໃນຂອບເຂດທົ່ວປະເທດ.