ວັນທີ 27 ກຸມພາ 2025 ພະແນກພະລັງງານ ແລະ ບໍ່ແຮ່ ແຂວງໄຊສົມບູນ ສົມພົບກັບພາກສ່ວນກ່ຽວຂ້ອງຂັ້ນແຂວງ ແລະ ເມືອງ; ໂດຍການນຳພາຂອງ ທ່ານ ບຸນທຽມ ໄຊສົງຄາມ ກຳມະການພັກແຂວງ, ຫົວໜ້າພະແນກພະລັງງານ ແລະ ບໍ່ແຮ່ ແຂວງ ໄດ້ລົງກວດກາດ້ານເຕັກນິກຂອງໂຮງງານປຸງແຕ່ງແຮ່ຊືນ-ສັງກະສີ ແລະ ແຮ່ທອງ ແບບທົດລອງ ຂອງບໍລິສັດ ຫຼົງຈ່ຽງ ມາຍນິ້ງ ເພື່ອແນ່ໃສຮັບປະກັນໃນການດຳເນີນຜະລິດ, ການຕິດຕັ້ງກົນຈັກຕ່າງໆໃຫ້ຄວາມຖືກຕ້ອງຕາມເຕັກນິກການກໍ່ສ້າງ ຂອງບົດວິພາກເສດຖະກິດ-ເຕັກນິກ.
ໂອກາດທີ່ມີຄວາມສໍາຄັນນີ້ ທ່ານ ບຸນທຽມ ໄຊສົງຄາມ ພ້ອມດ້ວຍຄະນະໄດ້ລົງກວດກາຕົວຈີງຢູ່ພາກສະໜາມຂອງບໍລິສັດ ຫຼົງຈ່ຽງ ມາຍນິ້ງ ໂດຍການຕ້ອນຮັບຂອງບັນດາຄະນະວິຊາການປະຈຳພາກສະໜາມຂອງບໍລິສັດ ຫຼົງຈ່ຽງ ມາຍນິ້ງ ຢ່າງພ້ອມພຽງ ການລົງເຮັດວຽກໃນຄັ້ງນີ້ ໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນໄລຍະຜ່ານມາຂອງບໍລິສັດ ແລະ ລົງກວດກາເບິ່ງພື້ນທີ່ຕັ້ງຕົວຈີງຂອງໂຮງງານ ແລະ ຈຸດສຳຄັນຕ່າງໆ… ເພື່ອກວດສອບຄວາມພ້ອມ, ປະສິດທິພາບຂອງເຄື່ອງຈັກຕ່າງໆ… ໃຫ້ຄຽງຄູ່ໄປກັບຄວາມປອດໄພ ແລະ ການບຳບັດສິ່ງເສດເຫຼຶອຂອງໂຮງງານ ທັງນີ້ກໍເພື່ອຫຼຸດຜ່ອນຜົນກະທົບຕໍ່ສິ່ງແວດລ້ອມ ແລະ ສັງຄົມ ຫຼັງຈາກຜ່ານການກວດກາເຫັນວ່າ ການດຳເນີນການກໍ່ສ້າງແມ່ນຖືກຕ້ອງຕາມເຕັກນິກການກໍ່ສ້າງ ຂອງບົດວິພາກເສດຖະກິດ-ເຕັກນິກ ທີທາງພະແນກພະລັງງານ ແລະ ບໍ່ແຮ່ ແຂວງໄຊສົມບູນໄດ້ຢັ້ງຢືນຮັບຮອງໃນໄລຍະຜ່ານມາ.
