ແຂວງສະຫວັນນະເຂດ ເປັນແຂວງໜຶ່ງຂອງ ສປປລາວ. ຕັ້ງຢູ່ທາງພາກກາງ, ທິດຕາເວັນອອກຕິດກັບປະເທດຫວຽດນາມ, ທິດຕາເວັນຕົກຕິດກັບປະເທດໄທ, ທິດເໜືອຕິດກັບແຂວງຄຳມ່ວນ, ທິດໃຕ້ຕິດກັບແຂວງສາລະວັນ; ເປັນແຂວງໃຫຍ່ອັນດັບໜຶ່ງຂອງ ສປປລາວ. ເປັນແຂວງທີ່ມີການຂະຫຍາຍຕົວທາງດ້ານເສດຖະກິດສູງເມື່ອທຽບກັບແຂວງອື່ນ ແລະ ກໍ່ເປັນແຂວງທີ່ມີທ່ແຮງຫຼາຍດ້ານ ໃນການພັດທະນາເສດຖະກິດ-ສັງຄົມ. ໃນໄລຍະ 10 ປີມານີ້ ແຂວງສະຫວັນນະເຂດມີຄວາມຕ້ອງການຊົມໃຊ້ພະລັງງານໄຟຟ້າສູງ ແຕ່ທ່າແຮງການສ້າງແຫຼ່ງຜະລິດພະລັງງານພັດມີຂໍ້ຈຳກັດ ເຊິ່ງບໍ່ສາມາດຕອບສະໜອງຄວາມຮຽກຮ້ອງຕ້ອງການຂອງການຂະຫຍາຍຕົວທາງດ້ານເສດຖະກິດ-ສັງຄົມຂອງແຂວງ.
ເພື່ອຮັບປະກັນເຮັດໃຫ້ການສະໜອງພະລັງງານໄຟຟ້າຢູ່ພາຍໃນແຂວງພຽງພໍຄວາມຮຽກຮ້ອງຕ້ອງການຂອງການຊົມໃຊ້ໄຟຟ້າຂອງສັງຄົມ, ລັດຖະບານ ກໍ່ຄື ກະຊວງພະລັງງານ ແລະ ບໍ່ແຮ່ ໄດ້ຊຸກຍູ້ສົ່ງເສີມໃຫ້ທຸກເຂດທີ່ມີທ່າແຮງ ພັດທະນາພະລັງງານໄຟຟ້າແສງຕາເວັນ ເພື່ອເຊື່ອມຕໍ່ກັບລະບົບຂອງໄຟຟ້າລາວ ທັງເປັນການສ້າງຄວາມໝັ້ນຄົງທາງດ້ານພະລັງງານຢູ່ແຂວງສະຫວັນນະເຂດ. ໂຄງການໄຟຟ້າແສງຕາເວັນບ້ານ ອຸ່ມໜາມຄອງ, ເມືອງສອງຄອນ ເປັນໂຄງການໜຶ່ງ ທີ່ໄດ້ຮັບການພັດທະນາມາແຕ່ປີ 2018-2019 ແລະ ສໍາເລັດ ພ້ອມທັງເປີດນຳໃຊ້ຂາຍກະແສໄຟຟ້າ ມາແຕ່ປີ 2020 ເປັນຕົ້ນມາ.
ທ່ານ ເສົາມີນາ ມີວໍລະຈັກ ວິຊາການປະຈຳໂຄງການໄຟຟ້າແສງຕາເວັນ ບ້ານອຸ່ມໜາມຄອງ ໄດ້ລາຍງານ ໃນໂອກາດທີ່ ທ່ານ ຈັນທະບູນ ສຸກອາລຸນ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມຄະນະລົງຢ້ຽມຢາມໂຄງການໄຟຟ້າແສງຕາເວັນ ບ້ານອຸ່ມໜາມຄອງ ໃນວັນທີ 18 ກຸມພາ 2025 ວ່າ: ໃນໄລຍະຜ່ານມາພະລັງແສງຕາເວັນຜະລີດໄຟສົ່ງອອກ, ສົ່ງຈ່າຍໄປໃຫ້ສອງເມືອງທີ່ຮັບພະລັງງານຈາກແສງຕາເວັນ ຄື: ເມືອງສອງຄອນ ແລະ ເມືອງໄຊພູທອງ ເຊີ່ງພະລັງງານແສງຕາເວັນບ້ານອຸ່ມໜາມຄອງ ເປັນພະລັງງານເສີມແຮງດັນຕົກໃຫ້ສອງເມືອງຕາມສາຍແຈກ.
