ກອງປະຊຸມໄດ້ຈັດຂຶ້ນຕອນບ່າຍວັນທີ 28 ມັງກອນ 2025 ທີ່ຜ່ານມາ ໂດຍແມ່ນໜ່ວຍຊາວໜຸ່ມປະຊາຊົນປະຕິວັດລາວ ຮາກຖານ ຫ້ອງການກະຊວງ ໄດ້ຮັບກຽດເປັນເຈົ້າພາບ. ກ່ອນກອງປະຊຸມຈະເລີ່ມຂຶ້ນຢ່າງເປັນທາງການ ຄະນະຜູ້ແທນ ທີ່ເຂົ້າຮ່ວມກອງປະຊຸມ ນຳພາໂດຍ ສະຫາຍ ປອ ສຸກວິສັນ ຄິນສະໝອນ ເລຂາຄະນະບໍລິຫານງານ ຊປປລ ກະຊວງ, ປະທານກອງປະຊຸມ ພ້ອມດ້ວຍຄະນະ ໄດ້ເຂົ້າພົບ ແລະ ລາຍງານຈຸດປະສົງຂອງກອງປະຊຸມຕໍ່ ສະຫາຍ ຄຳໂສ້ ກຸໂພຄຳ ຄະນະພັກກະຊວງ, ເລຂາໜ່ວຍພັກ, ຫົວໜ້າຫ້ອງການກະຊວງ.
ກອງປະຊຸມສ່ອງວຽກງານຊາວໜຸ່ມ ແມ່ນເປັນວຽກງານໜຶ່ງ ທີ່ ຄະນະບໍລິຫານງານ ຊປປລ ກະຊວງພະລັງງານ ແລະ ບໍ່ແຮ່ ຖືເປັນສຳຄັນໃນການນຳພາ-ຊີ້ນຳວຽກງານຊາວໜຸ່ມຢູ່ພາຍໃຕ້ຄວາມຮັບຜິດຊອບຂອງຕົນ. ກອງປະຊຸມສ່ອງແສງວຽກງານຊາວໜຸ່ມປະຈຳໄຕມາດຂອງ ຄະນະ ຊປປລ ກະຊວງພະລັງງານ ແລະ ບໍ່ແຮ່ ຈະໄດ້ຈັດຂຶ້ນທຸກໆ 3 ເດືອນ ໂດຍແມ່ນບັນດາ ຮາກຖານອ້ອມຂ້າງກະຊວງຜັດປ່ຽນກັນເປັນເຈົ້າພາບ ເພື່ອລາຍງານສະພາບທີ່ພົ້ນເດັ່ນຂອງສາກົນ, ພາກພື້ນ ແລະ ພາຍໃນປະເທດ ທີ່ຕິດພັນກັບຊີວິດການເປັນຢູ່ຂອງຊາວໜຸ່ມໃນທົ່ວໂລກ ກໍ່ຄືຊາວໜຸ່ມລາວເວົ້າລວມ, ເວົ້າສະເພາະຊາວໜຸ່ມຢູ່ໃນຂົງເຂດພະລັງງານ ແລະ ບໍ່ແຮ່. ນອກຈາກນີ້, ກອງປະຊຸມ ຍັງໄດ້ລາຍງານການເຄື່ອນໄຫວວຽກງານຊາວໜຸ່ມຂອງແຕ່ລະຮາກຖານ ທີ່ໄດ້ພ້ອມກັນຈັດຕັ້ງປະຕິບັດຕະຫຼອດໄລຍະ 3ເດືອນ ພ້ອມທັງສະເໜີທິດທາງແຜນການໃນໄລຍະ 3 ເດືອນຕໍ່ໜ້າ.
