ທ່ານ ເຈົ້າແຂວງໆອຸດົມໄຊ ຕ້ອນຮັບ ທ່ານ ຮອງລັດຖະມົນຕີ ເຂົ້າພົບປະ, ຢ້ຽມຂໍ່ານັບ

          ທ່ານ ເຈົ້າແຂວງສະເໜີໃຫ້ກະຊວງພະລັງງານ ແລະ ບໍ່ແຮ່ ພິຈາລະນາຄົ້ນຄວ້າຊ່ວຍເຫລືອສ້າງຫໍພັກ ແລະ ອຸປະກອນການຮຽນໃຫ້ນັກຮຽນຊົນເຜົ່າຂອງແຂວງ ເຊິ່ງເປັນໂຮງຮຽນໄດ້ເຕົ້າໂຮມເອົາລູກຫຼານທີ່ກຳພ້າ, ກຳພອຍ ແລະ ທຸກຫຍາກຂາດເຂີນ, ຢູ່ເຂດທຸລະກັນດານ ໄດ້ເຂົ້າໂຮງຮຽນຕາມແນວທາງນະໂຍບາຍຂອງພັກ, ລັດຖະບານ ເຊິ່ງປັດຈຸບັນອຳນາດການປົກຄອງແຂວງກໍ່ມີຍັງມີຄວາມຫຍຸ້ງຍາກຫລາຍດ້ານ ເພື່ອສະໜອງຄວາມຮຽກຮ້ອງຕ້ອງການຂອງໂຮງຮຽນ; ຄົ້ນຄວ້າແກ້ໄຂຜົນກະທົບທາງດ້ານສິ່ງແວດລ້ອມ-ສັງຄົມ ຈາກໂຄງການເຂື່ອນໄຟຟ້ານໍ້າຂອງປາກແບ່ງ ແລະ ໂຄງການເຂື່ອນໄຟຟ້ານໍ້າຂອງຫລວງພະບາງ; ຕິດຕາມ, ຊຸກຍູ້ ໂຄງການກໍ່ສ້າງເຂື່ອນໄຟຟ້ານໍ້າແບ່ງ ໃຫ້ໄດ້ສືບຕໍ່ຈັດຕັ້ງປະບັດໂຄງການສຳເລັດໂດຍໄວ ເນື່ອງຈາກວ່າໂຄງການໄດ້ເລີ່ມກໍ່ສ້າງມາຫລາຍປີແລ້ວ ແລະ ປະຊາຊົນກໍ່ມີການລໍຄອຍມາດົນນານ.
ທ່ານ ຈັນທະບູນ ສຸກອາລຸນ ຮອງລັດຖະມົນຕີ ໄດ້ສະແດງຄວາມຍິນດີ ແລະ ພ້ອມທັງຮັບເອົານຳໄປຄົ້ນຄວ້າພິຈາລະນານຳໝູ່ຄະນະ ແລະ ລາຍງານຂັ້ນເທິງພິຈາລະນາ ເພື່ອເຮັດໃຫ້ການຈັດຕັ້ງປະຕິບັດແຕ່ລະໂຄງການຖືກຕ້ອງຕາມນະໂຍບາຍ, ກົດໝາຍ ແລະ ລະບຽບການວາງອອກຢ່າງເຂັ້ມງວດ, ສຳເລັດຕາມແຜນການວາງອອກ ໂດຍສະເພາະບັນຫາໃດທີ່ນອນຢູ່ໃນຄວາມຮັບຜິດຊອບຂອງກະຊວງພະລັງງານ ແລະ ບໍ່ແຮ່ ໂດຍກົງ. ສ່ວນບັນຫາໃດທີ່ພົວພັນກັບຄວາມຮັບຜິດຊອບຂອງຂະແໜງການອື່ນ ຈະສືບຕໍ່ປຶກສາຫາລື ແລະ ຊຸກຍູ້ໃຫ້ໄດ້ຮັບການຈັດຕັ້ງປະຕິບັດໂດຍໄວ.