ໃນວັນທີ 17 ທັນວາ 2024 ຢູ່ໂຮງແຮມ Double tree by Hilton ກົມຄຸ້ມຄອງພະລັງງານ ໄດ້ຈັດກອງປະຊຸມປຶກສາຫາລືກ່ຽວກັບອົງກອນລະບຽບການພະລັງງານ, ການປັບປຸງກົດໝາຍໄຟຟ້າ ແລະ ການພັດທະນາຕະຫຼາດການຊື້-ຂາຍໃບຢັ້ງຢືນພະລັງງານສະອາດ (REC) ພາຍໃຕ້ການເປັນປະທານຂອງ ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່, ມີຕາງໜ້າຈາກບັນດາກົມ, ສະຖາບັນ, ລັດວິສາຫະກິດອ້ອມຂ້າງກະຊວງ ພ້ອມດ້ວຍຜູ້ຕາງໜ້າຈາກອົງການຈັດຕັ້ງສາກົນ ເຂົ້າຮ່ວມ. ກອງປະຊຸມຄັ້ງນີ, ໄດ້ຮັບການສະໜັບສະໜູນຈາກອົງການໄຈກາ (JICA), ອົງ ການຮ່ວມມືດ້ານພະລັງງານແບບຍືນຍົງ ລາວ-ອົດສະຕຣາລີ (LASEP) ແລະ ໂຄງການ USAID-SPP.
ກອງປະຊຸມໄດ້ທົບທວນ ແລະ ປຶກສາຫາລື (1) ການສ້າງອົງກອນລະບຽບການພະລັງງານພ້ອມກັບການປັບປຸງກົດໝາຍວ່າດ້ວຍໄຟຟ້າ ແລະ (2) ການຈັດຕັ້ງປະຕິບັດແຜນງານ ແລະ ການກຳນົດສິດການອອກຂອງ REC.
ກອງປະຊຸມໄດ້ປຶກສາຫາລືກ່ຽວກັບການປັບປຸງກົດໝາຍວ່າດ້ວຍໄຟຟ້າ ເພື່ອສ້າງຕັ້ງອົງກອນຄຸ້ມຄອງລະບົບໄຟຟ້າ, ເຊິ່ງໄດ້ສ້າງຕັ້ງຄະນະກຳມະການເຮັດວຽກ ໃນເດືອນ ມິຖຸນາ 2024 ແນໃສ່ສະເໜີປັບປຸງກົດໝາຍວ່າດ້ວຍໄຟຟ້າໃນປີ 2025. ໃນຂອບເຂດການເຄື່ອນໄຫວຂອງຄະນະກຳມະການນີ້ ໄດ້ປຶກສາຫາລືກ່ຽວກັບການຈັດຕັ້ງອົງກອນຄຸ້ມຄອງລັດພ້ອມກັບການປັບປຸງກົດໝາຍວ່າດ້ວຍໄຟຟ້າ ແລະ ຢືນຢັນທິດທາງໃນອະນາຄົດໂດຍອີງໃສ່ຂໍ້ສະເຫນີຂອງ JICA ແລະ LASEP.
ສໍາລັບ ການພັດທະນາຕະຫຼາດການຊື້-ຂາຍໃບຢັ້ງຢືນພະລັງງານສະອາດ REC ໄດ້ປຶກສາຫາລືກ່ຽວກັບການສ້າງຕັ້ງຜູ້ອອກໃບຢັ້ງຢືນທ້ອງຖິ່ນເປັນຫນຶ່ງໃນບັນຫາບູລິມະສິດໂດຍອີງໃສ່ແຜນງານ, ເຊິ່ງມີຈຸດປະສົງເພື່ອສ້າງຕະຫຼາດ REC ທີ່ມີການແຂ່ງຂັນສໍາລັບປະເທດລາວ ແລະ ສ້າງໂອກາດໃຫມ່ສໍາລັບການຊື້ຂາຍໄຟຟ້າຂ້າມຊາຍແດນທີ່ໄດ້ຮັບການຍອມຮັບ. ເຊິ່ງໃນຕໍ່ໜ້າ REC ຈະຊ່ວຍຮັບປະກັນໃຫ້ພະລັງງານສະອາດຂອງລາວ ແລະ ຍັງເປັນທີ່ດຶງດູດຜູ້ຊົມໃຊ້ພະລັງງານທົດແທນທັງພາຍໃນ ແລະ ຕ່າງປະເທດ.
