ເນື່ອງໃນໂອກາດສະເຫຼີມສະຫຼອງວັນຊາດທີ2 ທັນວາ ຄົບຮອບ 49 ປີ 2024 ນີ້, ຄະນະພັກ, ຄະນະນຳກະຊວງ ນຳໂດຍ ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ອວຍພອນ ອາດີດການນຳກະຊວງ ເຊິ່ງປະກອບມີ ທ່ານ ທອງພັດ ອິນທະວົງ ອາດີດຮອງເລຂາຄະນະພັກ, ຮອງລັດຖະມົນຕີ; ທ່ານ ນາງ ຈັນສະຫວາດ ບຸບຜາ ອາດີດຄະນະປະຈຳພັກ, ປະທານກວດກາພັກ, ຮອງລັດຖະມົນຕີ ແລະ ທ່ານ ທອງຂັນ ພິມວິໄລ ອາດີດຄະນະປະຈຳພັກ, ອາດີດຫົວໜ້າກົມຈັດຕັ້ງ ແລະ ພະນັກງານ.
ຢູ່ແຕ່ລະບອນ ທ່ານ ລັດຖະມົນຕີ ໄດ້ນຳເອົາຄວາມຢື້ຢາມຖາມຂ່າວ, ຄວາມສາມັກຄີຮັກແພງ ແລະ ຄວາມເປັນຫ່ວງເປັນໃຫຍ່ ຂອງຄະນະພັກ, ຄະນະນຳກະຊວງ ກໍ່ຄືພະນັກງານ, ລັດຖະກອນ ແລະ ກຳມະກອນທົ່ວຂະແໜງການພະລັງງານ ແລະ ບໍ່ແຮ່ ເຖິງບັນດາ ທ່ານ ອາດີດການນຳກະຊວງ ທີ່ໄດ້ພັກຜ່ອນຮັບອູດໜູນບຳນານ. ພ້ອມກັນນີ້, ທ່ານ ລັດຖະມົນຕີ ຍັງໄດ້ອວຍພອນໃຫ້ພວກເພິ່ນ ຢູ່ດີມີແຮງ, ມີຄວາມສຸກ ແລະ ສືບຕໍ່ຕິດຕາມ, ໃຫ້ຄຳປຶກສາຫາລື ແລະ ແນະນຳໃນການຈັດຕັ້ງປະຕິບັດວຽກງານພະລັງງານ ແລະ ບໍ່ແຮ່ ໃຫ້ໄດ້ຮັບຜົນສຳເລັດຢ່າງສະຫງ່າງາມ.
