ເນື່ອງໃນໂອກາດສະເຫຼີມສະຫຼອງວັນຊາດທີ2 ທັນວາ ຄົບຮອບ 49 ປີ ປີ2024 ນີ້, ທ່ານ ຫວຽນ ມິງ ເຕິມ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມຫວຽດນາມ ພ້ອມຄະນະໄດ້ເຂົ້າຢ້ຽມຂໍ່ານັບ ແລະ ອວຍພອນ ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່ ຢູ່ຫ້ອງຮັບແຂກຊັ້ນ2 ເມື່ອຕອນເຊົ້າວັນທີ 6 ທັນວາ 2024 ນີ້.
ໃນໂອກາດດັ່ງກ່າວ ທ່ານ ລັດຖະມົນຕີ ໄດ້ສະແດງຄວາມຕ້ອນຮັບ ແລະ ຂອບໃຈຢ່າງສູງ ຕໍ່ ທ່ານ ທູດ ທີ່ໄດ້ເຂົ້າພົບປະ, ຢ້ຽມຢາມ ແລະ ອວຍພອນການນຳກະຊວງພະລັງງານ ແລະ ບໍ່ແຮ່ ໃນຄັ້ງນີ້. ພ້ອມກັນນີ້, ທ່ານ ລັດຖະມົນຕີ ຍັງໄດ້ລາຍງານຫຍໍ້ກ່ຽວກັບສະພາບທີ່ພົ້ນເດັ່ນການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ໃນໄລຍະຜ່ານມາ ພ້ອມຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ແລະ ທິດທາງການຈັດຕັ້ງປະຕິບັດໃນຕໍ່ໜ້າ. ທ່ານ ລັດຖະມົນຕີ ຖືໂອກາດນີ້, ສະແດງຄວາມຮູ້ບຸນຄຸນ ແລະ ຂອບໃຈຢ່າງສູງຕໍ່ການສະໜັບສະໜູນ, ຊ່ວຍເຫຼືອ ຂອງພັກ, ລັດຖະບານ ຫວຽດນາມ ຕໍ່ການພັດທະນາຂະແໜງການພະລັງງານ ແລະ ບໍ່ແຮ່.
