ໂດຍໄດ້ຮັບການມອບໝາຍຈາກ ຄະນະພັກ, ຄະນະນຳກະຊວງ. ຕອນເຊົ້າວັນທີ 4 ມັງກອນ2025 ນີ້, ຢູ່ສວນສາທາລະນະປະຕູໄຊ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງພະລັງງານ ແລະ ບໍ່ແຮ່ ນຳພາໂດຍ ສະຫາຍ ດາວເພັດ ໂພທິວັນ ຮອງເລຂາ, ປະທານກວດກາ; ສະຫາຍ ວາດສະໜາ ເພັດລຳພັນ ຮອງເລຂາ, ຜູ້ຊີ້ນຳວຽກງານຂະບວນການ ແລະ ປະຊາສຳພັນ ພ້ອມຄະນະ ຈຳນວນ 7 ສະຫາຍ ໄດ້ຕາງໜ້າການນຳກະຊວງ, ພ້ອມດ້ວຍພະນັກງານ, ລັດຖະກອນ ແລະ ກຳມະກອນ ທົ່ວກະຊວງພະລັງງານ ແລະ ບໍ່ແຮ່ ເຂົ້າຮ່ວມຂະບວນການຍ່າງເພື່ອສຸຂະພາບ ເນື່ອງໃນໂອກາດສະເຫລີ່ມສະຫລອງວັນສ້າງຕັ້ງອົງການກາແດງແຫ່ງຊາດລາວ ຄົບຮອບ 70 ປີ ວັນທີ 1 ມັງກອນ 1955-1 ມັງກອນ 2025 ໂດຍໃຫ້ກຽດເຂົ້າຮ່ວມເປີດງານ ແລະ ນຳພາຂະບວນຍ່າງຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊົນລາວ, ທ່ານ ຄໍາລາວັນ ຈັນທະລາວັນ ປະທານ ອົງການກາແດງແຫ່ງຊາດລາວ, ມີການນຳຂັ້ນສູງ ພ້ອມດ້ວຍມວນຊົນຊາວນະຄອນຫລວງວຽງຈັນ ເຂົ້າຮ່ວມຢ່າງຫລວງຫລາຍ.
ທ່ານ ປະທານອົງການກາແດງແຫ່ງຊາດລາວ ໄດ້ກ່າວເປີດງານວ່າ: ດັ່ງທີ່ຮູ້ນໍາກັນວ່າ ໃນວັນທີ 01 ມັງກອນ 1955 ອົງການກາແດງແຫ່ງຊາດລາວ ໄດ້ຖືກສ້າງຕັ້ງຂຶ້ນ ໂດຍມີ ຊື່ວ່າ ສະພາກາຊາດລາວ ຊຶ່ງໄດ້ຈັດຕັ້ງເຄື່ອນໄຫວໜ້າທີ່ຕົ້ນຕໍຄື: ການຈັດຕັ້ງປະຕິບັດ ພັນທະ ຕາມພາລະບົດບາດຂອງຕົນ ແລະ ຕາມສົນທິສັນຍາສາກົນທີ່ລາວເປັນພາຄີ, ເພື່ອຊ່ວຍເຫຼືອດ້ານມະນຸດສະທຳ ແລະ ປະຊາສົງເຄາະກະທັນຫັນ; ໃນປີ 1975 ສະພາກາຊາດລາວໄດ້ປ່ຽນຊື່ມາເປັນ ສະພາກາແດງລາວ ໄດ້ຈັດຕັ້ງເຄື່ອນໄຫວ ຕາມນິຕິກຳໂດຍການຂົນຂວຍຍາດແຍ່ງການຊ່ວຍເຫຼືອຈາກສາກົນ, ຊ່ວຍຂະແໜງສາທາ ລະນະສຸກເຊັ່ນ: ໂຄສະນາປ້ອງກັນພະຍາດ, ຄຸ້ມຄອງອັດຕາການເກີດ, ການຕາຍ, ການ ໜູນໃຊ້ຢາພື້ນເມືອງສົມທົບຢາຫຼວງ ແລະ ຝຶກອົບຮົມຄວາມຮູ້ດ້ານການສົ່ງເສີມສຸຂະພາບ ໃຫ້ ກຸ່ມຄົນເສຍອົງຄະທີ່ຖືກຜົນກະຈາກສົງຄາມ.
ເພື່ອໃຫ້ສອດຄ່ອງຕໍ່ແນວທາງນະໂຍບາຍຂອງພັກ ແລະ ລັດຖະບານ, ອົງການກາແດງແຫ່ງຊາດ ລາວ ໄດ້ມີແຜນຍຸດທະສາດ 10 ປີ ເລີ່ມແຕ່ 2021-2030 ໂດຍມີວິໄສທັດ ວ່າ “ ປະຕິບັດ ວຽກງານມະນຸດສະທຳ ທີ່ມີການເຂົ້າຮ່ວມ ຂອງທຸກຊັ້ນຄົນຢູ່ໃນສັງຄົມ ດ້ວຍຄວາມສະໝັກໃຈ ” ເຊິ່ງ ມີ 3 ເປົ້າໝາຍ ຄື: ການພັດທະນາອົງການໃຫ້ເຂັ້ມແຂງ ແລະ ຍືນຍົງ, ການສົ່ງເສີມ ສຸຂະພາບ ເພື່ອຄຸນນະພາບຊີວິດທີ່ດີ ແລະ ການກຽມພ້ອມຕອບໂຕ້ໄພພິບັດ-ຊ່ວຍເຫຼືອ ບັນເທົາທຸກ, ການປຸກລະດົມບໍລິຈາກເລືອດ ແລະ ສະໜອງເລືອດທີ່ປອດໄພໃຫ້ແກ່ຄົນເຈັບ ໂດຍຜັນຂະຫຍາຍເປັນແຜນພັດທະນາ 5 ປີ (2021-2025). ໃນແຕ່ລະປີ ອົງການກາແດງແຫ່ງຊາດລາວ ມີການສ້າງຂະບວນການແຂ່ງຂັນຮັກຊາດ ແລະ ພັດທະນາ ໂດຍຍຶດຖືເອົາຕົວຊີ້ ບອກໃນ 10 ແຜນງານ ແລະ ແຜນປະຈຳປີ ເພື່ອນໍາພາການຈັດຕັ້ງປະຕິບັດແຂ່ງຂັນຮັກຊາດ ແລະ ພັດທະນາ ອີງໃສ່ ຕົວຊີ້ບອກຂອງແຕ່ລະຫ້ອງການ ແລະ ສະຖາບັນເລືອດ ພ້ອມທັງຈັບ ມືກັນແຂ່ງຂັນ. ຮອດທ້າຍປີ ກໍມີການສະຫຼຸບຂໍ້ແຂ່ງຂັນ, ກວດກາ ປະເມີນຜົນ ແລະ ຍ້ອງຍໍ.
