ທ່ານ ຮອງຫົວໜ້າກົມຄຸ້ມຄອງບໍ່ແຮ່ ລົງຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດໂຄງການຂຸດຄົ້ນ-ປຸງແຕງແຮ່ທອງ-ຄຳ ຂອງບໍລິສັດ ລ້ານຊ້າງມິເນໂຣນ ລີມິເຕັດ

            ບໍລິສັດ ລ້ານຊ້າງມິເນໂຣນ ລີມິເຕັດ ເປັນບໍລິສັດລົງທຶນຈາກຕ່າງປະເທດ (ສປ.ຈີນ 90% ແລະ ລັດຖະບານລາວ 10%) ຊຶ່ງໄດ້ຮັບອະນຸຍາດສໍາຫຼວດ, ຂຸດຄົ້ນ ແລະ ຜະລິດແຮ່ທອງ, ຄໍາ ຢູ່ເຂດເມືອງວິລະບູລີ, ແຂວງສະຫວັນນະເຂດ ຈາກລັດຖະບານ ຄັ້ງວັນທີ 15 ມິຖຸນາ 1993 ໃນຮູບແບບຂອງສັນຍາ MEPA ໂດຍບໍລິສັດໄດ້ເລີ່ມດໍາເນີນການຂຸດຄົ້ນ ແລະ ຜະລິດ ໃນປີ 2003; ມາຮອດປະຈຸບັນ ບໍລິສັດກໍາລັງດໍາເນີນການຂຸດຄົ້ນ ເປັນປົກກະຕິ ຢູ່ 7 ເຂດ ຄື: Discovery East, Numkok 3A, Discovery West 4B, Mai 4A, Nakachan 1A, Nalu 3A,  Discovery East Deep Decline (ບໍ່ໃຕ້ດິນ). ສໍາລັບວຽກງານການຂຸດຄົ້ນບໍ່ໃຕ້ດິນ (Underground Mining) ແມ່ນດໍາເນີນຢູ່ເຂດ Discovery East Deep Decline ໂດຍດໍາເນີນການຂຸດຄົ້ນ ຈາກລະດັບຄວາມເລິກ (ປາກອຸມົງ) 1840 ແມັດ (ຈາກລະດັບໜ້ານໍ້າທະເລ), ຊຶ່ງມີຂະໜາດຂອງອຸມົງຫຼັກ (ສູງ 6 ແມັດ, ກວ້າງ 5.5 ແມັດ) ແລະ ອຸມົງຍ່ອຍຂະ ໜາດ (ສູງ 5 ແມັດ, ກວ້າງ 5.5 ແມັດ); ມາຮອດປະຈຸບັນ ບໍລິສັດ ໄດ້ດໍາເນີນການຂຸດຄົ້ນຮອດລະດັບຄວາມເລິກ 1660 ແມັດ (ຈາກລະດັບໜ້ານໍ້າທະເລ) ຫຼື ເລິກປະມານ 180 ແມັດ ຈາກໜ້າດິນ ລວມຄວາມຍາວຂອງອຸມົງທັງໝົດທີ່ຂຸດຄົ້ນໄດ້ ປະມານ 1800 ແມັດ ແລະ ຕາມແຜນຈະພັດທະນາ (ຂຸດຄົ້ນ) ບໍລິສັດ ຈະຂຸດຄົ້ນຮອດລະດັບ 1380 ແມັດ (ຈາກລະດັບໜ້ານໍ້າທະເລ).

          ໃນປີ 2024 ບໍລິສັດໄດ້ດໍາເນີນການຂຸດຄົ້ນ ແຮ່ຄໍາ-ທອງຈາກບໍ່ເປີດໜ້າດິນ ປະມານ 22,176,814 ໂຕນ ແລະ ແຮ່ຄໍາຈາກບໍ່ໃຕ້ດິນ ປະມານ 821,388 ໂຕນ, ຜະລິດເປັນໂລຫະຄໍາໄດ້ 178,557.69 ອອນ ແລະ ໂລຫະທອງໄດ້ 6,014 ໂຕນ; ໂດຍບໍລິສັດຈະມອບພັນທະທາງດ້ານການເງິນໃຫ້ລັດ ປະມານ 70.4 ລ້ານໂດລາສະຫະລັດ (ປະຈູບັນ ບໍລິສັດ ກໍາລັງສົມທົບກະຊວງການເງິນ ສະຫຼຸບປະຈໍາປີ), ຊຶ່ງໃນນັ້ນ ລວມມີ ການປະກອບທຶນພັດທະນາຊຸມຊົນ 750,000 ໂດລາສະຫະລັດ.